بشاير بن زايد.. إيه اللي هيحصل في ملف الغاز المصري
هي الامارات ناوية على ايه في قطاع الغاز المصري وايه سبب الرغبة الكبيرة من الجانب الاماراتي للدخول في مشرعات الغاز وإزاي ده هيفرق كتير في الملف دا بالذات وايه علاقة دا باللي حصل في نهاية يوليو اللي فات
زي ما احنا عارفين العلاقات المصرية الاماراتية ليها وضع خاص ومكانة كبيرة في الدولتين وتكاد تكون علاقة نموذجية بين الدول الاشقاء والحقيقة العلاقة دي حط أسسها مؤسس الامارات الحديثة الشيخ الراحل زايد بن نهيان واللي وصى ولاده خير من بعده بمصر وكان ليه مواقف كتير جدا في دعم مصر في أصعب الظروف وفضلت العلاقة بين البلدين تكبر وتنمو وتزدهر في عهد الشيخ محمد بن زايد واللي بيعتبر من أكتر الزعماء العرب مساندة لمصر تنفيذا لوصية والده الراحل واللي قاله إن قوة مصر من قوة العرب وضعفها يعني ضعف العرب وانتهاء أمرههم.
وكلنا ملاحظين على مدار السنيين اللي فاتت حجم التعاون والمواقف الاماراتية لمساندة مصر اقتصاديا على وجه الخصوص ودا بيظهر من حجم الاستثمارات الاماراتية الجديدة والضخمة في مصر بدأت بمشروع راس الحكمة واللي كان ليه تأثير كبير جدا في إن مصر تعبر عنق أزمة عاصفة في سوق الدولار والصفقة دي استثماراتها النهائية بتوصل 150 مليار دولار وهي أكبر صفقة استثمارية في تاريخ مصر كله وأنقذت الموقف الحقيقة وكانت بتوجيه مباشر من بن زايد.
بعد راس الحكمة انهالت المليارات الاماراتية على مصر وزار الشيخ محمد بن زايد العلمين الجديدة في أخر يوليو اللي فات في زيارة كان ليها فضل كبير في الترويج للمدينة المصرية الواعدة وهناك استقبله الرئيس السيسي وتجول بيه في انحاء العلمين الساحرة وحصلت محادثات بين الرئيسين وقلنا وقتها وهنا في بانكير إن التعاون المصري الاماراتي بعد الزيارة دي هينتقل لمستويات تانية خالص وانها هتكون زيارة خير وكلها مفاجات ودا اللي حصل.
شوف حضرتك بعد زيارة بن زايد لمصر اتفتح الكلام عن الاستثمارات الاماراتية الضخمة في قطاعات كتيرة في الاقتصاد المصري اهمها ملفات الصناعة، والطاقة، والكهرباء، والاستثمار، وفعلا الدكتور سلطان الجابر وزير الصناعة الاماراتي زار مصر ومعاه وفد رفيع المستوي لبحث الأجندة الصناعية في مصر وتوجيه الاستثمارات الاماراتية في القطاع الحيوي دا واللي مصر بتخطط إنها تقلب بيها الموازين في السنين اللي جاية وقال الجابر إنه تم الاتفاق على تخصيص الأراضي للصناعة المصرية الإماراتية والبداية مع مشروعين مهمين جدا الأول عبارة عن مشروع تصنيع الألواح الشمسية، والتاني مشروع البطاريات لتخزين الطاقة المتجددة، وإن فعلا فيه دلوقتي شراكات مع مصنعين كبار وإن الامارات على استعداد لدراسة أي مشروعات تانية مع الفريق كامل الوزير وزير الصناعة والنقل بما يخدم استراتيجية الصناعة في مصر يعني الامارات هتكون ضهر مصر القوي في ملف الصناعة.
المسئول الاماراتي قال أكتر من حاجة مهمة لازم نوقف عندها أولها لما قال إن فيه توجيهات من القيادة السياسية بالامارات بإنجاز 4 جيجاوات في خلال سنة واحدو وأنه جار العمل لتنفيذ رغبة الشيخ بن زايد وفيه حاجة تانية مهمة قالها المسئول الاماراتي وهي إن الامارات عندها رغبة قوية لتطوير عدد من مشروعات الغاز.. ودا الكلام المهم في الوقت المناسب لان مصر دلوقتي في مفترق طرق بالنسبة لقطاع الغاز وشفنا ازاي اتحولت من التصدير للاستيراد في الغاز لأسباب كتير خارجة عن الارادة وازاي شغالة دلوقتي على خطط إنها ترجع تاني مركز للغاز في المنطقة ودا عن طريق مشروعات ضخمة للتنقيب عن الغاز من ناحية ومن ناحية تطوير الابار والحقول الموجودة وتحديث البنية الاساسية للقطاع دا وهنا هيجي دور الامارات واللي ممكن تشارك بجزء مهم جدا في تمويل مشروعات كبيرة في مجال الغاز الطبيعي سواء عن طريق التنقيب أو تطوير الحقول الموجودة أو نقل الغاز والاسالة وحاجات كتيرة تانية ممكن تغير شكل القطاع الغاز المصري.
