جنون الدهب.. إيه اللي حصل في الصاغة وإيه مصير الأسعار

 إيه اللي حصل في سوق الصاغة في الساعات الأخيرة وليه الاسعار قفزت 100 جنيه مرة واحدة وفي يوم أجازة كمان وإيه مصير الأسعار في الايام الجاية وهل لسه فيه فرصة للاستثمار في الدهب.. تابعونا هتعرفوا كل التفاصيل في الفيديو ده..

اللي حصل في الساعات الأخيرة في سوق الدهب واقتراب عيار 21 من حاجز الـ4 الاف جنيه بيأكد اللي قلنا عليه هنا في بانكير خلال تقارير كتيرة قلنا فيها إن الدهب طالع ومش نازل ومن هنا لغاية 2026 ودا كلام أغلب المؤسسات المالية الدولية وخبراء الدهب في مصر والعالم وتوقعات وبيانات وحركة سوق وعرض وطلب وتحركات بنوك مركزية مهمة حولين العالم.. 
اللي حصل في الساعات الاخيرة إن سعر جرام الدهب زاد في مصر بأكتر من 100 جنيه شامل الضريبة والمصنعة وعيار 21 دخل على 3500 جنيه وسجل في أخر تحديث 3485 جنيه وسجل عيار 24 حوالي 3982.75 جنيه أما عيار 18 فسجل 2987.25 جنيه واقترب سعر الجنيه الدهب من 28 ألف جنيه لو ضفنا المصنعية والضريبة النهائية والارقام بتقول إن الاسعار قفزت بشكل خطير في ختام تعاملات الجمعة بالذات وان سعر الدهب في مصر ارتفع لأعلى مستوى من ساعة شهر فبراير اللي فات.. 
طيب ايه سر ارتفاع الدهب في الساعات الأخيرة؟
شوف حضرتك سوق الدهب في مصر مش بعيد من اللي بيحصل حولينا في المنطقة والعالم واللي الاسعار فيه رفعت بسبب زيادة مخاطر التوترات اللي حولينا ودا اللي حذر منه الدكتور مصطفي مدبولي رئيس الحكومة يوم الخميس اللي فات وقال مش عارفين بكرة هيحصل فيه إيه لأن مصر في قلب منطقة مليئة بالصراعات الساخنة وأي زيادة في التوتر بتتأثر  بيها الاسواق العالمية  والمصرية بشكل مباشر.
كمان ساهم صعود الدولار من منتصف الاسبوع اللي فات في نشر حالة من الترقب في سوق الدهب ومع انخفاض قيمة الجنيه زادت علميات شراء المعدن الأصفر كنوع من التحوط وكملاذ آمن ضد مخاطر انخفاض قيمة الجنيه وكل اللي عنده مدخرات أو مبلغ سيولة اشتري بيه دهب عشان يحافظ على قيمة فلوسه.

طيب ايه السبب الضغط على الدولار في الايام الاخيرة؟
الدولار سعره رفع نسبيا بسبب خروج استثمارات من أسواق السندات الحكومية واتجاهها إلى أسواق السندات الحكومية الأمريكية مرتفعة التصنيف الائتماني، لكن حجم الاستثمارات الساخنة اللي خرجت كانت بنسبة قليلة جدا زي ماقال رئيس الحكومة.
وبالنسبة لمستقبل سوق الصاغة في مصر.. فزي ماقلنا دا مرتبط باللي بيحصل في الاسواق الدولية وكل التوقعات تقريبا بتقول إن اسعار المعدن الاصفر هتستمر في الصعود لغاية 2026 وإن سعر الاوقية هيسجل 2500 دولار خلال الربع الاخير من السنة الحالية وهيستمر في الصعود على مدار 2025 واللي وصفه الخبرا بأنه هيكون عام الدهب بلامنازع..
وزاي ما قلنا فيه اسباب كتير لارتفاع اسعار الدهب عالميا منها الصراعات الاقليمية والعالمية واتجاه بنوك مركزية عالمية لعمليات شراء واسعة للمعدن الآمن لتأمين احتياطياتها من النقد بعد اقتراب بنك الاحتياطي الفدراالي الامريكي من خفض سعر الفايدة.
لو بتفكر تستثمر فلوسك في الدهب فده الوقت المناسب حضرتك لأن كل ماتستن الأسعار هتزيد أكتر وبالتالي تكلفة شراء الدهب هيزيد عليك.