السبت 22 يونيو 2024
رئيس التحرير
عمرو عامر
المشرف العام
عبدالعظيم حشيش
تحليل

الدولار رايح على فين؟.. مصير غامض للعملة الأمريكية فى مصر

الثلاثاء 04/يونيو/2024 - 03:21 ص
الدولار
الدولار

 

 

هو الدولار رايح على فين بالظبط؟ وهل سعره فى البنوك وشركات الصرافة هيفضل يتراجع ولا ممكن يعمل ريمونتادا ويرجع لمستويات ما قبل 6 مارس ؟ والسوق السودا راحت فين والفلوس اللى كانت موجودة مع المضاربين دخلت البنوك ولا متخزنة وممكن تطلع فى وقت معين؟

 

اللى متابع اللى بيحصل فى سوق صرف العملات الأجنبية فى مصر اكيد لاحظ الانخفاض الكبير اللى حصل فى سعر الدولار وازاى انخفض من مستوى 51 جنيه فى الايام الاولى للتعويم الأخير وصولا الى 47 جنيه حاليا وسط توقعات قوية بمزيد من الانخفاض فى سعر العملة الأمريكية خلال الشهور الجاية .. فيا ترى ايه اللى هيحصل للدولار هيزيد ولا هينزل ؟ ومين المتحكم فى السعر حاليا؟

بص يا سيدي القاعة فى سوق الصرف واضحة وصريحة كل ما زادت السيولة الدولارية كل ما سعر العملة انخفض وعشان كده من وقت الاعلان عن صفقة راس الحكمة الكبرى وسعر الدولار بيتراجع لأن دخول 35 مليار دولار للسوق وضخ جزء كبير منها فى البنوك خلا الوضع يستقر ومكن البنوك انها توفر العملة الصعبة للشركات والمستوردين وجه عمل وفرة فى الدولار وقضى بشكل كامل على السوق السودا للعملة

حد ممكن يسأل ويقول المضاربين راحوا فين ودولارات السوق الموازية أخبارها ايه ؟

لازم كلنا نكون عارفين ان السوق السودا سوق غير شرعية وبتنشط فى اوقات الزمات الكبيرة وتحيدا لما بيحصل شح فى العملات الجنبية وعشان كده اللى بيشتغلوا فيها بيكونوا عارفين ان مع اى استقرار مبيكنش ليهم مكان ومع اول تدفقات دولارية تدخل خزينة البنك المركزي اختفت السوق السودا والمضاربين ما بقاش ليهم اى أثر أصلا

طب وتوقعات الدولار الفترة الجاية ايه؟

فيه تباين واختلاف كبير بين المؤسسات الدولية حوالين مستقبل الدولار في مصر خلال عام 2024، فيه مؤسسات شايفة أن الدولار هيواصل رحلته التصاعدية وممكن يوصل الى مستويات 60 جنيه وفيه مؤسسات تانية بتقول ان العملة الامريكية هتنخفض الى مستويات ال 40 جنيه وده التوقعات القرب للحدوث

بس تراجع سعر الدولار مرتبط بمدى استمرار التدفقات الدولارية المستقبلية من الاستثمارات الأجنبية، بالإضافة لزيادة تحويلات المصريين من الخارج واللي من المتوقع ترتفع بسبب تحرير سعر الصرف اللى قضى على السوق الموازية وأعاد التعامل من خلال القنوات المصرفية الرسمية.

وبترى مؤسسة "كابيتال إيكونوميكس" بمنطقة الشرق الأوسط، أن سعر الدولار هيصل إلى ما بين 60 وحتى 65 جنيهًا خلال نهاية السنة  خصوصًا بعد التزام الحكومة بنظام صرف أكثر مرونة بحسب اتفاقها مع صندوق النقد الدولي.

فى نفس الوقت بيتوقع البنك الأمريكي “جي بي مورجان” وصول سعر الدولار بين 45 و50 جنيهًا خلال العام الجاري بسبب صفقة رأس الحكمة واللي وفرت سيولة دولارية ضخمة.. بالاضافة الى موارد دولارية تانية زي اللى هتيجي من صندوق النقد والبنك الدولى ودعم الاتحاد الاوربي