هو ده وقته.. ليه الحكومة عملت مشكلة السيارات دلوقتي
ايه اللي بيحصل في سوق السيارات الأيام دي وليه وزارة المالية سايبة المشكلة تكبر والسوق عطشان والاسعار ترجع تضرب تاني.. وامتي أزمة سوق السيارات هتنتهي .. عظه مبه هنعرفو في الفيديو ده خليكم معانا .
كلنا متابعين اللي بيحصل في سوق السيارات ولو روحت تشتري عربية دلوقتي زيرو ولا مستعمل هتلاقي سعرها في العالي وهتفتكر ساعتها الأسعار اللي كانت في ذروة أزمة نقص الدولار لما بقي سعر العربية من الخيال.. لكن الحقيقة مفيش أزمة دولار ولا حاجة والدولار برئ من اللي بيحصل في سوق العربيات دلوقتي.. طيب ايه الحكايه.. معروف إن الأزمة بدأت لما مصلحة الجمارك اكتشفت عمليات تلاعب في استيراد السيارات وخاصة سيارت ذوي الاحتياجات الخاصة المعفاة من الرسوم والضرايب والجمارك وقررت وقف الإفراج عن كل السيارات.
طيب مش أزمة سيارات المعاقين خلصت وبدأ فعلا الإفراج عن السيارات من المواني ؟.. للاسف ده محصلش بالشكل المطلوب وغير أن شحنات السيارات الجديدة من الخارج معطلة بسبب عطل أو تعطيل السيستم الخاص بتسجيل الواردات في المواني واللي نفت وزارة المالية أنه عطلان في الأول وفي الناحية التانية تجار ومستوردي السيارات بيإكدوا أن السيستم مش شغال. وفي النهاية المواطن بيدفع التمن لأن الأسعار بتزيد عليه هو بس وحصل فعلاً والاسعار رجعت تولع تاني في السوق زيرو ومستعمل ورجع الأوفربرايس.
الغريبة أن اللي بيحصل في المواني مع مشكلة السيارات المحتجزة تحديدا لازم نحط تحته الف خط لانه صنع أزمة كبيرة لقطاع لسه بيتعافي أصلا بعد سنة كاملة من التوقف نتيجة أزمة الدولار اللي كانت في 2023 واللي وصل ساعتها 70 جنيه ومحدش كان لاقيه وهل ياترى لازم الأزمة الحالية توصل رئيس الجمهورية عشان تتحل ولا الحكومة الجديدة هتتحرك وتحسم الأزمة وتحلها فورا مع الحفاظ طبعا على حقوق الدولة والتاجر أو المستورد اللي تلاعب وخالف القانون يتحاسب والقانون يمشي على الجميع.
عضو بشعبة السيارات باتحاد الغرف التجارية المصرية خرج من ساعات وقال إن تعطل السيستم وتوقف دخول السيارات تسبّب في شح السيارات بالسوق وبالتالي حصلت ولسه بتحصل قفزة في الأسعار، وكلام الراجل كل على الهواء مباشره في برنامج توك شو يعني مفيش أزمة بتستخبي وخلونا نعترف أن التعامل الرسمي في أزمة الجمارك والسيارات مكانش على المستوى المطلوب وفيه حاجة مش واضحة والتصريحات المتضاربة هنا وهناك مابقتش تصح لأن تضارب الكلام بيخلق أزمات اكتر في الأسواق وبيصعب المشكلة مش بيحلها.
