"دافوس" وش الخير على مصر.. شركة عالمية تنوي الاستثمار في الطاقة المتجددة

يا ترى ليه المنتدى الاقتصادي العالمي "دافوس" بقى وش الخير على مصر، وليه الحكومة قررت تستغل الحدث الاقتصادي المهم ده عشان في التوقيت ده بالذات، هل بتستهدف انها تصطاد مستثمرين عالميين وتجذبهم للسوق المصري، ولا تروج للمنتج المصري بشكل كويس قدام كبار رجال الأعمال في العالم، وهل في بشاير حصلت ولا لسه.
في الساعات الأخيرة، منتدى دافوس 2025 المنعقد في سويسرا، شهد تواجد مكثف لوزراء المجموعة الاقتصادية في مصر، واللي كان بينهم المهندس حسن الخطيب وزير الاستثمار والتجارة الخارجية، واللي يقدر يستغل الحدث ده كويس جدا ويجذب مستثمرين عالميين للسوق المصري.
واللي حصل، إن وزير الاستثمار، عمل لقاء مع مورتن هوي ديرهولم، نائب رئيس شركة فيستاس لأنظمة الرياح والطاقة المتجددة، وقدم له كل التسهيلات والحوافز اللي تقدر تجذب الشركة عشان تشتغل في السوق المصري.
وبالفعل، الوزير استعرض الفرص الاستثمارية المتاحة بالسوق المصري في مجال الطاقة المتجددة، وأكد إن الدولة حريقة جدا على تطوير القطاع الحيوي ده، بما يتماشى مع رؤية مصر 2030 لتحقيق التنمية المستدامة.
وتحركات الوزير، بترجم تكليفات الرئيس عبدالفتاح السيسي، للحكومة بجذب المزيد من الاستثمارات في كل المجالات، واللي بينها الطاقة المتجددة ومجال تصنيع توربينات الرياح، عشان تساهم في دعم المشروعات الوطنية وتعزز القدرة التنافسية للمنتجات المصرية في الأسواق الإقليمية والعالمية، وكمان تقدر تعزز مكانة مصر كمركز إقليمي للطاقة النظيفة.
عشان كده، "الخطيب" ناقش مع الشركة العالمية، إمكانيات توسيع استثماراتها في مصر في قطاع الطاقة المتجددة، والاستفادة من المزايا التنافسية اللي بيتمتع بها السوق المصري في القطاع الواعد ده.
وأكد كمان، إن الحكومة دلوقتي بتتبني استراتيجية واضحة، هدفها تعزيز الاعتماد على مصادر الطاقة الجديدة والمتجددة، عشان تقدر نواكب التوجه العالمي نحو التنمية المستدامة وتقليل الانبعاثات الكربونية، ودعا الشركة لدراسة إنشاء مصنع متخصص لتصنيع توربينات الرياح في المنطقة الاقتصادية لقناة السويس، لأنه موقع استراتيجي، وبيتميز بمقومات فريدة أهمها سهولة الوصول للأسواق الإقليمية والدولية، بجانب توافر العمالة المؤهلة والمهندسين ذوي الكفاءة العالية وتوافر الأرضي.
وممكن جدا المصنع ده يستفيد من التسهيلات الحكومية الموجهة لجذب الاستثمارات في المنطقة الاقتصادية لقناة السويس، عشان كده قال مورتن هوي ديرهولم، نائب رئيس شركة فيستاس لأنظمة الرياح والطاقة المتجددة، إن مصر بتمثل قاعدة تصنيع مهمة في مجال الطاقة المتجددة وصناعة توربينات الرياح، وإن في مقومات استثمارية متميزة لمصر، زي التكلفة الاستثمارية التنافسية والموقع الاستراتيجي اللي بيتوسط 3 قارات، فكل ده بيرشحها إنها تبقى من أهم الوجهات المهمة للمستثمرين.
ومن هنا، أبدى رئيس الشركة موافقته على تنفيذ المشروع في مصر، ومتبقى بس الإجراءات التنفيذية، وده في حد ذاته إنجاز يضاف لسجل إنجازات الحكومة وخاصة وزارة الاستثمار اللي شغالة من نار عشان تجذب مستثمرين للبلد وتقدر تدعم الاقتصاد المصري بطريقتها الخاصة.
وبالفعل لو استمرت سياسة الحكومة وخاصة وزارة الاستثمار في استغلال الأحداث الاقتصادية العالمية وجذب مستثمرين جدد لمصر، هنلاقي مصر اتحولت لأكبر مركز إقليمي لكل الصناعات في الفترة الجاية، وهتبقى الوجهة الأولى لأغلب مستثمري العالم، وده اللي ممكن نشوفه في الفترة الجاية.