الإمارات اشتغلت والسعودية قربت وقطر وعدت.. خريطة المليارات الخليجية في مصر
ياترى الاستثمارات الخليجية في مصر رايحة على فين ووصلت لكام دلوقتي.. ومين أكبر دولة بتستثمر من دول التعاون الخليجي في السوق المصري.. ولغز الاستثمارات القطرية وكمان الاستمثارات الخليجية بتروح فين.. تابعونا في الفيديو للأخر عشان التفاصيل
في عالم الاستثمار والبيزنس الدولي والاقليمي مفيش مكان لعواطف ولا مجاملات لكن فيه مصالح هي اللي بتحكم لأن في النهاية فلوس الاستثمارات دي بتكون فلوس شعوب والحكام مايقدروش يصرفوها في أي مجال مايجبش عائد ولا مكسب.. وخلينا نقولها على بلاطة مصر لو دولة ما اتعملش فيها بنية تحتية حديثة زي اللي حصلت دي مكانش حد هيجيلك ويستثمر مليارات الدولارات عندك ولسه مصر خدت ترتيب رقم واحد في أكتر الاسواق الجاذبة للاستثمار في شمال افريقيا.
لكن في نفس الوقت العلاقات بين الدول وحالة الاستقرار بتلعب دور كبير جدا في تحفيز الاستثمارات واللي أحيانا كتيرة بيكون ليها بعد قومي بيخدم الدولتين ودا اللي بيحصل في الاستثمارات الخليجية في مصر واللي بتحقق أكتر من هدف بين الدول أولها زيادة التعاون وعمق العلاقات بين الدول العربية وفي نفس الوقت التعاون دا بيصب لصالح أمن واستقرار الدول العربية كلها وكمان الاستثمارات الخليجية في مصر وفق مقايسس الاستثمار العالمي من أكتر الاستثمارات اللي بتكسب وتحقق عائد.. يعني باحتصار السوق المصري أحسن وأفضل من غيره كتير في اسواق الاستثمار التانية حتى في اوروبا وأسيا يعني من الاخر كده الاستثمارات الخليجية في مصر لمصلحة الكل ومفهاش جمايل.
طيب ايه أكتر دولة خليجية بتسثمر في مصر دلوقتي؟
طبعا الامارات العربية المتحدة هي أكبر مستثمر عربي وخليجي في مصر حاليا بعد صفقة راس الحكمة واللي بيوصل اجمالي اسثتماراته النهائية حوالي 150 مليار دولار ودفعت منها 35 مليار دولار كاش ماني للحكومة المصرية ودا غير المشروعات الاماراتية التانية في مصر وفيه مسول إماراتي رفيع المستوى وهو الأمين العام لمجلس الإمارات للمستثمرين بالخارج قدر حجم الاستثمارات الإماراتية في مصر بعد صفقة رأس الحكمة بحوالي 65 مليار دولار.
المفاجأة بقي إن الإمارات كده احتلت المركز الأول في الاستثمارات الحليجية في مصر واللي احتفظت بيه المملكة العربية السعودية لسنين طويلة وكانت المملكة المستثمر الأول عالميا وعربيًا في مصر باستثمارات تزيد على 55 مليار دولار قائمة بالفعل، وفيه أكتر من 6225 شركة صناعية سعودية شغالة في مصر باستثمارات تبلغ 30 مليار دولار.. الجديد في الاستثمارات السعودية الجديدة إنها بدأت تهل والبداية في مشروعات الربط الكهربائي بين الدولتين وهو مشروع مهم جدا وكمان اعلان المملكة نيتها تحويل الودايع السعودية في مصر لاستثمارات كبداية لانطلاقة سعودية قوية في الاسواق المصرية.
وبالنسبة للاستثمارات القطرية في مصر فسبق وأكد وزير الصناعة القطري محمد بن حمد آل قاسم، في نوفمبر 2023 أن قطر بتسعى لتعزيز التعاون الثنائي مع مصر، وتطوير العلاقات بين البلدين وإن الدوحة بتسعى لاستكشاف فرص الاستثمار في مصر بما يضمن تحقيق الازدهار بين البلدين وقال ساعتها إن قطر من أكبر المستثمرين في مصر بنحو 5.5 مليار دولار في عدد من القطاعات على رأسها القطاعات المالية والعقارية والحقيقة لسه مشفناش مشروعات ولا صفقات قطرية كبيرة في مصر رغم التصريحات القطرية واللي أكدت إنه هيكون فيه تعاون استثمارات ضخمة في مصر خاصة في قطاعات الصناعات والأدوية والتشييد والبناء.
طبعا الاستثمارات الخليجية دي بتكون لصالح الدول اللي بتستثمر ومصر بتستفاد إنها بتعمل تنمية ومشروعات وتوفير فرص عمل من فلوس الغير ومن غير تكلفة والمستثمر هو اللي بيعرض المشروعات اللي عاوز يعملها أو بيختار من المشروعات اللي الدولة عارضها في خريطة الاستثمار.
