صفقة المطارات الكبرى.. ضربة الحكومة الأخيرة للقضاء على أزمة الدولار

يا ترى ليه الحكومة بتفكر فى تطرح 20 مطار  لإدارة وتشغيل القطاع الخاص؟ وإزاي ده هيأثر على الاقتصاد المصري؟ وليه الحكومة بتتجه للطريق ده دلوقتي؟ وهل ده فعلاً هيكون لصالح المسافرين وقطاع الطيران؟ ولا هيكون مجرد خطوة لتوفير سيولة مالية فى اطار خطط الدولة لزيادة الحصيلة الدولارية من خلال خطة الطروحات وبيع الشركات العامة؟

الحكومة بقالها فترة بتسعى لطرح أصول الدولة قدام القطاع الخاص في إطار برنامج الطروحات اللي شغالين عليه بقالهم مدة.. وآخر حاجة الحكومة كشفت عنها، هي نيتها لطرح 20 مطار قدام القطاع الخاص عشان يديرها ويشغلها.. والطرح ده هيكون بالتعاون مع مؤسسة التمويل الدولية اللي انتهت بالفعل من الدراسة الفنية والجدول الزمني للطرح ده.. واللي هيشمل إدارة وتشغيل 20 مطار موجودين في مصر، منهم 4 مطارات جديدة تم تطويرها خلال الـ 9 سنين اللي فاتوا.

طيب ليه الحكومة بتعمل كده؟

مصر عندها هدف كبير لزيادة عدد الركاب اللي بيمروا من مطاراتها كل سنة.. و في 2023 وصل عدد الركاب لـ 66.2 مليون راكب، والحكومة مستهدفة توصلهم لـ 72.2 مليون بنهاية 2025، كخطوة أولى قبل ما توصل للهدف الكبير بتاع 110 مليون راكب سنوياً في 2030. . ففكرة طرح المطارات للقطاع الخاص هتساعد في زيادة القدرة الاستيعابية للمطارات دي، وتحسين جودة الخدمة وتطوير البنية التحتية للمطارات.

ولما القطاع الخاص يدير المطارات دي.. ده مش بس هيحسن من تجربة المسافرين لكن كمان هيزود العوائد المالية اللي بتيجي من تشغيل المطارات..يعني هتشوف زيادة في الاستثمارات في المجال ده سواء في الخدمات أو في توسعات المطارات نفسها وده ممكن يدفع بعجلة النمو الاقتصادي بشكل أكبر.

فيه نقطة كمان مهمة وهي إن الحكومة بتسعى لتقليل العبء المالي اللي على الدولة.. وإدارة وتشغيل المطارات بيحتاج استثمارات ضخمة لتطويرها وتحسين خدماته.. والقطاع الخاص عنده الإمكانيات دي بشكل أفضل من الحكومة في بعض الأحيان.. فبدل ما الدولة تصرف كل الموارد دي بتفتح الباب قدام الشركات العالمية إنها تستثمر وتدير المطارات وفي نفس الوقت بتحقق عوائد مالية من الطرح ده.

طب هل ده معناه إن القطاع الخاص هيبقى المتحكم في كل حاجة؟

مين قال كده .. الحكومة هتفضل متابعة ومراقبة سير الأمور عشان تضمن إن كل حاجة ماشية في الطريق الصحيح وإن مصلحة الدولة والمواطنين محفوظة.. كمان طرح المطارات ده ممكن يكون خطوة مهمة في برنامج الطروحات اللي شغالين عليه في قطاعات تانية زي البنوك

و زي ما قال الدكتور مصطفى مدبولي رئيس الوزرا، في تصريحات أخيرة إنهم شغالين على طرح كذا حاجة قدام القطاع الخاص وده ضمن خطة أكبر لجذب استثمارات محلية وأجنبية في البلد.

واللى لازم نكون عارفينوا كويس ان طرح المطارات للقطاع الخاص خطوة مهمة ضمن خطة الحكومة لتطوير البنية التحتية وزيادة العوائد المالية.. واللي هيبان مع الوقت هو مدى نجاح الخطة دي في تحقيق أهدافها.

لكن السؤال اللي بيطرح نفسه دلوقتي.. هل القطاع الخاص هيقدر يوصل بالتجربة دي للنجاح اللي الحكومة مستنياه؟ خلينا نشوف ايه اللى هيحصل وبعدها نحكم