الأربعاء 28 فبراير 2024
رئيس التحرير
عمرو عامر
المشرف العام
عبدالعظيم حشيش
فيديو بانكير

تعويم الجنيه هيحصل امتى؟ والدولار سعره هيوصل كام؟

الأحد 11/فبراير/2024 - 12:46 ص
التعويم
التعويم

 

يا ترى قرار تعويم الجنيه ممكن يصدر امتى ؟ وايه السعر المتوقع للدولار؟ وهل كل ده ليه علاقة بقرض صندوق النقد؟ وليه أصلا الصندوق مصمم على تحرير سعر الصرف؟
 


خلاص التعويم جاي جاي وكلها أيام وهيتم الإعلان رسميا عن تحرير سعر صرف الدولار امام الجنيه لان ده كان شرط أساسي من شروط صندوق النقد الدولي عشان يوافق على منح مصر قرض جديد 
والصندوق شايف ان الجنيه المصري متقيم بسعر أعلى بكتير من قيمته الحقيقية 
حد ممكن يسأل وهو ليه الصندوق مصمم على تعويم الجنيه وليه بيتدخل في السياسة النقدية للدول اللي بيمنحها قروض؟
لازم نكون عارفين ان الصندوق مش مؤسسة خيرية ولا بيوزع هدايا أو هبات على حد ..وعشان كده لما بيوافق يدي حد قرض بيكون حريص انه يحط اشتراطات تضمن ان الدولة اللي هتاخد القرض تقدر تسده
والصندوق بيشوف ان الدول اللي بتتدخل لدعم عملتها المحلية وتقديم دعم للمواطنين ممكن ما تقدرش تتمكن من سداد القروض اللي بتاخدها عشان كده لو تلاحظوا الصندوق بقالوا فترة طويلة بيدرس ويشوف برنامج الإصلاح الاقتصادي اللي طبقتوا مصر وبيبص على أدق التفاصيل عشان يتأكد ان الإجراءات الللي خدتها الحكومة ماشية في الطريق الصحيح

والحكومة أعلنت على لسان اكتر من مسئول ان ما عندهاش مشكلة في مرونة سعر صرف الجنيه مقابل الدولار.. بس طبعا الحكومة عندها تحفظات كتير على السعر العادل للجنيه أمام الدولار وعكس الصندوق الحكومة شايفة ان الجنيه مقيم باقل من سعره وان السبب في كده هو أزمة شح العملة الأجنبية وأنه مع توفير سيولة دولارية الوضع هيتغير  ١٨٠ درجة والدولار هيوصل لسعر الحقيقي والعادل مش سعر السوق الموازية المبالغ فيها.

و المسئولين في البنك المركزي طول الوقت بيأكدوا ان تثبيت سعر صرف العملة مش هدف للبنك وان الأهم مواجهة التضخم وتقوية الاقتصاد

وفي الكام يوم اللي فاتوا حصل كام حاجة بتقول ان التعويم بقا أقرب من اي وقت فات وكان آخرها إجراءات وقرارات الحماية الاجتماعية الجديدة واللي شملت رفع الحد الأدنى للاجور وزيادةوالمعاشات وصرف علاوات استثنائية لعدد كبير من الموظفين
وناس كتير اعتبرت القرارات دي قرارات استباقية لتقليل صدمة التعويم ومساعدة الأسر على تحمل تبعات تحرير سعر الصرف.


طب لو التعويم حصل الدولار هيوصل كام؟

فيه اختلاف وتفاوت كبير في تحديد سعر الدولار المتوقع بين أكتر من مؤسسة دولية فيه اللي بيقول هيوصل ٤٠ جنيه وفيه اللي شايف انه مش هيقلل عن ٤٥ جنيه لكن المؤكد ان الزيادة مش هتكون أقل من ٢٠ % على أقل تقديرات.

وايه علاقة اللي هيحصل بمقاوضات صندوق النقد؟
فيه مفاوضات شغالة دلوقتي بين مصر ومسئولي الصندوق .. والمفاوضات شغالة في شقين الأول المراجعة الأولى والتانية للقرض ال ٣ مليار والمعطلة بقالها حوالي سنة كاملة.. والشق التاني رفع قرض ال ٣ مليار والتقديراته انه هيكون بين ١٠ و١٢ مليار دولار 
وطبعا رفع قيمة القرض بالكمية الكبيرة دي هيوفر الدولار ويزود المعروض من العملة الأجنبية وهيخلى سعر الدولار يتراجع