تفاصيل فتح حساب توفير الشباب مجانا من بنك مصر.. شوف حساب الفايدة

ايه حكاية حسابات التوفير الجديدة من بنك مصر للشباب وايه ميزتها وليه البنك طرحها دلوقتي وليه خلاها مجانية وياترى إيه أنواع الفايدة فيها أو العائد.. كل ده هنعرفه مع حضراتكم في التقرير التالي  ده تابعونا للاخر

بنك مصر من أكبر البنوك اللي في البلد وبتقدم خدمات بنكية متطورة وبيشارك بقوة في كل المبادرات اللي بتستهدف تحسين أحوال المواطنين وفئات المجتمع المختلفة خاصة محدودي الدخل والشباب كمان لأنهم هما مستقبل البلد دي وأخر دعم بيقدمه بنك مصر للشباب هو إتاحة فتح حساب توفير الشباب للعملاء اللي بتتراوح أعمارهم بين 16 و35 عامًا، وفتح الحساب مجانًا على فكرة من غير ماتدفع ولا مليم ولا رسوم ومش هياخد منك دقايق في البنك.

وبخصوص تفاصيل فتح حساب الشباب المجاني في بنك مصر فلازم تعرف إن الحد الأدنى للرصيد في الحساب الجديد مش هيكون أقل من 500 جنيه.

وعلى فكرة أغلب البنوك المصرية بتستعد لفتح الحسابات مجانا و بدون حد أدنى بداية من الخميس الجاي ولغاية 15 أغسطس تزامناً مع اليوم العالمي للشباب واحتفالية الشباب ودي فرصة كبيرة لأي شاب بيفكر يكون ليه حساب في البنك..

طيب نرجع لبنك مصر إيه هو سعر العائد أو الفايدة على حساب توفير الشباب..
شوف ياسيدي بحسب جدول أسعار العائد من بنك مصر على الموقع الرسمي لشهر يوليو 2024، فإن العائد الشهري بيطبق على مبلغ من 500 جنيه إلى 20 ألف جنيه، وبيكون بنسبة 12% سنويًا، والعائد الربع سنوي على نفس الشريحة وبيوصل إلى 12.25%، والعائد النصف سنوي يبلغ 12.375%، والعائد السنوي 12.50%.

وبالنسبة لما يزيد عن مبلغ 20 ألف جنيه، فيحتسب العائد حسب شرايح حسابات التوفير المعلنة في وقتها.

وبيتيح البنك على حساب توفير الشباب إمكانية إصدار بطاقة خصم فوري للسنة الأولى مجانًا، مع إمكانية الاستعلام عن الحسابات وتنفيذ معظم المعاملات البنكية مجانًا، من خلال خدمة الإنترنت البنكي، وتطبيق الهاتف المحمول المقدمة من بنك مصر.

والحساب كمان بيكون متاح للعملاء من سن 16 عامًا فأكتر للتعامل على الحساب، من حيث شراء الشهادات أو الودايع، أو إجراء مجموعة من المعاملات البنكية المختلفة.