مشروع إماراتي جديد هيقلب الموازين... بشاير بن زايد هلت

يا ترى إيه حكاية المشروع الإماراتي الجديد اللي ناوية دولة الإمارات العربية المتحدة تنفذه في مصر في الفترة الجاية، وكام قيمة الصفقة دي..ر وهل هتقدر تنعش الخزينة المصرية بدولارات كافية تعوض جزء من الأموال الساخنة اللي خرجت من الخزينة العامة الأسبوع اللي فات.. هنقولك كل التفاصيل في الفيديو ده. 
 

فاكرين لما قلنا إن زيارة الشيخ محمد بن زايد رئيس الإمارات العربية المتحدة هيكون فيها خير كتير جدا على البلدين وقلنا هنا في بانكير إن الزيارة هيكون وراها صفقات كتيرة في الفترة الجاية.. ايه اللي حصل..
بص يا سيدي، من كام يوم الفريق كامل الوزير، نائب رئيس مجلس الوزراء للتنمية الصناعية، ووزير الصناعة والنقل، التقى وفد إماراتي، من وزارة الصناعة والتكنولوجيا المتقدمة الإماراتية، واللي كان بيرأسه عمر السويدي، وكيل الوزارة.

واللقاء ده، كان هدفه بحث سبل تعزيز التعاون الاقتصادي والاستثماري المشترك بين مصر والإمارات، ومن هنا الإمارات أعلنت عن نيتها لتتفيذ مشروع ضخم وعملاق في مصر، وهو إقامة منطقة صناعية إماراتية كبيرة.

باختصار، المنطقة الصناعية الإماراتية دي هدفها تلبية احتياجات السوق المحلي والتصدير للأسواق الخارجية، وده ممكن يكون في منطقة شرق بورسعيد عشان هي طبعا بتتمتع بموقع جغرافي متميز وبترتبط بخط سكة حديد بيربط المنطقة دي بكافة أنحاء الجمهورية، وده هيسهل ربط المنطقة الإماراتية بموانئ البحر المتوسط.

والمنطقة دي هتشمل مشاريع إنتاج الطاقة الشمسية ومصنع لإنتاج معدات ومستلزمات إنتاج طاقة الرياح زي المراوح والتوربينات، ومحطات معالجة مياه الصرف الصحي وتحلية مياه البحر، ومجمع لتصنيع الألومنيوم.

كامل الوزير طبعا، اقتنع بكلام الوفد الإماراتي، وأكد له أنه هيوفر له كل التسهيلات عشان المشروع ده يتنفذ بأقصى سرعة، خاصة وأن مصر بتستهلك محليا حوالي 500 مليون دولار من هذه الصناعة عشان تلبي احتياجات التصنيع للسوق المحلي لتلبية احتياجات المنشآت التجارية والسكنية والفنادق، ومصنع كبير لإنتاج السيارات للتصنيع للسوق المحلي، كمان المشروع ده هيوفر فرص عمل بالآلاف للشباب، يعني هيشغل الناس وينعش الاقتصاد في وقت واحد.

وقال كمان إن إقامة هذه المنطقة تأتي في إطار توجيهات الرئيس عبد الفتاح السيسي والشيخ محمد بن زايد آل نهيان رئيس دولة الإمارات لتعزيز التعاون الصناعي والاستثماري بين مصر والإمارات والبناء على العلاقات الراسخة بين البلدين في مختلف المجالات.

ووجه الوزير بالتنسيق مع باقي الجهات المعنية للنظر في إمكانية استفادة المنطقة الصناعية الإماراتية الجديدة من الإعفاءات الجمركية المتاحة، وكمان تيسير استيراد هذه المصانع لمستلزمات إنتاجها وتخفيض تكلفة الإنتاج، لأن ده استثمار حقيقي للبلد وهينعش الخزينة العامة للدولة بملايين الدولارات سنويا، وكمان هيعوض الخسائر اللي حصلت الفترة الأخيرة من خروج الأموال الساخنة من حزينة الحكومة المصرية.