لو هتستثمر يبقي دلوقتي.. سوف نصيحة شعبة الذهب

 
لسه متردد تستثمر فلوسك فين وامتي ومحتار تحطها في مشروع ولا تشتري بيها دهب ولا عقار أو شهادات ادخار.. في الفيديو ده هنقولك نصيحة غالية عشان تستثمر وتكسب وانت مطمن على فلوسك.. خليكم معانا 
 
اكيد طبعا فيه انواع كتير من الاستثمارات تقدر تشغل فيها فلوسك بس اهم حاجة في الاستثمار إنه يكون مضمون وامان ومفيهوش مخاطرة ولا تكاليف كبيرة هنا بقي انت بتفاضل بين حاجات كتير زي الدهب أو العقار أو شهادات الادخار أو عمل مشروع وكلها طرق مهمة جدا لتشغيل وتنمية مدخراتك وكله على حسب ظروفك الشخصية وحجم المال اللي معاك وهل معاك وقت تقدر تتابع مشروعك بنفسك ولا عندك وظيفة أو شغل تاني.
وهنا افضل حاجة تستثمر فيها الدهب وهنفضل نقولك الدهب لغاية اخر السنة لأنه هيفضل يزيد بشكل كبير طول المدة دي وزي ما قلنا قبل كده إن الأسواق بيحكمها أرقام ومؤشرات وتوقعات ومش ماشية كده بالبركة وزي ما قلنا كل التوقعات بتقول إن الدهب هيزيد مش بس لآخر 2024 لكن هيكمل كمان صعود وارتفاع في سنة 2025 واللي قلنا عليها قبل كده إنها هتكون سنة الدهب بلا منافس.
ايه الجديد في قصة الدهب وليه بنتكلم عنه تاني النهاردة.. شوف ياسيدي من ساعات الغرفة التجارية لصناعة الذهب،  طلعت واتكلمت على لسان مسؤول فيها على الهواء مباشره في أحد البرامج ونصحت الناس اللي بتفكر تشغل فلوسها أنها تشتري بيها دهب وقال المسؤول نصا إن الاستثمار في الدهب طريقة آمنة للحفاظ على قيمة الفلوس وقال كمان إن الفترة الحالية هي مناسبة جدًا لشراء الدهب بعد استقرار سعر الصرف وضرب مثل وقال إن الدهب سعره التقريبي حاليا 3200 جنيه، وده سعر مناسب جدًا للشراء في الوقت الحالي.
مسؤل غرفة صناعة الدهب قال الأهم بقي وهو إن الدهب سعره هيزيد باستمرار حتى نهاية السنة الحالية ونصح وقال إن السبايك هي أفضل شيء للادخار في الدهب، واللي بيفكر يشتري سيارة مثلًا أو عقار الأفضل ليه يصبر شوية ويشتري بالفلوس سبايك دهب على مدار سنتين أو تلاتة، وبعدها يبيع الدهب ويجيب العربية وفي نفس الوقت هيشاري عقار وساعتها هيفضل معاه فلوس كمان لأن الدهب سعره بيزيد باستمرار.
طيب ليه الدهب سعره بيزيد دايما.. عشان دي حكم السوق زي ما قلنا والدهب بيتأثر بالعرض والطلب والسوق العالمي والدولار كمان ولأن الحاجات اللي بتأثر فيه كتيرة فدايما سعره بيزيد لانه ملاذ آمن ومثالي للادخار وحفظ الأموال خاصةً في أوقات الأزمات والصراعات والكوارث الطبيعية والحروب وكمان عشان الدهب تقدر تشيله في أي مكان آمن ومش بياخد حيز ولا محتاج تتابعه كل يوم او تاخد من وقتك زي باقي الاستثمارات التانية.