عيار 21 هيوصل لسعر خيالي.. الدهب رايح على فين الشهور الجاية
يا ترى أسعار الدهب رايحة على فين، هل في ارتفاع جديد خلال الفترة اللي الجاية ولا هيحصل نوع من الاستقرار أو الانخفاض.. هنقولك كل التفاصيل في التقرير التالي.
ناس كتير بتابع أسعار الدهب كل يوم، لأن أغلب المصريين شايفينه الملاذ الآمن للادخار، بمعنى لما يكون معاك فلوس وعايز تحوشها أول حاجة بتفكر فيها هي شراء الدهب، لأنه مبيخسرش ومع الوقت قيمته بتتضاعف.
لكن السوق المصري حاليا بيشهد نوع من التذبذب في أسعار الدهب، أسبوع ارتفاع، والأسبوع اللي بعده انخفاض، طب يا ترى النصف التاني من سنة 2024، مخبي إيه، وأسعار الدهب فيه رايحة على فين؟
بص يا سيدي، انهاردة السبت الموافق 27 يوليو 2024، أسعار الذهب استقرت، وعيار 21،اللي هو الأكثر إقبالا وشيوعا، سجل 3260 جنيه للجرام، وبالتالي المعدن الأصفر عوض بعض الخساير اللي تكبدها من حوالي أسبوع، وده بعد تعافي السعر بالأمس تأثرا ببيانات التضخم الأمريكية.
وبالنسبة لأسعار الدهب في مصر بنهاية سنة 2024 ، فوفقا للخبراء، فالأسعار رايحة على ارتفاع، ومن الممكن أن عيار 21 يسجل 4 آلاف جنيه بنهاية السنة دي.
كمان، كشف تقرير لمؤسسة "جولدن بيليون" العاملة في مجال أبحاث وتقارير الذهب، أن في تراجع في سعر الذهب العالمي خلال تداولات الأسبوع الماضي، وذلك للأسبوع الثاني على التوالي، في ظل عمليات التصحيح في سوق المعدن الأصفر لجني الأرباح بعد تسجيل الذهب لمستوى تاريخي جديد خلال الأسبوع السابق.
لكن في توقعات أن أسعار الذهب هتحقق أرباح على المدى القريب بدعم من توقعات الأسواق، وقيام البنك الفيدرالي الأمريكي بخفض الفائدة مرتين هذا العام، وكان سعر أونصة الذهب العالمي خلال الأسبوع الماضي، وصل بالقرب من مستوى الدعم 2350 دولار للأونصة، ليدفعها إلى الأعلى بعض الشيء ليغلق الذهب تداولات الأسبوع بالقرب من المستوى المحوري 2400 دولار للأونصة.. لذلك يظل الاتجاه العام للدهب صاعد طالما يتداول فوق المستوى 2280 دولارًا للأونصة.
وانعكاس الكلام على سوق الدهب المحلي في مصر، فنقدر نقول أن كل التوقعات لأسعار الدهب بنهاية السنة دي، متجهة للارتفاع، ومن الممكن أن يتخطى عيار 21.. ال 4 آلاف جنيه.
