الثلاثاء 25 يونيو 2024
رئيس التحرير
عمرو عامر
المشرف العام
عبدالعظيم حشيش
تحليل

الفضة كنز استثمار وبينافس الذهب في المكسب

الثلاثاء 11/يونيو/2024 - 01:01 ص
الفضة
الفضة



ليه الفضة سوقها بيزيد والاستثمار فيها بيجري ورا الدهب وليه بتعتبر استثمار آمن زي الدهب ومكسبها مضمون.. اقرأ  للأخر وهتعرف ليه.

كتير من المصريين مهتمين بالفضة بشكل كبير وبقت هي الملاذ الآمن لحفظ فلوسهم واستثمارها بعد ارتفاع أسعار الدهب لمستويات قياسية والفضة معدن نادر بردو وليه سوق كبير عالميا وفيه توقعات مهمة لمعهد الفضة العالمي قال فيها إن أسعار الفضة هتوصل إلى أعلى مستوى ليها عند الـ 48 دولار أمريكي خلال 2024، لأن سوق الفضة زي الدهب بيتفاعل ويتأثر بالتوترات العالمية وتوقع المعهد أن يصل الطلب العالمي على الفضة إلى 1.2 مليار أونصة في سنة 2024، وهو ثاني أعلى مستوى مسجل.


واردات مصر من الفضة متوقع توصل 13.7 مليون دولار بحلول سنة 2026، بزيادة 5.1% على أساس سنوى عن عام 2021، ومن 1999 زاد الطلب المصرى على الفضة بنسبة 119.4%، وبلغت صادرات الفضة المصرية 228.65 كيلوجرامًا خلال سنة 2018 واحتلت مصر المرتبة 29 فى سنة 2021 من حيث الواردات.

طيب ليه الفضة معدن مهم في الاستثمار؟
ده لأن الفضة زي الدهب في اهميتها منها انها بتستخدم فى صناعات مختلفة زي صناعة المجوهرات والمشغولات المختلفة وقيمتها بتزيد مع الزمن لان المعرض بتاعها قليل ومحكوم مقابل زيادة مستمرة في الطلب وده بيديها ميزة مهمة جدا في الحفاظ على قيمة الأموال وزيادتها كمان.

طيب الفضة ليها أنواع وعيارات ولا ليها نظام خاص.
طبعا زي اي معدن الفضة ليها عيارات مختلفة ومنها عيار 925 وهى الفضة الإسترلينى اللي فيها 92.5% من الفضة ونسبة 7.5% من معادن تانية زي النحاس واللي بتديها متانة وقوة تخليها مناسبة لصناعة المجوهرات والأدوات الفضية.

وفي نوع الفضة المصرية التقليدية وهى الفضة بعيار 800 واللي فيها نسبة 80% من الفضة و20% من العناصر التانية اللي بيتم تصنيعها فى ورش العمل المحلية بشكل تقليدى،  واستخدامها فى صناعة المجوهرات والأدوات المنزلية وتتميز بتصاميمها المميزة والمحلية.

وفي الفضة المصرية عيار 999 وهى الفضة اللى بتوصل فيها نسبة الفضة 99.9% ونسبة 0.1% ، وهو العيار الخاص بالسبايك صاحب اعلى درجة من نقاء الفضة.

وفي عيار الفضة السويسرية 999 ودي فضة مستوردة تصل نسبة الفضة فيها 99.9% ونسبة 0.1% فقط من معادن أخرى، وتكون سعرها أعلى بفارق محدود من سعر الفضة المصرية 999.

إزاي استثمر في الفضة؟
ادخار الأموال فى الفضة بيكون من خلال السبايك والعملات الفضية، وتكون السبايك من الفضة عيار 999 وتبدأ أوزان سبايك الفضة من 10 جرام و20 جرام وأونصة الفضة وزنها (31.1 جرام)، وفيه سبايك بأوزان كبيرة ربع كيلو جرام ونص كيلو جرام و5 كيلو جرام و15 كيلو جرام.

أما عن العملات الفضية فأوزانها بتكون مماثلة لأوزان العملات الدهبية، وبيوصل وزن الجنيه الفضة إلى 8 جرام فضة ونصف الجنيه الفضة يكون وزنه 4 جرام فضة، وتكون عملات الفضة من عيار 925 لأن تشكيل الفضة على شكل عملات يحتاج إلى عيار أكثر صلابة مثل الفضة 925 مقارنة مع الفضة عيار 999 التى تستخدم فى السبائك فقط ونسينا نقولك إنه بيتم إضافة قيمة الدمغة والمصنعية والضريبة على سعر جرام الفضة كما هو الحال فى الدهب، وتختلف المصنعية والدمغة على حسب وزن السبيكة أو العملة.