اعرف هتدفع كام بعد الزيادة.. الأسعار الجديدة للكهرباء

كل الناس فى مصر قاعدة مستنية تعرف ايه اللى هيحصل فى اسعار الكهربا.. والحكومة ممكن ترفع الفاتورة بنسبة كام؟ وايه نسب الزيادة فى كل شريحة من شرايح الاستخدام.. فيا ترى ايه السيناريوهات اللى بيتم دراستها فى الملف المهم ده؟ وهل تطبيق الزيادات الجديدة هيحصل من اول الشهر الجاي ولا ممكن الموضوع يتم تأجيله زيماحصل قبل كده؟

خلاص فاضل ايام قليلة وينتهى العمل بتعريفة شرايح الكهربا اللى كانت الحكومة أقرتها من فترة.. وحاليا المسئولين فى وزارة الكهربا بيدرسوا السيناريوهات اللى هيتم التعامل بيها فى الاسعار الفترة الجاية وحجم الزيادات المتوقع فى كل الشرايح.

والملعومات اللى عندنا من مصادر مطلعة داخل الوزارة بتقول انه هيتم تطبيق أسعار جديدة لشرايح الكهرباء بداية من 1 يوليو 2024 ومن المتوقع ان الزيادات تتراح ما بين 30 الى 40% وهيتم وقف العمل بأسعار الشرايح الحالية نهاية الشهر الحالى.

ووفقا لبعض التسريبات فمن المتوقع نسبة الزيادة تكون 30% لأول 3 شرايح واللى بتحظى بدعم من الدولة بينما هتصل إلى 40% في الشرايح التانية.

وحاليا اكتملت كل الاستعدادات داخل قطاعات الشؤون التجارية والنظم بمختلف الشركات لتطبيق الزيادة الجديدة اللى هتظهر  في فواتير كهربا شهر يوليو واللى هيتم تحصيلها طبعا في أغسطس بالنسبة للعدادات الميكانيكية والإلكترونية أما بالنسبة للعدادات مسبوقة الدفع فهيتم المحاسبة اعتبارا من تاريخ إقرار الزيادة.

وخلال الايام الجاية هيعقد وزير الكهرباء مؤتمر صحفي كبير  للكشف عن خطة الوزارة لتطبيق أسعار شرايح الكهرباء الجديدة.

و الزيادة جت بعد دراسة عدة جوانب منها تغيير سعر الصرف وزيادة أسعار المواد البترولية المستخدمة في تشغيل محطات توليد الكهرباء مما أدى إلى زيادة مديونية الوزارة.

ووصلت مديونية "الكهرباء" لوزارة البترول والثروة المعدنية الى اكتر من 200 مليار جنيه بنهاية الربع الأول من 2024، ومن المتوقع أن تتكبد شركات الكهرباء خساير قدرها 140 مليار جنيه لو استمروا في الحصول على الوقود من وزارة البترول بالسعر الحالي.

طب هل رفع اسعار الكهربا ليه علاقة بصندوق النقد الدولي؟

الاتفاق اللى الحكومة المصرية وقعت عليه مع الصندوقبيتضمن رفع الدعم عن اسعار الكهربا وده كان بند واضح وصريح فى المفاوضات مع مسئولى الصندوق حتى لو كان ده هيحصل بشكل تدريجي لأن مش هينفع رفع الدعم مرة واحدة وده اللى أكده المتحدث باسم مجلس الوزراء، محمد الحمصاني اللى قال أن تحريك أسعار الكهرباء هيكون تدريجيًا على مدار 4 سنين

وخلونا نقول لحضراتكم الاسعار المعمول بيها لشرايح الكهربا حاليا قبل الزيادات الجديدة

وهنبدأ بالمنازل الشريحة الأولى  ( من 0 الى 50 كيلو واط) 58 قرش

الشريحة التانية : (51 - 100 كيلو واط) 68 قرش
الشريحة التالتة : (0 - 200 كيلو واط) 83 قرش
الشريحة الرابعة: (201- 350 كيلو واط) 125 قرشًا 
الشريحة الخامسة: (351 - 650 كيلو واط) 140 قرش
الشريحة السادسة: (0 - 1000 كيلو واط) 150 قرش
الشريحة السابعة: (0 - أكثر من 1000 كيلو واط) 165 قرش
أما بالنسبة للمحلات التجارية 
الشريحة الأولى: (0 - 100 كيلو واط)  65 قرش 
الشريحة التانية : (101 - 250 كيلو واط) 136 قرش
الشريحة التالتة: (0 - 250 كيلو واط) 150 قرشً
الشريحة الرابعة: (601 - 1000 كيلو واط) 165 قرش
الشريحة الخامسة: (0 - أكثر من 1000 كيلو واط) 180 قرش