حكاية المشروع السويسري الجديد في مصر .. مفاجأة

إيه قصة المشروع السويسري الجديد اللي هيتعمل في مصر قريب، وإيه هي حجم استثماراته، وإزاي هينعكس بالايجاب على الاقتصاد المصري وكمان حياة المواطن البسيط، وامته هنشوف المشروع ده قائم على أرض الواقع.. هنقولك كل التفاصيل في الفيديو ده. 
 

في الساعات الأخيرة، قدمت شركة سويسرية عملاقة طلب للحكومة المصرية، وأكدت نيتها لإنشاء أول مصانعها في مصر باستثمارات بتوصل ل30 مليون دولار.

عشان كده، ياسر عباس، نائب الرئيس التنفيذي للهيئة العامة للاستثمار والمناطق الحرة، قابل وفد شركة "باري كاليبو" السويسرية برئاسة فامسي موهان، رئيس الفرع الإقليمي للشركة في منطقة آسيا وأفريقيا والشرق الأوسط، عشان يبحثوا خطط الشركة للاستثمار في السوق المصرية.

ومن هنا، قالت الشركة السويسرية إنها ناوية بشكل جدي، تدخل السوق المصري من خلال إقامة مشروع في مجال صناعة الشوكولاتة، باستثمارات بتوصل ل30 مليون دولار كبداية وده عشان تلبي الطلب في السوق المحلية الضخمة في مصر، ومش بس كده، لأ ده كمان عشان مصر تبقى مركز إقليمي لتصدير منتجات الشركة لكل دول الشرق الأوسط والدول الأفريقية.

ولو انت ماتعرفش، فشركة باري كاليبو بتعتبر من أكبر الشركات الرائدة عالمياً في مجال صناعة الشوكولاتة والكاكاو، وعندها 66 مصنع في كل دول العالم.

ومن هنا، نائب الرئيس التنفيذي للهيئة العامة للاستثمار والمناطق الحرة، أبدى إعجابه بالمشروع، وأكد إن الحكومة مهتمة جدا بتطورات مناخ الاستثمار في مصر، ووعد بوجود ضمانات وحوافز استثمارية جديدة بيتم تقديمها للمستثمرين، بالإضافة إلى حرص الحكومة على تحقيق نقلة نوعية في معدل تأسيس الشركات، وتسهيل تملك الأراضي، والتوسع في إصدار الرخصة الذهبية، وتعزيز الحوكمة والشفافية والحياد التنافسي في السوق المصري.

كمان، تم عرض الأنظمة الاستثمارية المختلفة اللي تنبتها الحكومة المصرية، وحزم الحوافز والتسهيلات المتنوعة اللي بيتم اعتمادها حسب احتياجات كل قطاع اقتصادي.

وأكد نائب الرئيس التنفيذي للهيئة، على تقديم الدعم الكامل لشركة باري كاليبو في جميع مراحل المشروع وتيسير الإجراءات بداية من توفير الأراضي وتأسيس الشركة لحد إجراءات تشغيل المشروع لضمان استدامة عمليات الإنتاج.

ونقدر نقول إن العلاقات الاقتصادية المصرية السويسرية، بتشهد تطورات إيجابية جدا، وخاصة في التبادل التجاري بين الجميع، عشان كده وصل حجم الاستثمارات السويسرية في المشاريع السويسرية داخل مصر ل 1.2 مليار دولار.

ووصل حجم التبادل التجاري خلال سنة 2022، حوالي 1.5 مليار دولار، ووفرت 25 ألف فرصة عمل في 433 مشروع، وفي السنة الأخيرة 2023، زادت حجم الاستمارات السويسرية في مصر، بقيمة 200 مليون دولار دفعة واحدة.

وفي النهاية، الجميع متفائل بالمشروع السويسري الجديد في مصر، مش بس عشان الاستثمارات اللي هتدفع الاقتصاد المصري لقدام، لأ ده كمان عشان هنشوف الشكولاته السويسرية في المحلات والمتاجر المصرية من غير مانستوردها بالملايين.