الثلاثاء 28 مايو 2024
رئيس التحرير
عمرو عامر
المشرف العام
عبدالعظيم حشيش
تحليل

ليه الدولار زاد اليومين اللي فاتوا وليه عيار الدهب 21 هيوصل 5700 جنيه

السبت 20/أبريل/2024 - 08:40 ص
الدولار والذهب
الدولار والذهب


 
هو الدولار زاد ليه اليومين اللي فاتوا ورا بعض وعلاقته بالسوق السودا..  وايه حكاية الدهب والأسعار رايحة على فين وليه .. خليكم معانا للآخر وهنعرف  
 
شفنا اليومين اللي فاتوا أن أسعار الدولار زادت في البنوك وقرب على 49 جنيه من 47.25 تقريبا قبل العيد.. اللي بيحصل في سوق صرف الدولار ده طبيعي جدا بعد التعويم لأن سوق العملات وسعرها بقي يحدده السوق والعرض والطلب مش البنك المركزي أو الدولة ودا دليل حقيقي على المرونة في سعر الصرف وكمان ارتفاع سعر الدولار اللي اليومين اللي فاتوا كان بسبب إجازة العيد الطويلة و طبيعي يتراكم الطلب على الدولار بسبب الإجازة ولما البنوك رجعت للعمل طبيعي يزيد الطلب على الدولار من المستوردين والشركات والمواطنين وده معناه إن الزيادة دي مؤقتة وإن سعر الدولار هيرجع تاني يستقر  وده كلام خبراء الاقتصاد والبنوك.
طيب ارتفاع سعر الدولار ليه علاقة بالسوق السوداء.. شوف في البداية مفيش حاجة دلوقتي اسمها سوق سودا ولا سوق خضرا ولا من اي لون وهو سوق واحد للعملة بقي في البنوك بعد تحرير سعر الصرف والكلام عن السوق السوداء دلوقتي ده محاولة فاشلة من تجار العملة عشان يوهمك إن فيه سوق موازية رجعت تاني وبيروج أسعار من عنده على صفحات ومواقع تواصل مضروبة وده طبعا لان التعويم حرم تجار العملة من ملايين الملايين اللي كانوا بيكسبوها كل طلعة شمس .
طيب وايه علاقة للدولار بالدهب .. شوف اسعار الدهب واللي بيحصل فيها ليه علاقة مباشرة بالسوق العالمي واللعب على تقيل لأن فيه صراع كبير دلوقتي بين الدولار والدهب وليه علاقة أكبر بالصراع في الشرق الأوسط والعقوبات الاقتصادية على روسيا والصين وأخيرا إيران ولما عادة بيكون فيه صراع دولي بيكون فيه زيادة في الطلب على الدهب لانه ملاء آمن للدول والبنوك المركزية وعشان كده سعره بيرفع بشكل كبير والحقيقة فيه توقعات كبيرة بارتفاع اسعار الدهب في الفترة الجاية بسبب التوترات في العالم والحروب والصراعات الاقتصادية كمان وضيف على ده تقارير عن خفض الفائدة على الدولار الفدرالي الأمريكي وكل ده بيصب في صالح ارتفاع أسعار المعدن الأصفر.
طيب وأسعار الدهب في مصر رايحة على فين.. زي ماقال مسؤولي شعبة الدهب بغرفة القاهرة التجارية و خبراء السوق وقبلهم قلنا هنا في بانكير  إن سعر الدهب على الصعيد المحلي مرتبط خلال الفترة الجاية بسعر الدهب عالميا، سواء بالصعود أو الهبوط و إن من أهم العوامل المتحكمة في تحديد سعر الدهب هو استقرار سعر صرف الدولار من عدمه بجانب سعر الدهب في البورصة، اللي بيكون له أثر كبير على تحديد سعر الذهب.
وحسب رئيس شعبة الدهب بغرفة القاهرة التجارية، سعر الدهب في الفترة الحالية في محلات الصاغة بيعتبر سعر عادل بالنسبة لسعر الدهب على الصعيد العالمي، لكن اللي هيشتري جرامات قليلة مش هيشعر بالزيادة دي وقال إن نشر التوقعات في سوق الدهب بيخوف الناس وفي نفس الوقت بيضرب السوق.

وايه حكاية أن عيار 21 في مصر هيوصل 5700 جنيه.. حسب توقعات بنوك عالمية وخلي بالك بنقول توقعات يعني ممكن تتغير في أي وقت بتغير الأسباب لكن البنوك بتتوقع بناء على الأوضاع الموجودة على الأرض زي الحروب والصراعات اللي قلنا عليها وامتي ممكن تنتهي وعشان كده اتوقعوا زيادة أسعار الدهب عالميا بشكل كبير واللي بيتم تداوله حاليًا عند 2370 دولارًا، و إذا قررت البنوك المركزية زيادة مشترياتها من المعدن الأصفر بشكل كبير أو في حالة حدوث ركود تضخمي أو حدوث ركود عميق لاقتصاد العالم، بحسب تقرير نشرته وكالات دولية فسعر الدهب هيضاعف، وده معناه إن سعر جرام الذهب الحالي من عيار 21 هيوصل بحاجز الـ 5700 جنيه بالورقة والقلم.