انقلاب في سوق الدهب.. وخطة اصطياد 1000 شركة صينية في قناة السويس.. وليه مصر هتقترض من صندوق النقد تاني
متابعينا الكرام في كل مكان أهلا وسهلا بكم ولايف جديد لأهم التقارير والأحداث الاقتصادية اللي عرضتها منصات بانكير على مدار اليوم السبت 18 مايو
البداية مع تقرير مهم بخصوص اللي حصل في الصاغة النهاردة ومصير أسعار الدهب في الأيام الجاية
وقال التقرير إنه بالتزامن مع انباء بدء خفض أسعار الفائدة في الولايات المتحدة واصل الدهب صعوده عالميا وسجل مستوى تاريخي تجاوز 2400 دولار للمرة الأولى من فترة طويلة وسط توقعات بمزيد من الارتفاع في سعر الدهب خلال الأيام الجاية وفيه توقعات أن الدهب ممكن يتجاوز 2500 دولار للاونصة قبل نهاية يونيو بسبب استمرار التوترات السياسية في اكتر من منطقة سواء في الشرق الأوسط أو في اوكرانيا أو فى أماكن تانية كتير...
وسلط التقرير الضوء على حرص البنوك المركزي على تزويد احتياطياتها من الدهب ضمن عمليات التخلي عن الدولار اللي استخدمته الولايات المتحدة الأمريكية كسلاح في حربها ضد الروس من بعد الغزو الروسي لاواكرانيا.. وكلنا شفنا ازاي تم طرد روسيا مز النظام المالي العالمي وتم تجميد أصول بمليارات الدولارات لموسكو في عدد من العواصم وده خلا كتير من الدول تعيد التفكير في احتياطياتها من الدولار وتسعى بكل قوة إلى زيادة حجم الدهب الملاذ الأكثر آمانا في العالم.
وبخصوص تأثير ارتفاع سعر الدهب عالميا على الصاغة في مصر كشف التقرير إن اي ارتفاع في سعر الدهب عالميا بينعكس عندنا في مصر وفي آخر تعاملات سعر الجرام فى مصر زاد بحوالى ٥٠ جنيه مع الزيادات الكبيرة اللى بتحصل في سعر الدهب عالميا ومتوقع أن الزيادات دي تستمر في حال الصعود القياسي للدهب فى البورصات العالمية وللأسف ممكن نرجع نسمع أسعار صعبة تاني عن الدهب زي ما حصل قبل كده وسعر الجرام عدا ٣٨٥٠ جنيه
التقرير التالي اللي عرضته منصات بانكير كان بخصوص مفاجأة الفيدرالي اللي جاية وترقب الأسواق الدولية لقرارات صعبة.
وكشف التقرير إنه في الساعات الأخيرة استقبلت الأسواق المالية أحدث بيانات التضخم الاستهلاكية اللي رغم أنها جت ايجابية في معظمها الا ان صناع السياسة النقدية في امريكا لسه شايفين ان ده مش كافي بشكل جيد بالنسبة للبنك المركزي الأمريكي لخفض أسعار الفائدة في وقت قريب.
وأظهرت البيانات الصادرة مؤخرا أن نمو مؤشر أسعار المستهلك الأمريكي تباطأ زي ما كان متوقع إلى 3.4% على أساس سنوي في أبريل ، في حين أن ما يسمى مؤشر أسعار المستهلك الأساسي، اللي بيستثني أسعار الطاقة والغذاء المتقلبة، ارتفع بنسبة 3.6% سنويًا، وهو أقل نمو سنوي من أبريل 2021
وشرح التقرير إنه بناء على المؤشرات دي بتسود حالة عدم يقين فيما يتعلق بمستقبل أسعار الفايدة على الدولار ورغم إن التوقعات في الأول كانت بتقول ان الفيدرالي ممكن يبدأ يخفض الفايدة بداية من يونيو الجاي الا ان التوقعات حاليا ان ده مش هيحصل قبل سبتمبر الجاي واحد أقصى مرتين في ٢٠٢٤
ولفت التقرير إلى تأثيره رفع الفايدة على الاسواق..وقال إن استمرار سياسة التشديد النقدي معناها مزيد من الإجراءات الاحترازية لمواجهة التضخم في كل دول العالم ومعناها كمان ان الاقتصاد العالمي لسه مش هيتعافى دلوقتى وده هيزود الطلب على سلعة مهمة زي الدهب لان التاس هتفضل تحفظ قيمة مدخراتها في أصول آمنة وده حرفيا هيخل الأسواق تحت رحمة الفيدرالي
وختم التقرير بشرح عن تأثير سياسة الفدرالي الأمريكي على الوضع في مصر وقال إنه رغم ان الاوضاع في الفترة الأخيرة ماشية كويس وازمة الدولار بتنتهي مع توافر سيولة دولارية كبيرة سواء من فلوس صفقة رأس الحكمة أو التدفقات اللي هتيجي من صندوق النقد الدولي لكن عدم خفض الفايدة في امريكا هيكون ليه تأثير علينا في زيادة كلفة الدين الخارجي وكمان في ارتفاع أسعار الدهب ووصول إلى مستويات قياسية بالإضافة كمان إلى از ده مؤشر على استمرار عدم السيطرة على التضخم
وحدة أبحاث بانكير قدمت تقرير مهم جدا عن سعي المنطقة الاقتصادية في قناة السويس لجذب 1000 شركة صينية..
وأضاف التقرير إنه في الوقت الحالي المنطقة الاقتصادية لقناة السويس واحدة من اهم المناطق اللي عليها العين من المستثمرين وخصوصا الشركات الصينية واللي نازلها بكل قوتها في المنطقة هناك خصوصا ان القائمين علي المنطقة هناك بيستهدفوا الوصول بعدد الشركات الصينية في المنطقة الاقتصادية لقناة السيوس لـ1000 شركة مختلفة مع بداية عام 2030.
وشرح التقرير إنه في الكام شهر اللي فاتوا، المنطقة الاقتصادية لقناة السويس وقعت عقود مع 5 شركات صينية في مختلف الصناعات.
المهندس وليد جمال الدين رئيس المنطقة الاقتصادية لقناة السويس قال إن المنطقة الاقتصادية نجحت خلال السنتين اللي فاتوا في جذب 128 مشروعا بقيمة 6 مليار دولار، ووصلت نسبة الاستثمارات الصينية منهم 40% منها .
وأضاف جمال الدين إن الهيئة وقعت في السنة اللي فاتت بس تعاقدات بقيمة 3.57 مليار دولار لـ 60 مشروع وفي 55 مشروع صناعي اخذوا الموافقة المبدئية لانشاء مشروعات استثمارية .
التقرير الأخير اللي عرضته وحدة أبحاث بانكير كان بخصوص القرض الجديد من صندوق النقد الدولي ..
وقال التقرير إنه في الكام الساعة اللي فاتت ياسمين فؤاد وزيرة البيئة أعلنت إنها عقدت اجتماع موسع مع بعثة صندوق النقد الدولى للمرونة والاستدامة، وده كان في مقر وزارة البيئة بالعاصمة الادارية، لبدء مفاوضات لحصول مصر على 1.2 مليار دولار للبيئة ضمن حزم الدعم الخاصة لصندوق النقد الدولي.
وخلي بالك من كلمة دعم مش قرض بالمعني المفهوم لأن الصندوق عامل زي مبادرة كده لتحفيز الدول على تبني مشروعات تحسن المناخ وتستبدل المشروعات بطاقة نظيفة ضمن مباردات قمة المناخ اللي تم اقرارها في قمة باريس وقمة شرم الشيخ وغالبا الدعم ده بيكون مرتبط بتقدم الدولة في مشروعات تحسين المناخ والبيئة وساعتها الصندوق وفيه جهات مالية تانية بتقدم الدعم للدول في نفس الملف.
وقال التقرير إنه لغاية دلوقتي مفيش تفاصيل حولين آلية صرف الدعم وهل هو منحة ولا هيكون بدون فايدة أو هيكون مجاني وده هنعرفه بعد انتهاء المفاوضات وإعلان التفاصيل وغالبا الدعم ده بيكون بتسهيلات كبيرة من الصندوق.
