ذهب إفريقيا في خزائن مصر.. بنك ومصفاة بالقاهرة لتكرير وتخزين وتداول الذهب

ذهب إفريقيا ممكن يبقى في مصر.. والقاهرة تستعد لمشروع كبير يحولها لمركز لتكرير وتخزين وتداول الذهب الإفريقي.

الفكرة ببساطة إن مصر تدرس إنشاء "بنك الذهب الإفريقي"، مش بنك عادي للأفراد، لكن منظومة متكاملة للذهب تبدأ من تكريره وتنقيته وتحويله لسبائك، لحد تخزينه وتأمينه وتمويله وتداوله.

يعني الذهب اللي بيطلع من مناجم دول إفريقية ممكن ييجي مصر، يتكرر ويتحول لسبائك بمعايير دولية، وبعد كده يتخزن في خزائن مؤمنة أو يدخل في عمليات التجارة والتمويل.

والأهم إن المشروع هيضم كمان مصفاة ذهب داخل منطقة حرة، باستثمارات متوقعة من 50 لـ100 مليون دولار، على أن يبدأ تنفيذها قبل نهاية 2026، والإنتاج مستهدف يبدأ في 2027 أو 2028.

المشروع بيقوده البنك المركزي المصري بالتعاون مع أفريكسيم بنك، ولسه اختيار مصر كمركز للمشروع مرتبط باستكمال دراسة الجدوى والحصول على الموافقات المطلوبة.

ولو المشروع اتنفذ، مصر ممكن تستفيد من مراحل كتير في سلسلة الذهب.. من التكرير وصناعة السبائك، لحد التخزين والتأمين والتمويل والتداول.

يعني الحكاية مش مجرد مصفاة ذهب.. دي محاولة لتحويل مصر لمركز إقليمي لحركة ذهب إفريقيا.