صدمة الدولار وخدعة صندوق النقد ووهم السوق السوداء.. كامل الوزير يبدأ رحلة المليون ميل

 

متابعينا الكرام في كل مكان أهلا وسهلا بكم وتحليل جديد لأهم التقارير والابحاث اللي قدمتها وحدة أبحاث بانكير على مدار الساعة النهاردة الأحد 21 يوليو 2024
 
البداية مع تقرير مهم جدا عن اللي حصل النهاردة في البنوك وصندوق النقد الدولي ومحاولة إثارة الفوضى في سوق الصرف.

وقال التقرير إنه النهاردة انتشرت اشاعات كتير وكلها بتضرب تحت الحزام وخاصة الاشاعات عن ارتفاع سعر الدولار وعودة ظهور السوق السودا للعملة من تاني 
وشرح التقرير إن الاخبار الكاذبة دي خرجت من منصات سوشيال ميديا تابعة لتجار عملة واطراف تانية كلنا عارفينها كل همها نشر الفتن والاكاذيب وكل همهم نشر الاشاعات والاكاذيب والتصريحات المزيفة عشان يربكوا سوق الصرف.
ولفت التقرير إنه من غباء تجار العملة انهم مش عارفين يستوعبوا طالما فيه سعر حر للدولار عمر السوق السودا ماهترجع تاني وكمان مفيش مجال أصلا انها ترجع لأن باختصار مفيش أزمات أصلا في الطلب على العملة الامريكية ومفيش مستورد واقف على عملة ولا فيه شحنات محجوزة في الجمارك ومصر بتسدد ديونها بانتظام وبالعكس التدفقات الدولارية شغالة كويس جدا وكل التوقعات العالمية بتقول إن الدولار هينزل لمستوى أقل من 45 جنيه.
وشرح بانكير إن منصات الشر نشرت خبر تاني أو اشاعة بمعنى اصح حولين استبعاد مصر من جدول اعمال صندوق النقد الدولي يوم 29 يوليو الجاري والخبر لف مصر وللاسف خدته مواقع وصفحات كتير من غير ماتكلف نفسها وتتأكد من الخبر أو حتى تدخل على صفحة الصندوق نفسها والمتاحة لكل الناس لكن طبعا المواقع والمنصات دي ماصدقت كتبت الخبر وانتشر زي النار في الحطب..
وقال التقرير إنه مع الخبر المزيف كان فيه بهارات كتير زي إن الصندوق استبعد مصر من صرف الشريحة التالتة وإن الصندوق ليه شروط جديدة لازم الحكومة المصرية تنفذها زي رفع أسعارالوقود ورفع الدعم عن باقي السلع وخروج الحكومة من كل الشركات وطبعا مفيش حاجة من ده حصلت والصندوق مشالش ولا استبعد اسم مصر من جدول اعماله اللي جاي لكن طبعا المطلوب دلوقتي إن الاشاعات تغرق البلد وتنتشر عشان يحصل اقتناع في الاسواق ان الدولار هيرجع يقفز ومحدش هيلاقيه وهنا يبدأ تجار العملة يلموا الدولار اللي في السوق ويخزنوه عشان يرجعوا يبيعوه  ويكسبو ملايين الجنيهات.
 

التقرير التالي اللي نشرته منصات بانكير كان خاص لغز ارتفاع الدولار أمام الجنيه النهاردة في البنوك
وشرح بانكير إن سعر الدولار رفع النهاردة على غير العادة في أول التعاملات وتراوحت الزيادة بين 9و15 قرش وسجل 48.33 جنيه وبيقترب من حاجز ال49 جنيه وعشان نفهم ليه الدولار بيزيد لازم نعرف إنه هو نفس السبب اللي بيخليه ينزل وهو قانون العرض والطلب لأن سوق العملة حر دلوقتي بعد قرار البنك المركزي المصري بتحرير سعر الصرف أو التعويم.

وشرح التقرير بالتفصيل العوامل اللي بتتحكم في سعر الدولار نزولا وصعودا وأولها العرض والطلب بجانب أسباب تانية خارجية زي التوترات الجيوسياسية بمنطقة الشرق الأوسط واتساع نطاق التوتر بالمنطقة زي ماشفنا في الساعات الأخيرة وتراكم الطلب على الدولار بسبب أجازة البنوك، في نفس الوقت  أشار الخبراء إلى منافسة البنوك على جذب مدخرات المليونيرات عبر طرح شهادات ادخار مرتفعة العائد بحد أدنى مليون جنيه، ده كانت نتيجته جمع جزء من حصيلة تنازل المصريين عن الدولار في البنوك وشركات الصرافة.
ولفت التقرير لأسباب تانية بتتحكم في سعر الدولار وهو التأثر بارتفاع  سعر العملة الأمريكية عالميا أمام العملات الأجنبية ومنها الجنيه المصري بسبب تزايد الإقبال عليه نتيجة التوترات اللي قلنا عليها وده خلي فيه زيادة على الطلب على الدولار في السوق المحلي.

منصات بانكير قدمت تقرير مختلف النهاردة عن الاسعار في السوق وسر نزولها بشكل كبير رغم إن سعر الدولار هو نفسه أيام الوزارة القديمة
وشرح التقرير إزاي كانت وزارة التموين في عهد الدكتور مصيلحي سبب في تفاقم أزمة ارتفاع الاسعار بسبب قبضته الضعيفة على التجار الكبار وعدم سيطرة الوزارة على الاسواق والنتيجة خرجت الأمور عن السيطرة وكان كل تاجر بيرفع الاسعار مع نفسه وكل منطقة فيها أسعار مختلفة لنفس السلعة.. لكن من ساعة تشكيل الحكومة الجديدة والتطهير اللي حصل في وزارة التموين بعد فضايح الفساد اللي كانت فيها وكانت سبب في تصاعد أزمة الأسعار بدأت الأمور تعود للاستقرار بشكل تدريجي.

ولفت بانكير إنه بمجرد تولي الدكتور شريف فاروق وزير التموين والتجارة الداخلية المسئولية خلفا لمصيلحي ظهرت بركاته والاسعار نزلت ما بين 25 و30 في المية باعتراف الناس والغرف التجارية كمان يعني نزول حقيقي ودا مجاش من فراغ لكن اتحقق من المتابعة ومحاسبة التجار الكبار وخاصة تجار الجملة واللي كان ليهم دور سلبي في زيادة الاسعار والحملات ومواجهة الاحتكار وتوفير السلع في السوق وشغل تاني كتير اتعمل عشان الناس ترجع تشتري باأسعار معقولة بدل الفوضى اللي كانت قبل كده.

وشرح التقرير إن جزء كبير بردو من تخفيض أسعار السلع كان بسبب توافر الدولار في الفترة اللي فاتت واستقرار سعره وانتظام عمليات الاستيراد لكن في النهاية عامل الربط والحزم هو اللي حكم الاسواق وخلي التجار تخاف من الحساب والغراامات ووقف النشاط.

وبخصوص الجديد في ملف الاسعار قال بانكير إن اتحاد الغرف الصناعية دلوقتي وعشان يضمن الاسعار تستمر في النزول وتوافر السلع عمل حاجة اسمها ورقة عمل للتعاون مع الحكومة ودعم خططها، وهيتم عرض الورقة على الحكومة الفترة الجاية، وإن كل غرفة من الـ 27 غرفة عندها مركز عمليات بيتابع الأسواق بصفة يومية من خلال تقرير يتم إرساله للاتحاد العام لمعرفة السلع اللى تم تخفيضها بالأسواق.

 
التقرير الأخير معانا في تقرير النهاردة كان بخصوص روشتة كامل الوزير لحل أزمة المصانع المتعثرة

وقال التقرير إن الفريق كامل الوزير وزير الصناعة والنقل، أطلق خلال الأيام الأخيرة، مبادرة "مصنعك دايما شغال".

وإن الوزير من خلال المبادرة ، وجه الدعوة لجميع المصانع المتعثرة للتقدم للوزارة بأسباب التعثر عشان يقدر يحل مشاكلها فورًا.

وكشف الوزير عن ملامح خطته للتنمية الصناعية وحل مشاكل هذه المصانع، واللي حصلت على تصديق فوري من رئيس الوزراء، وتفاصيلها هي إعادة التشغيل ومساعدة المصانع المتعثرة وزيادة حجم النشاط وزيادة الطاقة الإنتاجية، وتقديم الدعم الفني للمصانع من خلال مساعدتها في الحصول على شهادات المطابقة الدولية.

ولفت التقرير إن الخطة الوزير بتشمل تشغيل العمالة بما يساهم في خفض معدلات البطالة، وده بينعكس على جودة الصناعة وتصديرها للخارج لجلب العملة الصعبة.

كامل الوزير أكد أنه تم التخطيط لتنفيذ هذه الخطة على أسبقيتين.. الأسبقية العاجلة هي التصديق الفوري على أي قرارات تساهم في حل أي مشاكل تواجه المصانع المتعثرة لسرعة تشغيلها في أقرب وقت، ده بالإضافة إلى طرح حوار مجتمعي ولقاءات مع أصحاب المصانع المتوقفة لدراسة سبل إعادة تأهيلها وتشغيلها