السبت 22 يونيو 2024
رئيس التحرير
عمرو عامر
المشرف العام
عبدالعظيم حشيش
تحليل

ليه المركزي سحب تريليون جنيه من البنوك.. الحكاية فيها مفاجأة

الأربعاء 15/مايو/2024 - 07:00 ص
البنك المركزي المصري
البنك المركزي المصري



إيه هو الحدث التاريخي اللي حصل نهاردة في المركزي المصري.. وإزاي المركزي بيدير ويتحكم في السيولة في البلد كلها وإيه حكاية التريليون جنيه اللي أخدها من البنوك وايه اللي هيحصل في الأسواق بعدها.. خليكم معانا لأخر التقرير وهنفهم اللي بيحصل

وظيفة البنك المركزي الأصيلة هي إدارة السيولة النقدية في السوق والبنوك وعدم خروج السوق عن السيطرة سواء ناحية التضخم أو الانكماش لان موضوع الفلوس وعملية التداول بتاعها بتحكمها موازين ومعادلات والموضوع مش متساب كده يعني لو المركزي مش موجود كنت هتلاقي فلوس كتير في السوق بس مفيش بضايع أو فيه سلع بس مفيش فلوس وندخل في ركود أو تضخم .

طيب ازاي البنك المركزي بيدير السيولة في البلد كلها بحيث يعمل توازن بين الفلوس اللي في جيبك واللي مع الأشخاص الاعتبارية زي الشركات والهيئات والأجانب مثلا وبين السلع الموجودة في السوق عشان لو حصل خلل في الميزان هتوقع البلد في مشكلة زي إن لو الفلوس زادت مع الناس الأسعار هترفع بشكل كبير لأنه هيكون فيه زيادة في الطلب على السلع وطبيعي انت لو معاك فلوس زيادة هتنزل تشتري حاجات كتير حتى لو مش ضروية وغيرك هيفكر بنفس الطريقة والنتجية السلع هتشح في السوق وهكذا.، ولو حصل العكس والفلوس قلت الطلب هيقل على لسلع وبالتالي هيحصل ركود في الأسواق.
سحب السيولة من السوق عشان نبقى عارفين هو أحد أهم الأدوات المهمة للسيطرة على التضخم أو ارتفاع الأسعار ولأنه زي ماقلنا لو الموضوع لو اتساب هتحصل أزمة وعشان كده كل فترة نسمع إن المركزي سحب سيولة من البنوك.

طيب إيه المفاجأة اللي أعلن عنها البنك المركزي النهاردة.. شوف حضرتك المركزي كشف النهاردة عن سحب سيولة بقيمة 1.050 تريليون جنيه مصري من 32 بنك عامل في مصر في عطاء للوديعة الأسبوعية للعائد الثابت ضمن عطاءات السوق المفتوحة، ودي حدث تاريخي لأنه أول مرة البنك يسحب مبلغ بالحجم ده.

ويأتي هذا السحب الكبير للسيولة في إطار تعديل سياسة البنك المركزي المصري لقبول عطاءات السوق المفتوحة، حيث تم اعتماد آلية جديدة تقضي بقبول جميع العروض المقدمة من البنوك بسعر متوسط الكوريدور، بدلاً من نظام التخصيص اللي كان معمول بيه سابقًا.

طيب ايه هي آلية الودائع المربوطة.. شوف ياسيدي دي  واحدة من أدوات السوق المفتوحة اللي بيستخدمها البنك المركزي في إدارة حجم السيولة في الجهاز المصرفي أو البنوك وامتصاص الفائض منها وبتساهم الآلية في السيطرة على أحجام السيولة المتداولة أو الفلوس اللي في السوق وخفض حجم المعروض النقدي من الجنيه  ومكافحة التضخم وارتفاع الأسعار
طيب البنوك بتاخد إيه قصاد التنازل عن المليارات دي كلها للمركزي.. شوف المركزي بياخد الفلوس أو السيولة الزيادة عند البنوك من خلال حاجة اسمها الوديعة الأسبوعية للعائد الثابت ودي واحدة من  3 ودائع بيطرحها المركزي لامتصاص فائض السيولة بالقطاع المصرفي، واللي بتلجأ لها البنوك لاستثمار فائض أموالها بسعر فائدة يضاهي في بعض الأحيان أسعار الفائدة المقدمة على أذون الخزانة وبدون نسبة مخاطرة.