أكبر من رأس الحكمة.. ايه حكاية المشروع الصيني اللي هيقلب الدنيا في مصر
ايه حكاية المشروع الصيني الضخم في مصر وهل صحيح هيكون أكبر من مشروع رأس الحكمة وليه الصين اختارت مصر بالذات لتنفيذ المشروع فيها وامتي هيتم الاعلان عنه.. مفاجآت من العيار التقيل هتعرفوها معانا في الفيديو ده
مشروع رأس الحكمة كان فاتحة خير على مصر من كل النواحي ومن بعده فتحت حنفية الاستثمارات عن آخرها وسمعنا وشفنا اتفاقيات بمليارات الدولارات بعد الإعلان عن صفقة رأس الحكمة منها مشروعات ب40 مليار دولار على 10 سنين وانتظار مشروع ضخم في راس جميلة وضخ استثمارات ضخمة في شركة بترول إيطالية والاتفاق على مشروعين ب7 مليار دولار لشركات إيطالية بردوا لكن الجديد بقي كان الكلام عن مشروع صيني جديد وأضخم من مشروع رأس الحكمة..
في الأول بنفكركم إن الصين ليها استثمارات ضخمة في مصر وبتعمل فعلا منطقة صناعية في المنطقة الاقتصادية لقناة السويس اسمها تيدا مصر وفعلاً تم إنجاز جزء كبير منها عشان كده بنقول المشروع الصيني الجديد عشان مايحصلش خلط بين المشروعين.
نرجع لموضوعنا الأساسي وزير التجارة الصيني كان في مصر بعد التوقيع على صفقة رأس الحكمة وقابل الدكتور مصطفى مدبولي وشكل الزيارة كانت مهمة جدا لان بعدها طلع كلام وتسريبات كتير أكدها مسؤول كبير على الهواء مباشرة وهو إن الصين ومصر قربوا يعلنوا عن مشروع ضخم لا يقل أهمية عن صفقة رأس الحكمة لكن في قطاع تانٍ مختلف، وده في القريب العاجل تخيل كده مشروع أكبر من رأس الحكمة واللي استثماراته الإجمالية 150 مليار دولار ممكن يعمل ايه في مصر وهيخلي الدولار عامل إزاي فى مصر واللي مش بعيد يهاجر بره البلد بعد الصفقة الصينية
المهم المسؤول قال إن الحكومة وقعت بالفعل مذكرة تفاهم مع أكبر الشركات في العالم لتنفيذ المشروع واللي هيكون مشترك مع دولة الصين، وهيتم الإعلان عنه قريب جدا وعشان نعرف ضخامة المشروع فهو هيدخل مابين بين 10 إلى 12 مليار دولار سنويًا يعني قد دخل قناة السويس والاهم إن مدة تنفيذ المشروع الصيني هتكون أقل بكتير من مدة تنفيذ رأس الحكمة وده بيدل على جدية الصينيين في الاستثمار في مصر.
المشروع الصيني العملاق هيكون عبارة عن مدينة صناعية وتجارة وليه جانب لوجستي خاص بالتجارة والمواني وهيكون إنقلاب في تجارة الترانزيت في المنطقة، وإن المشروع هيكون على البحر المتوسط للاستفادة من المواني اللي بنتها مصر في الفترة اللي فاتت وهدف المشروع توفير احتياجات السوق المحلي والتصدير للأسواق الأوروبية والأمريكية وده بيدلل على حجم المشروع وحجم العمالة والاستثمارات اللي هتكون فيه .
طيب ليه الصين اختارت مصر بالذات عشان تعمل فيها المشروع.. ده لأسباب كتير جدا أن مصر ليها علاقات تجارية قديمة وعلاقات ممتازه مع الصين والقاهرة كانت أول عاصمة في العالم تعترف بدولة الصين في وضعها الحالي ودا جميل الصينيين مش ناسينه لمصر وكمان لأن مصر عندها بنية أساسية حديثة وموقع جغرافي فريد وخطوط تجارة عالمية تستوعب اي استثمارات تجارية وتصدير واستيراد من خلال شبكة موانئ حديثة ولوجستيات وكمان لأن العمالة في مصر متوفرة ورخيصة وبجانب انخفاض قيمة الجنيه المصري وده اكتر حاجة بتجذب المستثمرين وكمان لأن مصر انضمت للبريكس والصين عضو فعال في التكتل العالمي الضخم وفيه اتفاقيات واقتراحات كتير لتعميق التعاون بين البلدين منها مقترح تسوية المعاملات التجارية بالعملات المحلية للبلدين، ومقترح إنشاء فرع لبنك صيني داخل مصر لتيسير حركة التبادل التجاري بين البلدين.. يعني باختصار كده الصين نازلة بتقلها في السوق المصري وهتقلب الموازين في المنطقة كلها.
