تجارة الانتيكات والعملات القديمة.. كنز في بيت جدك دور عليه
عمرك فكرت إن الراديو أو التلفزيون القديم اوووي أو الساعة بكتينة وعملات العصر الملكي وأي انتيكة اللي في بيت جدك ممكن يخليك صاحب ثروة.. ايوا ده ممكن يحصل.. تعالى نقولك ازاي
زي ما فيه ناس مهووسة باللوحات الفنية والعربيات القديمة فيه ناس كتير بتعشق اي حاجة قديمة وممكن تشتريها باي تمن هواية بقى زي اي هواية تقول ايه وكمان لو متعرفش مواقع الانترنت مليانة صفحات بتدور على الحاجات القديمة اووي زي الانتيكات والساعات والأجهزة الكهربائية والمنزلية القديمة وخاصة اللي بترجع للفترة الملكية في مصر وشفنا مزادات بتوصل فيها الحتة الواحدة لمليون جنيه.
تقدر تروح دلوقتي على بيت جدك القديم وتفتش واكيد هتلاقي حاجات قديمة ممكن تغير حياتك والموضوع مش هزار ولا نصب لأن فيه ناس معاها فلوس ومستعدة تدفع مبالغ عشان تجمع الحاجات دي ومنها الراديو القديم اوووي والتليفون ابو متفلة وساعة بكتينة وعملات العصر الملكي والاباجورات القديمة وكل حاجة قديمة تقدر تستغلها وتبيعها
طيب هتبيعها ازاي.. شوف ادخل على المواقع المتخصصة في شراء وعرض الحاجات القديمة وهيساعدوك في مقابل نسبة وكل اللي عليك انك تصور الحاجة اللي عندك صور كويسة وتبعتهالهم مع بيانات للحاجة اللي هتبعت صورها زي سنة الصنع والموديل والحالة بتاعتها وبعدين هيجيلك رد بالسعر اللي وصلته ولو اتفقت على السعر مع ادمن الصفحة بيتفق معاك على معاد ومكان التسليم.
