إيه حكاية صفقة القرن الجديدة مع قطر.. هتعدي صفقة رأس الحكمة

 
 
هو إيه حقيقة اللي بيتقال عن صفقة جديدة ضخمة مع قطر  وتحالف مصري وهل صحيح هتكون اكبر من رأس الحكمة.. تعالو نشوف إيه الحكاية 
 
في الساعات الأخيرة فيه تسريبات وكلام كتير عن صفقة ضخمة بتتجهز دلوقتي في قطر وهتتنفذ في مصر وهتكون من ضخامتها أنها هتعدي قيمتها قيمة صفقة رأس الحكمة الإماراتية وإن التجهيزات وصلت لمراحلها الأخيرة وهتكون مع تحالف شركات مصري كله شركات من العيار التقيل.
ورغم إن لسه التفاصيل مش معروفة لكن المعلومات المتاحة بتقول إنه هيكون مشروع قرن جديدة في مصر وهيقلب الموازين وهتضرب في نفس الوقت سعر الدولار الأمريكي في سوق الصرف وإن فيه اتصالات على أعلي مستوى لسرعة الاعلان عن الصفقة القطرية الجديدة بعد تحسن العلاقات بين البلدين وزيادة التعاون بين مصر وقطر وهنا بنفكركم بكلام وزير المالية القطري من كام شهر لما قال إن قطر هتضخ مليارات الدولارات في السوق المصري في مشروعات استثمارية في كل المجالات سواء تجارية أو صناعية أو ترفيهية وده كان تعهد قطري واضح ساعتها والناس استغربت من تأخر الاستثمارات القطرية اللي تم التعهد بيها ويظهر جا وقتها.
الكلام المتاح أن الكيانات القطرية هتعمل مشروعات ضخمة في البنية التحتية واللوجستيات ومشروعات تجارية وترفيهية في مناطق ساحرة في سيناء وهتضخ فيها مليارات الدولارات وبالتعاون مع تحالف شركات يقترب من 100 شركة مصرية الدولة ليها نسب وحصص كبيرة في بعضها والهدف تحويل سيناء إلى سنغافورة مصر ومركز تجاري وترفيهي عالمي .
طيب ليه القطريين هيستثمرو في مصر دلوقتي..؟
شوف ياسيدي محدش بيرمي فلوسه في الأرض لكن كل مستثمر أو كيان اقتصادي أو حتى دولة بتشوف افضل الأسواق اللي ممكن تكسبها وتشتغل فيها وده مطابق للسوق المصري لانه عنده عوامل جذب كتيرة منها توافر العمالة الرخيصة والمدربة وفي نفس الوقت بيعتبر انخفاض أسعار العملة المحلية عامل جذب كبير للمستثمرين لانه بيعظم مكاسبهم وكمان بسبب تعدد الفرص في مصر وتوافر كل عوامل ومقومات الاستثمار الناجح ومش عاوزين ننسي صفقة رأس جميلة واللي بيتم التجهيز ليها في سيناء بردو وغالبا هتكون من نصيب السعوديين.