الإثنين 17 يونيو 2024
رئيس التحرير
عمرو عامر
المشرف العام
عبدالعظيم حشيش
تحليل

كارثة محدش واخد باله منها خالص.. انتكاسة في أزمة الدولار

الخميس 18/أبريل/2024 - 02:22 ص
الدولار
الدولار

 

يا ترى ايه اللى بيحصل بالظبط فى قناة السويس؟ وازاي عوايد القناة تراجعت بأكتر من 60% خلال الربع الأول من 2024 ؟ والحكومة هتعوض عجز الدولار الحاصل فى القناة منين؟

 

فيه حرفيا كارثة بتحصل ومحدش واخد باله منها.. وفى الوقت اللى الحكومة والدولة بكل مؤسساتها بتشتغل ليل نهار عشان توفر عملة صعبة وتحل أزمة شح الدولار فيه نزيف كبير بيحصل فى واحد من أهم مصادر مصر من العملة الصعبة

احنا هنا بنتكلم عن موارد قناة السويس اللى بتشهد تراجع مخيف فى اخر 3 شهور من بعد هجمات البحر الأحمر اللى بينفذها الحوثيين ضد بعض السفن واللى أدت الى توقف خطوط ملاحة دولية كبرى عن العبور من قناة السويس

وشملت قائمة شركات النقل اللى أعلنت عن وقف السير فى البحر الأحمر والتوجه إلى طرق بديلة عن قناة السويس مجموعة النقل الفرنسية «سي.إم.إيه-سي.جي.إم»، وشركة نقل الحاويات التايوانية «إيفرجرين»، و«فرونت لاين» لناقلات النفط ومقرها النرويج، و«هاباج لويد» لنقل الحاويات الألمانية، بخلاف «إتش.إم.إم» الكورية الجنوبية إلى جانب «إيه.بى مولر-ميرسك» الدنماركية، والبحر المتوسط للنقل (إم.إس.سي)، و«ولينيوس فيلهلمسن» النرويجية، والنقل البحرى التايوانية «يانج مينج».

وبسبب الى بيحصل ده أعلن وزير المالية محمد معيط على هامش زيارته للولايات المتحدة للمشاركة فى مفاوضات مع صندوق النقد الدولي عن تراجع ايرادات قناة السويس بنسبة 60% خلال الربع الول من 2024 .. ودي نسبة ضخمة جدا يعنى فى 3 شهور بس القناة فقدت اكتر من نص الايرادات اللى كانت بتحققها

وعشان نعرف حجم اللى بيحصل وتأثيره على أزمة الدولار فى مصر خلونا نقول لحضراتكم شوية أرقام مهمة عن ايرادات قناة السويس السنة اللى فاتت

فى نوفمبر اللى فات اظهر بيان حركة الملاحة بقناة السويس للعام المالي 2022/2023، زيادة أعداد السفن المارّة بالقناة بنسبة 17.6%، مقارنة بالعام المالي السابق لتصل إلى نحو 26 ألف سفينة، وزيادة الإيرادات الكلية للقناة من 7 مليارات دولار في العام المالي السابق بنسبة 34.7%، لتصل إلى 9.4 مليار دولار في العام المالي 2023.

ووفقا لتوقعات رسمية لرئيس هيئة قناة السويس قبل ازمة الهجوم الحوثي كان من المتوقع ان ايرادات القناة تقفز فوق ال 10 مليار دولار وطبعا لو الأوضاع الحالية استمرت متوقع مزيد من الهبوط يعنى ممكن حركة مرور السفن وايرادات القناة تتراجع بأكتر من 70 % ودي ورطة كبيرة جدا ومزنق للحكومة لأنها هتخسر اكتر من 7 مليار دولار كانوا هيدخلوا البلد فى 2024 فى وقت احنا محتاجين فيه لكل دولار عشان ازمة نقص العملة الصعبة

بس الحقيقة دي أزمة خارجية مفروضة على مصر والحكومة مالهاش يد فيها وبتحاول تقلل الخساير بتاعتها لأقل حد ممكن وده لأن القناة مورد من الموارد الهامة للنقد الأجنبي فى مصر