الثلاثاء 25 يونيو 2024
رئيس التحرير
عمرو عامر
المشرف العام
عبدالعظيم حشيش
فيديو بانكير

طول ما هي كاش هتخسر.. استثمر فلوسك قبل السوق ما يأكلها

الخميس 06/يونيو/2024 - 05:02 ص
الفلوس
الفلوس



ليه الكاش بقي مش مضمون وليه انك تستثمر فلوسك احسن ما تسببها سايلة وقيمتها بتقل وايه الحاجات اللي ممكن تشغل فلوسك فيها وليه الخبراء بينصحوك تشغلها.. تعالى نقولك السبب والتفاصيل في الفيديو ده 
 

معروف دلوقتي أن فلوسك لو سايبها كاش كده من غير ماتستثمرها هتخسر  في الغالب بسبب استمرار ارتفاع أسعار السلع والقرارات الاقتصادية الخاصة بالدعم وزيادة اسعار المواد البترولية المنتظرة والكهرباء وغيرها وده معناه إن قيمة العملة بتقل أو قوتها الشرائية بتضعف وفي كل الحالات انت خسران لو معاك مبلغ كويس وسايبه كده في البيت أو راكد في البنوك من غير ما تشتري بيه شهادات ادخار مثلا لان طول ما فيه اضطراب في الأسواق وارتفاع أسعار يبقي ثروتك بتقل وفلوسك بتتاكل بالتدريج...
طيب لو حبيت أشغل فلوسي هشغلها في ايه ؟
طبعا فيه  حاجات كتير تشغل فيها فلوسك واهم حاجة تكون أمان ومفهاش مغامرة يعني تقدر مثلاً تستثمر صح في الدهب واهي الأسعار بتنزل اليومين دول بسبب قلة الطلب على المعدن الأصفر والافضل تشتري سبايك وجنيهات دهب لأن قيمتها بتبقي اكبر وانت رايح تبيع وميزة الدهب إنه استثمار آمن جدا ومش بيخسر وأغلب الناس بتفضل تشتري دهب في الأوقات الصعبة ودي عادة مصرية قديمة جدا وفي كل الأحوال الدهب بيزيد كل ما احتفظت بيه وكل التوقعات بتقول إن الأيام الجاية سعره هيزيد بسبب زيادة الطلب عليه في موسم الأعياد وعودة المصريين بالخارج في الإجازات.

وكمان تقدر تشغل فلوسك في العقار وهو استثمار كويس جدا على فكرة بس محتاج شوية مجهود منك وميزة العقار أنك بمجرد ما تشتريه قيمته بتزيد ومش بتصرف عليه كتير وسعر العقارات مرتبط بالغالب بالمكان اللي اشتريت فيه يعني لو منطقة راقية غير لو منطقة عشوائية مثلا وكمان بيعتمد على أسعار مواد البناء وقتها واسعارها لما تيجي تبيع العقار وعلى حالة السوق والطلب وقتها بردو.
فيه ناس كتير بتحب تستثمر بشكل سريع زي مثلا الناس اللي بتشتري أسهم في البورصة لكن النوع ده من الاستثمار بيكون محتاج خبرة شوية أو حد صاحبك يكون خبرة وفي العادة لازم تروح تستثمر في البورصة عن طريق شركة اوراق مالية لأن الاستثمار في البورصه ليه قواعد لكن الحقيقة استثمار مربح جدا وعاوز متابعة لأسهم الشركات وبعيد عن اللي بيتقال أن كل اللي بيحط فلوسه في البورصة بيخسر دايما والعكس صحيح ناس كتير جدا استثمرت ولسه بتستثمر في البورصة المصرية واللي كعبها عالي اليومين دول في تحقيق أرباح قياسية.

طبعا مش هننسى الاستثمار في شهادات الادخار ودي اكتر استثمار آمن وامان لأنه في حماية البنك المركزي وعارف هتكسب كام من فلوسك كل شهر او كل سنة وكمان ميزته إنه استثمار مش مرهق خالص انت بتحط فلوسك وتنساها وتروح بعدين تقبض قيمة الفايدة أو العائد.. وفيه ناس بتفكر بشكل مختلف عشان تشغل السيولة بتاعتها وهي امها تروح تعمل مشروع خاص وده من افضل الاستثمارات بشرط الخبرة طبعا والا لو اشتغلت في حاجة مش بتفهم فيها يبقي هتخسر في الاخر.