الثلاثاء 18 يونيو 2024
رئيس التحرير
عمرو عامر
المشرف العام
عبدالعظيم حشيش
شمول مالي

قبل ما تحط فلوسك.. اعرف الفرق بين الوديعة وحساب التوفير بالبنوك

السبت 08/يونيو/2024 - 03:30 ص
الفرق بين الوديعة
الفرق بين الوديعة وحساب التوفير

 


لو بتفكر تحفظ فلوسك في البنك ومش عارف الأفضل ليك الوديعة ولا حسابات التوفير هنقولك في الفيديو ده الفرق بينهم  والأفضل كمان شوف للأخر هتعرف التفاصيل

كتير مننا في الظروف دي بيفكر إنه يحط فلوسه الزيادة في البنوك لفترة طويلة عشان يستفاد منها خاصة لو الفلوس دي زيادة عن مصاريفه ومش محتاجها دلوقتي وبيدور عن أفضل طريقة يدخر بيها الفلوس وفي نفس الوقت ياخد منها فوايد كويسة وهنا بيحتار ياترى يحطها في حساب وديعة ولا حساب توفير لأنه مش بيكون عارف الفرق بينهم.
عشان حضرتك ماتحترش اللي بيحكم اختيارك بين الوديعة او حساب التوفير هو سعر الفايدة على الشهادات والودايع وحسابات التوفير، ودي نقطة مهمة جدا ومحورية عند البنوك واللي بتتنافس عليها لجذب مدخرات العملاء، وبتختلف معدلات الفايدة من بنك لآخر، وبيتم التحرك في الأسعار في حدود أسعار الفايدة اللي بيكون البنك المركزي أعلنها  بنسب تتراوح بين 0.5% إلى 1.5% ارتفاعا أو انخفاضا  وكمان حسب سياسة كل بنك، ونوعية العملا الي بتستهدفها، بجانب مستويات السيولة اللي بيحتاجها كل بنك، وأعباء التكلفة التشغيلية للفلوس دي.

طيب خلونا في سؤالنا إيه الفرق بين الوديعة وحساب التوفير في البنوك؟

في الأول نشوف نظام ودايع البنوك واللي بتعتبر وعاء ادخاري مهم جدا للأفراد وعادة سعر الفايدة على الوديعة بيختلف حسب مدتها وبتتراوح مدة الوديعة من يوم واحد ولغاية سنة وقد تمتد لـ10 سنين في الودايع طويلة الأجل.

كمان بيختلف  سعر الفايدة على الوديعة باختلاف المبلغ المودع، لأن لكل مبلغ بيتحط في الوديعة بيتم احتساب فايدة خاصة بيه مع الأخذ في الاعتبار مدة الوديعة، وكل ما زادت مدة الوديعة والمبلغ المودع زاد احتساب الفايدة وهكذا.

في الوديعة لا يتم ربط مبلغ محدد يعني تحط زي ما انت عاوز فلوس وتقدر كمان تكسر الوديعة في أي وقت وتاخد كل فلوسك اللي حطتها من غير خصم وبالنسبة لمدة صرف الفايدة من الودايع فبتتنوع بين يومي، شهري وربع سنوي ونصف سنوي 6 شهور، وسنوي  وعند استحقاق الوديعة يمكن للبنك أن يجددها إضافةً إلى العوايد المكتسبة، أو تقدر تحولها إلى حساباتك البنكية التانية

كمان بضمان الوديعة تقدر تاخد قرض من البنك نفسه وتقدر كمان تستخرج بطاقة ائتمانية أو فيزا مشتريات بضمان الوديعة.

أما بخصوص حساب التوفير فهي  حساب بنكي، غير محدد المدة وبيشترط لحصول صاحبه على فايدة بنكية على رصيد الحساب وجود حد أدنى معين يختلف من بنك للتاني، وكل ما زادت المبالغ هتزيد نسبة الفايدة.

وفي حساب التوفير بيتم احتساب الفايدة بداية الشهر التالي لإيداع النقود ويقدر صاحب الحساب سحب وإيداع المبالغ في أى وقت والبنك كمان هيديك فيزا صراف آلي ATM لسحب الفلوس والأرصدة من ماكينات الصراف الآلي وطبعا تقدر تسحب وتودع في اي وقت على الحساب وكمان استخدان الخدمات الالكترونية التانية للبنك وكشف حساب لو عاوز وده حقك.