تطورات مهمة جدا في ملف الاكتشافات البترولية.. الشركات الأجنبية ناوية على إيه؟
ليه شركات أجنبية كبيرة زي إيني وبي بي وتوتال قررت تزود إنتاجها في مصر الفترة الجاية؟ وهل الزيادة دي هتخلي أسعار الغاز والبترول تنزل عندنا ولا لأ؟!
فى الفترة الأخيرة عدد من الشركات الأجنبية العاملة فى قطاع البترول والاكتشافات فى مصر أعلنت عن زيادة انتاجها فى السوق المصري.. الشركات الأجنبية دي مش جديدة على الساحة المصرية دول ناس ليهم باع طويل هنا.. بس اللي جديد إنهم قرروا يزودوا المساهمة بتاعتهم في الإنتاج.. يعني مثلاً شركة إيني الإيطالية اللي تعتبر أكبر منتج غاز في مصر دلوقتي بدأت تحفر بئرين جديدين في حقل ظهر العملاق في البحر المتوسط.
الحقل ده لوحده بيطلع نسبة كبيرة من إنتاجنا والببرين دول متوقع يضيفوا حوالي 220 مليون قدم مكعب يومياً للإنتاج في النص التاني من 2025.. مش بس كده.. إيني كمان بتفكر تربط غاز من حقل كرونوس في قبرص بمصر وده ممكن يبدأ من آخر 2026 يعني إمدادات زيادة على الطريق.
نيجي بقى لشركة بي بي البريطانية.. دي كمان عندها خطط توسع في مناطق شمال مراقيا البحرية ومنطقتي كايرو ومصري في البحر المتوسط.. بي بي بتفكر تضيف منطقة امتياز جديدة غرب البحر المتوسط وده معناه إنها ناوية تزود الحفارات وتكتشف آبار جديدة.. مش بعيد يعني نشوف زيادة في إنتاجها تتعدى الملايين من الأقدام المكعبة يومياً لو الخطة مشت تمام.
شركة توتال إنيرجيز الفرنسية.. نازلة هي كمان بكل قوتها.. الشركة أعلنت إنها مهتمة تدخل مناطق استكشافية جديدة في البحر المتوسط.. وكمان بتفكر تدعم نشاط تسويق وقود الطائرات.. يعني مش بس إنتاج غاز وبترول.. لا.. دي كمان عينها على السوق المحلي والتصدير.. وفي شركة أكسون موبيل الأمريكية اللي بتخطط تتوسع في شمال مراقيا ومناطق تانية.. وبتحط استثمارات جديدة ممكن تضخ ملايين البراميل الزيادة.
طب حجم الزيادة اللي بنتكلم عنها كام ؟
بص يا سيدي .. إنتاج مصر من الغاز دلوقتي حوالي 4.87 مليار قدم مكعب يومياً في 2024.. وده أقل مستوى من 8 سنين.. لكن مع الخطط دي في تقارير بتقول إن 2025 ممكن نشوف زيادة تتراوح بين 200 لـ300 مليون قدم مكعب يومياً من حقل ظهر لوحده.. وده غير الزيادات المتوقعة من بي بي وأكسون وتوتال.
و مصر ممكن توصل لـ5.5 مليار قدم مكعب يومياً في 2025 لو كل حاجة مشت على المظبوط.. وفي 2027 لو الحقول الجديدة زي ريفين وكرونوس بدأت تشتغل الإنتاج ممكن يقفز أكتر من كده بكتير.
طب الزيادة دي هتأثر على الأسعار إزاي؟
على المدى الطويل لو الإنتاج زاد زي ما متوقع في 2027، ولو مصر رجعت تصدر غاز تاني هنا ممكن نشوف تخفيف على أسعار الوقود وكمان دخل دولاري يساعد الاقتصاد. بس في نفس الوقت، لو الشركات دي طلبت سعر غاز أعلى عشان تبرر استثماراتها، زي ما بي بي وإيني بيفكروا، ممكن الأسعار تترفع على المصانع الكبيرة زي الحديد والأسمنت، وده ينعكس على المنتجات النهائية.
