لو بتستخدم تطبيق انستاباي .. لازم تشوف الفيديو ده
إيه اللي بيحصل في عالم التكنولوجيا المالية؟ وليه كل الناس بتتكلم عن تطبيق "إنستا باي"؟ وإيه علاقة البنك المركزي بالموضوع؟ وليه تم زيادة حدود السحب وعدد المعاملات وازاى ده هيأثر على استخدامك للتطبيق ؟ وهل الموضوع ده هيسهل حياتنا أكتر ولا هيعقدها؟ .. لو بتستخدم "إنستا باي" أو بتفكر تبدأ، ركز معايا في اللي جاي عشان تعرف التفاصيل.
"إنستا باي"، التطبيق اللي أصبح حديث الناس في الفترة الأخيرة، بقى واحد من أهم الوسائل اللي بنعتمد عليها لتحويل الفلوس بشكل فوري وسهل، من غير ما نحتاج نروح البنك أو نقف في طوابير طويلة.. والبنك المركزي المصري طول الوقت بياخد خطوات واضحة لدعم التكنولوجيا المالية وتشجيعها، وكان أحدث خطوة ليه هي رفع حدود المعاملات المالية على تطبيق "إنستا باي"، واللي كتير مننا كان مستنيها بفارغ الصبر.
البنك المركزي أعلن إنه زود عدد المعاملات اللي ممكن تعملها في اليوم، وكمان رفع حدود السحب.. وده قرار هيكون ليه تأثير كبير على الناس اللي بتستخدم التطبيق في حياتها اليومية. دلوقتي، لو كنت بتستخدم "إنستا باي" في تحويل فلوس لصاحبك أو لأهلك، أو حتى في شغلك عشان تدفع فواتير أو مرتبات، هتقدر تعمل كل ده براحة أكبر ومن غير ما تكون محدود في عدد التحويلات.
وأعلن البنك المركزي وصول عدد البنوك اللي تم ربطها على شبكة المدفوعات اللحظية «إنستاباي» إلى 34 بنك وأعلن كمان ارتفاع عدد المعاملات الخاصة بالخدمة حيث سجل ما يزيد على 93 مليون معاملة خلال الربع الأول لعام 2024 بإجمالي قيم تزيد على 565 مليار جنيه.
وقبل كده، كان فيه حدود لعدد العمليات اللي تقدر تعملها في اليوم، وده كان بيعمل مشاكل لبعض الناس، خصوصاً اللي بيتعاملوا بمبالغ كبيرة أو بيحتاجوا يحولوا لناس كتير في وقت قصير. دلوقتي مع القرار الجديد، هتقدر تعمل أكتر من عملية في اليوم بكل سهولة. لكن الموضوع مش متوقف هنا.
البنك المركزي كمان رفع الحد الأقصى لمبلغ السحب اليومي.. يعني لو كان عندك مبلغ كبير وكنت محتاج تسحبه مرة واحدة، هتقدر تعمل ده من غير ما تتقسم على كذا يوم. القرار ده مهم جداً لأصحاب الأعمال الحرة أو أي حد بيتعامل بمبالغ كبيرة وبيحتاج يستخدم الفلوس بشكل سريع.
وتتفاوت حدود السحب من تطبيق إنستا باي بين الحد الأقصى للسحب للمعاملة الواحدة واللي بيصل إلى 70 ألف جنيه، والحد الأقصى للمعاملات في اليوم واللي بلغ 120 ألف جنيه، أما على مدار الشهر فيجب ألا يتجاوز السحب مبلغ الـ400 ألف جنيه عبر استخدام التطبيق الرقمي إنستاباي، وفقا للكتاب الدوري المنشور على الموقع الرسمي للبنك المركزي.
القرار ده مش بس هيأثر على الأفراد، لكن كمان الشركات الصغيرة والمتوسطة اللي بدأت تعتمد على "إنستا باي" كوسيلة دفع سريعة وآمنة.. يعني دلوقتي الشركات تقدر تدير أعمالها بسهولة أكتر، وتحول الفلوس بشكل فوري من غير تأخير. ده هيعمل نوع من الثقة بين العملاء وأصحاب الأعمال، وده طبعاً شيء إيجابي للاقتصاد بشكل عام.
طب ممكن تسأل: هل في رسوم إضافية أو شروط جديدة مع القرار ده؟
الحقيقة لحد دلوقتي مفيش معلومات واضحة عن أي زيادات في الرسوم، وده خبر حلو طبعاً للناس اللي بتستخدم التطبيق بشكل يومي. لكن زي ما إحنا عارفين، البنك المركزي دايماً بيبص للأفضلية العامة، وبيحاول يوازن بين تسهيل المعاملات والحفاظ على أمان النظام المالي.
