السبت 22 يونيو 2024
رئيس التحرير
عمرو عامر
المشرف العام
عبدالعظيم حشيش
تحليل

حدث خطير وفرصة أخيرة في سوق الدهب.. إيه اللي جاي

الخميس 18/أبريل/2024 - 12:46 ص
الذهب
الذهب



كتير بيسأل سوق الدهب في مصر رايح علي فين.. وليه فيه كلام إن سعر الدهب هيرفع لأرقام قياسية وإيه الحدث اللي مستنياه الصاغة وهل فعلا ممكن السوق يرجع لأيام السوق السودا.. يالا بينا نشوف إيه الحكاية 

تقدر تقول كده إن سوق الدهب ملهوش كبير الأيام دي سواء محليا أو عالميا والأسعار طالعة في العالي ورايحة ناحية الـ3 آلاف دولار للأونصة ومحدش عارف إيه اللي هيحصل في الايام الجاية من مفاجآت لكن الأكيد إنه هيرفع في مصر لنفس الأسباب وفيه توقعات إنه هيفضل يزيد لغاية ما يوصل ل3 ألاف دولار وده قلناه قبل كده في بانكير.. طيب إيه الجديد..

ومعروف إن سوق الدهب حساس جدا ناحية الخطر وإنه فيه عوامل كتير بتأثر على سعره بالزيادة والنقصان زي سعر صرف الجنيه المصري مقابل الدولار الأمريكي واللي بينهم علاقة عكسية كل ما انخفض سعر الدولار، ارتفع سعر الدهب بالجنيه المصري والعكس صحيح.

وضيف للأسباب دي زيادة الطلب العالمي على الدهب كملاذ آمن في فترات عدم الاستقرار الاقتصادي أو السياسي والحروب، بيسبب ارتفاع سعره محليا في مصر وكمان معانا أسعار الفايدة، واللي بتربطها بردو علاقة عكسية وكل ما ارتفعت أسعار الفايدة، انخفض سعر الدهب والعكس بردو صحيح واللي بيأثر بقوة في سعر الدهب في مصر هو العرض والطلب المحلي والاقبال على الشراء واللي بيرفع سعره طبعا وده شفناه في أغلب فترات ارتفاع الأسعار بالصاغة لما كان المعروض قليل والطلب كتير.
كل اللي فات ده معروف وعشناه قبل كده وقانون السوق لكن الجديد اللي محدش واخد باله منه إنه بعد حوالي 25 يوم هتنتهي رسميا مدة مبادرة دخول الدهب مع المغتربين المصريين بدون جمارك وبرسوم رمزية، ولو فاكرين الحكومة مدة المبادرة دي سنة لغاية 10 مايو 2024 عشان تهدي شوية من جنون اسعار الدهب وقت ما كانت الأسعار مولعة بسبب أزمة نقص الدولار واللي وصلت دولار الدهب ل70 جنيه وكانت الأمور خرجت عن السيطرة في الصاغة وساعتها الحكومة فكرت في المبادرة دي عشان تعمل حالة توازن كبير في السوق ونجحت في ده.
والحقيقة المبادرة دي نجحت في زيادة معروض الدهب في السوق المصري وكسر حدة الأرقام القياسية كفاية نقولك إن المصريين في الخارج دخلوا دهب في مصر بكميات كبيرة وصلت لـ4 طن ونص ودي كمية ضخمة جدا وساعدت في السيطرة على الأزمة وإنقاذ الموقف.

خبراء السوق شايفين إن لو الحكومة قررت ما تمدش في المبادرة أكيد هيحصل تأثر كبير بالسلب في اسعار الدهب لأن تدفق المعروض هيقل وفي نفس الوقت الطلب على الدهب هيزيد وده بخلاف طبعا ارتفاع أسعار الدهب عالميا وغير المشاكل اللي حولينا وحالة القلق الكبيرة واللي هتخلي الناس تفكر تستثمر في الدهب وغير إن نشر التوقعات بارتفاع الأسعار للمعدن الأصفر الفترة الجاية خلي ناس كتير تنتبه وتفكر تشتري عشان تبيع بعدين وتكسب، ده غير إن الأزمات علمتنا إن نقص المعروض في أي سلعة بيفتح باب التلاعب في السوق.