نت بـ "سرعة الصاروخ" ومش هتسمع "الشبكة واقعة” تاني .. إيه حكاية خدمات الـ 5G اللي هتدخل مصر
إيه اللي ممكن يغير تجربتنا في استخدام الموبايل والانترنت في مصر؟ وليه الكل بيتكلم عن الجيل الخامس (5G) دلوقتي؟ هل يا ترى التوقيع على تراخيص خدمات الجيل الخامس من وزارة الاتصالات لشركات كبيرة زي "أورانج مصر"، "فودافون مصر"، و"أي آند مصر" هيأثر فعلاً على حياتنا؟ وإيه الفرق اللي هنحس بيه كمستخدمين؟
نت ساعات وزارة الاتصالات وتكنولوجيا المعلومات أعلنت عن توقيع الدفعة التانية من تراخيص خدمات الجيل الخامس لشركات "أورانج مصر" و"فودافون مصر" و"أي آند مصر".. فيا ترى الكلام دهمعناه ايه وإيه الفايدة منها، وإزاي هتحسن من تجربتنا اليومية في الاتصال والإنترنت!
الخبر اللى تم الاعلان عنه النهاردة معناه إننا قريب هنشوف خدمات 5G بتدخل بشكل أوسع في حياتنا..و الشركات اللي حصلت على التراخيص دي هي "أورانج مصر"، "فودافون مصر"، و"أي آند مصر"، والكل مستني يشوف إيه اللي هيحصل بعد كده.
طب إيه هو الجيل الخامس أو (5G) أصلاً؟
الجيل الخامس هو الجيل الجديد من تكنولوجيا الاتصالات واللي بيعدنا بسرعات أعلى بكتير من الجيل الرابع (4G)، وده مش مجرد سرعة أعلى في تحميل فيديوهات أو تصفح الإنترنت.. ده كمان هيساعد في تطوير تقنيات زي الذكاء الاصطناعي، وإنترنت الأشياء ، والعربيات ذاتية القيادة، وكمان تطبيقات جديدة في مجال الصحة والتعليم.. يعني الجيل الخامس مش مجرد تطوير بسيط، ده تغيير جذري في طريقة استخدامنا للتكنولوجيا.
وايه فايدة تراخيص الجيل الخامس لمصر؟
توقيع تراخيص الجيل الخامس للشركات دي خطوة كبيرة جدًا لمصر.. وده ليه أكتر من سبب.. أول حاجة الجيل الخامس هيخلي الإنترنت أسرع بكتير والسرعات اللي ممكن نوصلها هتكون أسرع من اللي احنا متعودين عليه بأضعاف.. وده معناه إنك هتقدر تحمل فيديوهات، تلعب ألعاب أونلاين، وتتفرج على محتوى بجودة عالية من غير أي تأخير أو بطء.
ومش بس السرعة هي اللي هتتحسن.. الجيل الخامس كمان بيوفر استقرار أكبر في الاتصال، وده هيكون مهم جدًا في الأماكن اللي بيبقى فيها زحمة على الشبكة، زي في المدن الكبيرة أو الأحداث اللي بيحضرها ناس كتير. ده هيقلل جداً من الانقطاع أو التأخير في الاتصال.
إزاي ده هيأثر على جودة الخدمة؟
من ناحية جودة الخدمة، الجيل الخامس هيحسن كل حاجة تقريباً. أولاً، هتلاقي إن الاتصال بقى أسرع بكتير، وده معناه إنك مش هتحس بأي تأخير وانت بتعمل مكالمات فيديو أو بتستخدم تطبيقات بتحتاج إنترنت سريع زي الألعاب أو تطبيقات العمل عن بعد.. كمان هنلاقي إن جودة المكالمات الصوتية هتتحسن، وهتكون أوضح من قبل. يعني حتى لو كنت في مكان فيه إشارة ضعيفة أو شبكة زحمة، الجيل الخامس هيوفر اتصال مستقر وقوي.
إيه اللي هنشوفه قريب؟
التوقيع على تراخيص الجيل الخامس هو بس البداية. الشركات هتبدأ في توسيع الشبكات والبنية التحتية عشان تقدم الخدمة بشكل أفضل في كل حتة.. ممكن في البداية نشوف الخدمة متاحة في المدن الكبيرة، لكن مع الوقت هتبدأ تنتشر في كل مكان في مصر.
ده معناه إن قريب جداً هنبدأ نشوف التطبيقات العملية للجيل الخامس في حياتنا اليومية.. من تشغيل الأجهزة المنزلية الذكية لحد العربيات ذاتية القيادة، الجيل الخامس هيفتح أبواب جديدة لعالم التكنولوجيا.
