في كل سوق مافيا.. السيسي هيلاقيها منين ولا منين
هو ليه الحكومة مش قادرة على التجار اللي بيرفعوا الأسعار بشكل مبالغ فيه ولغاية امتي هيفضل الجشع بيتحكم في الناس وهل الحكومة مظلومة في قصة الأسعار ولا المفروض تعمل إيه.. كل دا هتلاقوه في الفيديو ده خليكم معانا للآخر .
من ساعة أزمة الدولار السنة اللي فاتت وارتفعت الأسعار بشكل غير مسبوق في الأسواق المصرية ورغم أن زيادة الأسعار كانت منطقية مع ارتفاع الأسعار العالمية نتيجة الأزمات الدولية من ناحية ومن الناحية التانية ارتفاع سعر الدولار في السوق المصرفي واللي رفع أسعار المواد والسلع المستوردة لكن الأغرب أن الزيادات في الأسعار مكنتش متناسبة مع الزيادات في سعر الدولار يعني ببساطة كده لو كيلو السكر كان ل18 جنيه قبل الأزمة والتعليم كمان كان يفترض يوصل سعره باقصي تقدير ل25 جنيه على سبيل المثال لكن وصل سعره لحوالي 70 جنيه في وقت من الأوقات ودلوقتي اعلي سعر ليه 60 جنيه وفرق السعر دا جاي بقي من مافيا التجار اللي بيرفعوا الأسعار بشكل كبير وعشوائي وفوق المنطقي .
الدولة الحقيقة دخلت في حرب مع مافيا التجار وخدت إجراءات كتير لكن لسه السوق فيه اللعب ولسه الإسعار الموجودة اعلي بكتير من الأسعار المنطقية للسلع بحسب قوانين السوق النتيجة أن الحكومة بتضيع وقت كتير جدا في مواجهة ارتفاع الأسعار ودا بعد ما بقى الجشع والطمع هو اللي بيحكم الأسواق وظهرت في كل سوق مافيا وعصابات لاستغلال الحالة الاقتصادية في تحقيق مكاسب بالملايين ووصل الحال بالتجار انهم يعملوا جروبات على مواقع التواصل الاجتماعي وخاصة الواتساب عشان ينسقوا عمليات زيادة الأسعار ويسحلو المواطن بدون اي رحمة ودا للي اكتشفته الأجهزة المختصة في الأيام اللي فاتت وتحديدا في سوق البيض واللي شهد زيادات غير مبررة واتضح أن الموضوع كله لعبة من التجار واللي بقي بينهم تواصل لتحديد سعر الابيض من أول خروجه للمزرعة ولغاية ما يوصل السوبرماركت اللي تحت بيتك وتم إحالة اكتر من 21 تاجر من حيتان سوق البيض للنيابة العامة بتهمة الاحتكار والتآمر لرفع الأسعار.
للاسف اللي بيحصل في سوق البيض بيحصل في كل الأسواق التانية ولسه بيحصل زي سوق السكر واللي رجع يرفع تاني بعد ازمة كبيرة اخترعها التجار المسيطريين واللي اكتشفت لعبتهم وتم احالة العشرات منهم للأجهزة المختصة وطلع أنهم مافيا كبيرة بتضم تجار جملة وموزعين وأصحاب مصانع تعبئة ومسؤول كبير في التموين وغيرهم وكلهم اتفقوا على المواطن ودا للاسف بيقول إن التجار مبقاش حاجة بتهمهم غير المكسب حتي لو على حساب المواطن الغلبان وحتي لو الدولة في أزمة وخطر بسبب الأحداث الخطيرة اللي حوليها.
للاسف تاني ورغم كل الجهود اللي بيعملها الرئيس السيسي والحكومة للتخفيف من آثار الأزمات الاقتصادية لكن لسه مافيا الأسواق ايديها طويلة وبتفرض كلمتها ووصلت الزيادات لكل الأسواق مش الاكل والشرب بس لكن حتي لأسواق قطع الغيار واللي ولعت في الفترة الأخيرة.
ليه بنقول كده دلوقتي.. عشان حضرتك الموضوع زاد عن حده وتجار الأزمات بقوا عصابات زي ما قلنا وفي الوقت اللي الدولة بتحارب فيه عشان توفر السلع للناس بأسعار مناسبة تلاقيهم بيرفعوا السعر في أي وقت وعشان كده لازم الحكومة تاخد إجراءات قاسية ضد كل تاجر يثبت تلاعبه بالاسعار حتي لو وصلت لمصادرة بضاعته ووقف نشاطه التجاري وتغريمه مبالغ كبيرة تساوي قيمة اللي اخده من الناس من غير حق وبغير كده هتفضل الأسعار تزيد طالما التجار محدش بيحاسبهم بشكل رادع وهنسمع كل شوية مبررات جديدة لارتفاع أسعار السلع والخضروات والفواكه وغيرها.
