الصفقة السرية لتركي أل شيخ ومليارديرات مصر

هو تركي أل شيخ  رئيس هيئة الترفيه السعودية بيعمل إيه في مصر وايه علاقة منصبه بملفات الاقتصاد والاستثمار وإيه سر الجلسة اللي جمعته مع مليارديرات مصر وايه اللي اتفقوا عليه
 

ترك أل شيخ مسؤول سعودي في النهاية لكن منصب هيئة ترفيهية في المملكة العربية السعودية ومش مسئول كبير أو تنفيذي في المملكة عشان يقعد مع رجال أعمال من العيار التقيل ويتكلم في مشروعات واستثمارات ضخمة لسه سرية ومحدش عارف ايه طبيعتها لكن تعالوا نشوف اللي حصل ايه من ساعات.

الخبر والصورة بتقول إن المستشار تركي آل الشيخ، رئيس هيئة الترفيه بالمملكة العربية السعودية وكان معاه أسامة نقلى سفير المملكة في القاهرة استقبلوا، عدد كبير من رجال الأعمال المصريين لمناقشة العديد من المشروعات المشتركة بين القاهرة والرياض ، وده في حفل عشاء يوم التلات اللي فات، وهنا اللغز إزاي رئيس هيئة ترفيه وحفلات يتكلم في مشروعات مشتركة بين البلدين عامة مش دي المشكلة وطبعا أي تعاون بين مصر والسعودية حاجة تفرح لكن المشكلة في ترك ال شيخ نفسه وعلاقته مع المصريين من ساعة أزمات الكورة والحكاياات اللي اتقالت عنه وتصريحاته المستفزة قبل كده.
وواضح كده إن ترك بيتكلم في مشروعات ضخمة جدا بدليل الأسماء التقيلة اللي راحت استقبلته من رجال الأعمال وتعالوا نشوف كام ملياردير مصري كان قاعد مع تركي ال الشيخ.. أولهم اسطورة العقار في مصر وأفريقيا رجل الأعمال هشام طلعت مصطفى رئيس مجموعة طلعت مصطفى، وصلاح دياب مجلس إدارة مجموعة بيكو، وخد عندك كمان أيمن الجميل رئيس مجلس إدارة "كايرو 3A" للاستثمارات الزراعية، ومحمد السويدي رئيس اتحاد الصناعات المصرية، والملياردير أحمد أبو هشيمة، ومحمد فاروق رئيس مجلس الإدارة والرئيس التنفيذي لشركة Mobica Designs، والهضبة النجم عمرو دياب. 
طبعا حضور الهضبة عمرو دياب بردو لغز من ألغاز زيارة ترك ال الشيخ واللي سبق واتكلم على تأسيس شركة ضحمة للانتاج السينمائي والتوزيع وشكله كده هيسيطر على الساحة الفنية في العالم العربي كله.

الخبر بيقول إن لقاء ترك أل شيخ ومليارديرات مصر تطرقت  لمناقشة عدد من قضايا الاستثمار المشترك بين البلدين وتعظيم التعاون الاستثماري بين القاهرة والرياض، وتحقيق رؤية الدولتين في جذب الاستثمارات وعقد شراكات اقتصادية في الفترة الجاية وطبعا ده كلام مطلق وكبير لكن التفاصيل لسه سرية ومفيش حد اتكلم عنها ودا بردو حاجة غريبة وفيه حاجة تانية ياتري المشروعات دي هتكون في مصر ولا السعودية ولو في مصر فين رجال الأعمال السعوديين وواضح كده وبالعقل إن رجال الأعمال المصريين هما اللي هيعملوا مشروعات في السعودية وياخبر بفلوس بكرة عند تركي هيبقي ببلاش.