الثلاثاء 25 يونيو 2024
رئيس التحرير
عمرو عامر
المشرف العام
عبدالعظيم حشيش
تحليل

أخطر 3 شهور في الصاغة.. إيه اللي هيحصل للدهب فى شهر سبتمبر؟

الجمعة 17/مايو/2024 - 03:20 ص
الذهب
الذهب

يا ترى ايه اللى هيحصل فى اسعار الدهب فى شهر سبتمبر؟ وليه ال 3 شهور الجايين هم أخطر شهور فى سوق الصاغة؟ وهل الأفضل تشترى دهب دلوقتى ولا تستنى شوية ؟ وايه علاقة كل ده بأسعار الدولار وبمصير الفايدة فى الولايات المتحدة الأمريكية؟

 

فى اخر استطلاع اتعمل من كام يوم معظم التوقعات بتقول ان بنك الاحتياط  الفيدرالي هيخفض اسعار الفايدة فى الولاياتت المتحدة الامريكية مرتين فى 2024 المرة الاولى هتكون فى اجتماع سبتمبر وطبعا خفض الفايدة معناه زيادة اقبال المستثمرين على الدهب لأن أدوات الدين الحكومية الامريكية العائد عليها هيقل وبالتالى معظم روؤس الأموال هترح للدهب والطلب هيزيد على المعدن النفيس ومع زيادة الطلب السعر هيرتفع

ولازم تكون واخد بالك من حاجة مهمة ان العلاقة بين سعر الدهب وأسعار الفايدة على الدولار علاقة عكسية ومع رفع اسعار الفايدة الدهب اسعاره بتنزل ومع خفضها دي بتكون فرصة مهم جدا للدهب للصعود وعشان كده التوقعات بتخفيض الفيدرالي لأسعار الفايدة كان ليها التأثير الأكبر على سعر الذهب اللى ارتفعت اسعاره بمستويات قياسية ووصلت الى حدود 2390 دولار للأونصة وسط توقعات بمزيد من الصعود وان سعر الاونصة عالميا ممكن يسجل 2500 دور قبل نهاية النص الأول من 2024 وصولا الى 3000 دولار بنهاية السنة.

وارتفعت أسعار الذهب بالبورصة العالمية بنسبة 2.6 % وبقيمة 59 دولار خلال تعاملات الأسبوع اللى فات مدعومة بتزايد التوقعات باحتمالية خفض أسعار الفائدة بعد البيانات الاقتصادية الأمريكية، المخيبة للآمال، وسط ترقب مستثمرو الذهب بيانات التضخم

 

طب ايه تأثير ده على سعر الدهب فى مصر؟

طبعا ارتفاع السعر العالمي للدهب هيصاحبه ارتفاع كبير فى سعر الدهب محليا لان السعر العالمي واحد من اهم المعايير لتحديد السعر المحلي للدهب ومعنى ان الاونصة ممكن سعرها عالميا يوصل ل 3 الاف دولار فكده ممكن جرام الدهب ممكن على نهاية السنة يوصل الى حدود 4 الاف جنيه والطفرة الكبيرة فى الاسعار هتحصل بداية من شهر سبتمبر

يعنى اللى عاوز يشترى يشترى دولقتى ولا ممكن يصبر شويبة عادي؟

من دلوقتى ولمدة 3 شهور جايين دي اخر فرصة لشراء الدهب لأن بعد كده الاسعار هتروح فى حتة صعبة فاللى معاه فلوس وعاوز يستثمر فى المعدن النفيس يفضل يشترى من دلوقتى على طول

وخد بالك الاستثمار فى الدهب استثمار طويل الاجل .. يعنى لو هتشترى دهب فانت تكون عامل حسابك انك مش هتبيعوا على الاقل لمدة سنة عشان تعرف تكسب من وراه فلو معاك فلوس ومش محتاجها لمدة سنة الدهب هو الاستثمار الأفضل

وفى التعاملات الأخيرة سجل سعر الدهب اليوم عيار 24 نحو 3565 جنيهًا وسجل سعر الدهب عيار 21 نحو 3120 جنيهًا.

أما عيار 18 فسجل نحو 2674 جنيه وسجل سعر الجنيه الدهب  نحو 24960 جنيهًا.

وبتختلف أسعار الذدهب في مصر بالمصنعية من محل للتانى وبيتراوح متوسط سعر المصنعية والدمغة في محلات الصاغة ما بين 30 و65 جنيه باختلاف نوع عيار الذهب وباختلاف محلات الصاغة، ومن محافظة إلى للتانية ومن تاجر للتاني

ولحساب سعر الدهب عيار 21 بالمصنعية والدمغة بتتم إضافة 100 جنيه زيادة على سعر جرام الدهب المعلن وبتختلف قيمة المصنعية من تاجر للتاني في الصاغة وبتبدأ من 100 جنيه ولا تزيد على 150 جنيه