الثلاثاء 18 يونيو 2024
رئيس التحرير
عمرو عامر
المشرف العام
عبدالعظيم حشيش
شمول مالي

كنز دولاري جديد لمصر.. إيه حكاية الهيدروجين الأخضر وعلاقته بالبنزين والسولار

الثلاثاء 07/مايو/2024 - 02:30 ص
الهيدروجين الأخضر
الهيدروجين الأخضر

 

 
عمرك سمعت عن الهيدروجين الاخضر، طيب تعرف هو هيستخدم في أية.. طيب هل ممكن الهيدروجين الأخضر يكون بديل لوقود السيارات وخلاص نستغني عن البنزين والسولار.. طيب اية هيا استخداماته ومنين الدول بتنتح الهيدروجين الأخضر.
 
الهيدروجين الأخضر في الوقت الحالي بقي هدف استراتيجي عن اغلب الدول اللي بتحاول أنها تقلل من انبعاثات الكربون وتحافظ على الطقس ودرجات الحرارة خصوصا في ظل الاتفاقات اللي وقعت عليها اغلب دول العالم للتحول لاستخدام الطاقة النظيفة وتقليل الاعتماد علي السولار والبنزين والمازوت والمحروقات عموماً.

اكيد دلوقتي انت بتقول مال مصر ومال الكلام اللي انا بقوله لحضرتك دلوقتي خصوصاً أن مصر من الدول الأقل تلوثا للهواء مش زي الدول الصناعية الكبري واللي عندها مشروعات ومصانع كبيرة هيا السبب الأساسي في تلوث الهواء.
علشان نعرف أية حكاية الهيدروجين الأخضر وايه أهمية لمصر، لازم نعرف أن مصر في الوقت الحالي شغالة وبكل قوه علشان تكون مصر طاقة عالمي ومن هنا مصر بستهدف إنتاج 42% من الكهرباء من مصادر الطاقة المتجددة بحلول عام 2035


الهيدروجين الأخضر واحد من مصادر الطاقه المتجدده الي الدولة شغالة عليها خصوصا إن اغلب الدول دلوقتي بتتجه للاعتماد عليه كمصدر أساسي للطاقة وبدأ يدخل كمصدر أساسي لتموين السفن بدلا من السولار والبنزين ومصادر الطاقة اللي بتعمد عليها السفن وقريبا جدا هيكون كمان مصدر لتموين العربيات والطائرات وكل وسائل النقل في حياتنا، وعلشان كده وزارة الكهرباء والطاقة المتجددة أطلقت على عام 2022 اسم عام الهيدروجين الأخضر، وجت مصر في مقدمة مشروعات الهيدروجين العربية، ب 23 مشروع كلهم هدفهم الأساسي إنتاج الهيدروجين الأخضر والأمونيا الخضراء.

مش كده بس لا ده مصر وقعت مع الدولة المضيفة لمؤتمر كوب 27 واللي عقد بمدينة شرم الشيخ علي أكثر من 9 اتفاقيات إطارية بإجمالي 23 مذكرة تفاهم في مجال الهيدروجين.

وفي عام 2022، نجحت مشروعات الهيدروجين الأخضر في مصر في استقطاب استثمارات ضخمة وجت في المرتبة الثانية عالميًا والأولى إقليميًا لاستقبال الاستثمارات الأجنبية التأسيسية المباشرة.

طيب استثمارات الهيدروجين الأخضر وصلت لكام عالميا ومصؤ بتسهدف الوصول لكام؟.
بحسب البيانات المعلنة، وصلت استثمارات الهيدروجين الأخضر ل 107 مليارات دولار، وتصيب مصر منهم وصل ل40% من إجمالي الاستثمارات المعلنة في الشرق الأوسط وشمال أفريقيا، خصوصاً أن مصر أعلنت أنها هتنتح الهيدروجين الأرخص في العالم وهتكون منطقة الإستثمار الأساسية بتاعته في المنطقة الاقتصادية لقناة السويس علشان يكون قريب من حركة تموين السفن اللي بتمر بمجري القناة وكمان يكون قريب من المجري الملاحي لقناة السويس علشان التصدير وحركة التجارة العالمية، ومصر هتستخرج الهيدروجين الأخضر من تحليل مياة البحر وبالتالى هيكون عندنا مصدر دخل دورلاري وباب جديد من للاستثمار الأجنبي خصوصاً في مجال هيكون عليه طلب عالمي كبير في الأيام اللي جاية خصوصاً أن أغلب دول العالم بدأ تدخل في مجالات الاستثمار في الطاقة المتجددة خصوصاً أنها طاقة نظيفة ومفيش منها أي ضرر علي صحة الإنسان ومفيش منها كمان اي ضرر أو تلوث للهواء.