لو معاك 19 مليون انت فقير.. اللي علي راسهم ريشة في البنوك
زمان كان اللي معاه 1000 جنيه يبقى من الأعيان ولما وصلت لمليون بقي اسمه مليونير ودا كان لقب نادر جدا وبيعادل ملياردير دلوقتي بالمقارنة بأسعار العملة زمان.. البنوك طلعت تعريف جديد للغني والمليونير ومش أي حد معاه مليون يبقي مليونير... عشان متوهش معانا تعالي نقولك الحاكية اصلها إيه
شوف ياسيدي عادة في البنوك بيتم تصنيف العملاء حساب أرقام حساباتهم أو معاهم قد إيه في حسابهم البنكي وبناء عليه بيتم منحهم مزايا بنكية حسب ثروتهم في البنك..
وفي الفترة الأخيرة لما زاد عدد العملاء اللي معاهم حسابات بالمليون قررت البنوك تغير طرح منتجاتها البنكية الجديدة والمُصممة خصيصاً للعملاء «الأكثر ثراءً»، يعني البنوك بتدي مزايا للعملاء اللي عندهم حسابات ضخمة تحديدا وعشان كده قررت تستبعد اللي ثروته أقل من 20 مليون جنيه، وتعتبره عميل عادي.
وحددت بعض البنوك أرصدة حسابات الشريحة من العملاء بحد أدني بين 5 ملايين إلى 20 مليون جنيه، حتى يتم احتسابهم من العملاء الأكثر ثراءً، وتقدم لهم خدمات مصرفية مميزة.
وفى نفس الوقت بتستمر البنوك في تقديم منتجات إدارة الثروات للعملاء الأقل ثراءً واللي في حسابهم المصري بين 500 ألف وحتى 2 مليون جنيه.
وتعالوا نشوف تصنيف المليونيرات في بعض البنوك .. أول حاجة بنك "أبو ظبي الإسلامي- مصر" حدد رصيد حساب يبدأ من 20 مليون جنيه أو ما يعادلها بالعملات التانية، عشان العميل يدخل في قايمة "النخبة" أوأصحاب الحسابات الكبيرة أو كبار العملاء.
والبنك بيقدم لشريحة الصفوة دي مزايا زي ما قلنا منها "خدمة المستشار المالي" وخدمة المساعدة الشخصية "الكونسيرچ" على مستوى مصر ومنطقة الشرق الأوسط لتلبية احتياجاتهم اليومية المختلفة، بما فيها ترتيبات السفر وحجوزات الفنادق والمطاعم.
كمان بيوفر بنك ابو ظبي 20 صالة استقبال لتلبية احتياجات كبار العملاء بفروع المصرف في جميع المحافظات.
وفي البنك الأهلي المصري فحدد بردوا 20 مليون جنيه أو ما يعادلها بالعملات الأجنبية، رصيداً لعملاء "البلاتينيوم بلس".
وبيتيح البنك الأهلي لعملاء النخبة حزمة خدمات منها صالة استقبال حصرية بمطار القاهرة الدولي للعميل وعائلته، وكمان تخصيص صالات استقبال في مختلف فروع البنك وفي نفس الوقت البنك بيسمح بتطبيق أسعار فايدة استثنائية على التسهيلات الائتمانية والقروض... وده غير الإصدار المجاني لبعض بطاقات البنك، والإعفاء من بعض الرسوم عن البطاقات او التحويلات وخفضها على تأجير الخزائن.
ونورح لبنك القاهرة واللي بيضم العملاء أصحاب أرصدة حسابات لا تقل عن 20 مليون جنيه بردة أو ما يعادلها بالعملات الأجنبية إلى الأثرياء.
وبيقدم البنك ليهم "خدمة ثروة" وخدمات تانية زي
إصدار بطاقة الخصم البلاتينية وبطاقة ائتمان World Elite، وإصدار دفتر شيكات مصمم خصيصاً لعملاء "ثروة".
وهننهي الحكاية في بنك الإمارات دبي الوطني-مصر واللي بيعتبر عملاءه اللي في رصيدهم 10 مليون جنيه من النخبة".
وبيقدم البنك لعملاء النخبة إصدار بطاقات خصم مجاناً ودخول صالات كبار الزوار في عدد كبير من المطارات الدولية. وكمان إتاحة خصومات 30% لعدد من المطاعم ومحلات الملابس الكبري، كما يوفر البنك دفتر شيكات مجاناً.
ووصلنا لنهاية الحكاية في بنك مصر واللي اعتب 5 مليون جنيه رصيد أو ما يعادلها بالعملات الأجنبية لجميع حسابات العميل في بنك مصر يكون عميل مميز.
ويتيح البنك لعملاء الشريحة دي مدير مختص للمساعدة في إدارة الثروة، كما يوفر البنك صالات VIP لخدمة كبار العملاء، ومركز اتصال مخصص لهم
كمان بيوفر بنك مصر مجموعة من قروض رجال الاعمال زي القروض الشخصية غير المضمونة بأسعار فايدة خاصة، وإصدار دفتر شيكات مجاناً. وده عير الإعفاء أو تخفيض الرسوم والعمولات المصرفية.
