مؤامرة على الجنيه.. تلميحات صندوق النقد تربك سوق الصرف

فيه حاجة غريبة جدا بتحصل فى سوق صرف العملات الأجنبية فى اخر كام يوم وتحديدا من بعد موافقة صندوق النقد على المراجعة التالتة لبرنامج الاصلاح الاقتصادي وصرف شريحة جديدة من قرض ال 8 مليار دولار.. وبدل ما سعر الدولار يهدا والأمور تستقر اللى حصل العكس وسعر العملة الأمريكية كل يوم بيزيد.. فيا ترى ايه اللي بيحصل في كواليس سوق صرف العملات الأجنبية ؟ وايه التلميحات اللى قالها مسئولي الصندوق خلت الدولار يرجع يزيد من تاني؟

في ردود سريعة على تلميحات صندوق النقد الدولي بشأن ضرورة الاستمرار في تطبيق نظام الصرف المرن سجل الدولار ارتفاعات مفاجئة مقابل الجنيه المصري في التعاملات الأخيرة.

وسجل متوسط سعر صرف الدولار في البنوك المصرية نحو 48.54 جنيه للشراء، و48.64 جنيه للبيع. وهذا أعلى سعر منذ شهر مارس الماضي، بعد تعويم الجنيه. ولدى البنك المركزي المصري، استقر سعر صرف الدولار عند مستوى 48.33 جنيه للشراء و48.47 جنيه للبيع.

وارتفع سعر صرف العملة الأمريكية إلى مستوى 48.54 جنيه للشراء و48.64 جنيه للبيع في بنوك الأهلي المصري وبنك مصر.

وجاء أعلى سعر لصرف الدولار مقابل الجنيه المصري في بنوك الأهلي المتحد ومصرف أبوظبي الإسلامي عند مستوى 48.62 جنيه للشراء، و48.72 جنيه للبيع.

وبعد إقرار المراجعة التالتة الخاصة ببرنامج التمويل المصري، شدد صندوق النقد الدولي على أهمية الحفاظ على نظام سعر صرف مرن لتجنب تراكم الاختلالات الخارجية.. وقال ان فيه حاجة إلى نهج يعتمد على البيانات من قبل البنك المركزي لخفض توقعات التضخم ومعدلاته.

وأكد مسئولي الصندوق إن جهود الضبط المالي المستمرة هتساعد على وضع الديون العامة على مسار هبوطي حاسم.. وقالوا عشان مصر تضمن استمرار الموارد اللازمة  لتلبية احتياجات الإنفاق الحيوي  بما فيها الصحة والتعليم لازم يكون فيه اهتمام خاص لتعزيز تعبئة الإيرادات المحلية واحتواء المخاطر المالية من قطاع الطاقة.

طب ازاى الصندوق بيطالب بتطبيق سعر صرف مرن .. هلى الحكومة مش طبقته من مارس 2024 ؟

بص يا سيدي بالفعل البنك المركزي وفى اجتماع استثنائي للجنة السياسة النقدية قرر فى 6 مارس اللى فات تحرير سعر صرف الجنيه قدام العملات العربية والأجنبية وقال ان سعر العمل هيتحدد وفقا لاحتياجات السوق وقوانين العرض والطلب ومن يومها قفز سعر الدولار من 31 الى حدود 49 جنيه حاليا والبنك المركزي حاليا مش بيتدخل فى سعر الجنيه لكن الصندوق عاوز السياسة دي تستمر وعنده مخاوف ان الدولة ترجع تحط ايدها تانى فى سوق الصرف

بس التلميحات اللى اتقالت من مسئولى الصندوق عملت ربكة غير مبررة وادت انطباع ان مصر مش بتطبق سعر صرف مرن وخلت البعض يكون عنده مخاوف ان الدولار هيرتفع الايام الجاية فحل صلب متزايد على شراء العملة الأمريكية وده السبب فى الزيادات اللى حصلت فى سعر الدولار الفترة اللى فاتت