موعد سقوط الدولار أرضا في مصر

أكيد أي حد بيقولك الدولار هيوقع ومحدش هيحتاجه بتقول عليه دا انسان مش طبيعي.. لكن الحقيقة هو بيتكلم صح الدولار جايله يوم وهينتهي كعملة اسطورة في مصر.. إزاي بقي دا هيحصل .. لازم تقرأ التقرير دا للأخر وانت تعرف كل التفاصيل..
 

فيه دراسات عالمية كتير واستعرضنا بعضها هنا في بانكير في الساعات الاخيرة بتراهن إن الدولار فقد جزء كبير من هيبته العاالمية ولسه هيفقد أكتر وإن فيه حرب شديدة على العملة الامريكية من دول كتير جدا ومنها دول قوية اقتصاديا زي الصين وروسيا وغير الهند والبرازيل ودول تانية في اسيا شايفين إن الدولار بقي عقبة كبيرة في سبيل التنمية الاقتصادية في بلادهم ودي بسبب سياسة العقوبات المالية واللي بتفرضها الولايات المتحدة على الدول دي في اوقات كتيرة واللي سببت ليها خسائر ضخمة.
وقلنا إن الارقام كشفت تراجع مكانة الدولار في الاحتياطيات العالمية من 80 في المية تقرييا لأقل من 56 في المية دلوقتي والنسبة دي بتزيد  لان كتير من دول العالم بدأت تستبدل الدولار بالدهب في احتياطاتها النقدية ودا غير اسباب تانية كتير بتقول إن الدولار هينتهي كعملة رئيسية في العالم أجلا أم عاجلا خاصة مع تحركات دول البريكس الجادة لتقليل الاعتماد عليه كعملة بين الدول الاعضاء والبريكس قوة بشرية واقتصادية وتجارية دولية مخيفة زي ما احنا عارفين وكفاية فيها الصين والهند اللي عدد سكانهم يوازي نص سكان الارض كلها.
دا كله بيأكد إن الدولار عالميا عنده مشاكل كتير وإن كل الدول بقت تشوف مصلحتها فين وخاصة بعد الازمات العالمية المرتبطة بالدولار والانهيارات في اسواق المال واللي الاعتماد على العملة الامريكية بقي خطر.. طيب ايه الوضع في مصر وايه مستقبل الدولار..  مصر زي أي دولة بتدور على مصلحتها فين وامكن هي أكتر دولة من مصلحتها الدولار يفقد قوته لانها بتدفع فاتورة غالية كل سنة بسبب ارتفاع الفايدة على العملة الامريكية سواء فوايد ديون أو في فاتورة الاستيراد أو دفع مستحقات الشركات الاجنبية وأي زيادة في سعره بيكلف الحكومة المصرية مبالغ كبيرة ودا غير إن الموارد المتاحة منه بيحصل فيها مشاكل في اوقات كتير بسبب الظروف اللي في المنطقة زي ما حصل قبل كده في قطاع السياحة وتحويلات المصريين بالخارج وبيحصل دلوقتي في قناة السويس.
طيب مصر بتعمل ايه عشان تقلل اعتمادها على الدولار.؟ لو حضرتك متابع هتعرف إن مصر بقت عضو في البريكس واللي بتعد نظام مالي وسيستم دفع نقدي مستقل بين دول الاعضاء بعيد عن الدولار وغير اتفاقيات بيتم دراستها دلوقتي للاستغناء عن العملة الامريكية في التبادل التجاري بين اعضاء بريكس.. دا من ناحية من الناحية التانية مصر عندها خطط لتوفير أكتر من 300 مليار دولار صافي على الاقل كل سنة وبنسبة تزيد التلتين عن المطلوب من الدولار مقارنة بتدفقات العملة يعني مصر لو بتصرف 100 مليار دولار في السنة على الديون والاستيراد فهيكون عندها فائض 200 مليار دولار.
وطيب حضرتك مصر هتجيب الدولار دا منين؟ .. لو انت متابع بردوا هتلاقي إن الحكومة شغالة فعلا على تحقيق الرقم دا من خلال مشروعات توطين الصناعة وترشيد الاستيراد والتطوير السياحي وخلق مجتمعات وعالم تاني في الساحل الشمالي وغيره وحاجات كتير جدا واتفاقيات مع شركات عالمية لنقل صناعتها هنا لمصر ودا كله موارد دولار ثابتة في المستقبل القريب وطبعا لو مصر قدرت توفر ال300 ملياردولار في السنة سعر الدولار ساعتها هينزل الارض وفق قانون العرض والطلب.