ليه الناس مابقتش تشتري لحمة؟.. اعرف السبب في الفيديو ده

يا ترى إيه سر تراجع المواطنين عن شراء اللحوم اليومين دول، هل بسبب ارتفاع أسعارها ولا في بدايل تانية الناس بقت تعتمد عليها، طب والأسعار امته هتنزل.. هنقولك كل التفاصيل في الفيديو ده. 
 

طبعا كلنا عارفين اننا كشعب مصري بنعشق أكل اللحوم وبنتفنن في طبخها بأشكال مختلفة، عشان كده نلاقي اللحمة أو مشتقاتها طبق دايم على سفرتنا كل يوم.

لكن في الفترة الأخيرة، الإقبال على شراء اللحوم الحمراء تراجع بشكل كبير، والجزارين وتجار اللحمة اشتكوا من قلة عمليات الشرا، لأن ده بيسبب لهم خسائر عشان الحال شبه واقف.

وانهاردة، سعر كيلو اللحمة في السوق ومحلات الجزارة  سجلت أسعار منخفضة نسبيا عن أسعار الشهور الأخير، وكيلو اللحمة البلدي سجل ما بين 320 و350 جنيه، كمان الكندوز سجل 400 جنيه للكيلو، وكيلو كباب الحلة اليوم 450 جنيه، أما "الجملي" فسجل هو كمان ما بين 300 و350 جنيه للكيلو.

وفي المنافذ الحكومية اللي بيتم طرح فيها لحوم بأسعار منخفضة عن السوق، سجل كيلو اللحمة البرازيلي 280 جنيه، والهندي 290 جنيه، والريش الضاني ما بين 380- 420 جنيه، كمان المفروم البلدي بيبدأ من 240 جنيهًا إلى 300 جنيه للكيلو.

ونقدر نقول إن تراجع إقبال المواطنين على شراء اللحوم الحمراء،  خلال الفترة الحالية، بيقف وراه أسباب كتيرة، واللي منها انخفاض أسعار الفراخ، عشان كده الناس اتجهت لشراء الدواجن لأنها الأرخص.

كمان من ضمن الأسباب، هو ثقافة المستهلك في الفترة الحالية اللي بتتجه للحوم البيضاء أو الفراخ عشان أسعارها منخفضة مقارنة باللحوم الحمراء.

طب بالنسبة لتوقعات أسعار اللحمة في الفترة الجاية.. إيه؟

كل توقعات السوق بتقول إن الأسعار هتفضل مستقرة، على حالها كده، لمدة ماتقلش عن شهرين.. فلو أنت من عشاق اللحوم الحمرا، أطمن على أسعارها.

وبالمناسبة، هنقدملك شوية نصائح وأنت بتشتري لحمة عشان تشتري حاجة نضيفة وماتتخمش، أول حاجة حضرتك لازم تشتري من جزار موثوق عشان تضمن جودة اللحمة وماتحطش فلوس على الفاضي، كمان اتجنب انك تشتري لحمة معروضة ومكشوفة خارج محال الجزارة

كمان لازم اللحمة تكون متماسكة ولونها وردي مش لون غامق، ولو فيها دهن لازم يكون لونه أبيض أو مايل للون الأصفر، 

اوعي تشتري لحمة لونه مايل للرمادي لأنها بتكون فاسدة، وكمان لازم تكون الأختام بتاعتها واضحة، وطبعا خليك ناصح وماتشتريش لحمة لها ريحة غريبة.