بعد قرارات الخميس الحاسمة.. تحرك عاجل من البنوك في ملف الشهادات
يا ترى ايه اللى هيحصل فى بنوك مصر بعد رفع الفايدة 2% ؟ وهل ممكن يتم طرح شهادات جديدة بفايدة مرتفعة ؟ وايه سعر الفايدة المتوقع على الشهادات الجديدة ؟ وايه سيناريوهات التعامل مع قرار البنك المركزي الأخير؟
فيه حاليا حالة من حالات الطوارئ داخل أروقة البنوك المصرية ولجان الاليكو او لجان الاصول والخصوم بدأت تتحرك بسرعة لمناقشة السيناريوهات المحتملة لللتعامل مع اسعار الفايدة وايه افضل شهادات ممكن يتم طرحها وامتى توقيت طرحها المظبوط بعد قرار البنك المركزي برفع اسعار الفايدة 200 نقطة أساس فى اول اجتماع للجنة السياسة النقدية فى 2024
طب ايه السناريوهات اللى بيتم دراستها فى البنوك؟
فيه سيناريو فارض نفسه بقوة وهو الأقرب للتنفيذ لو حصل تحريك فى سعر الصرف والسيناريو ده ببساطة هيكون طرح شهادة استثمار جديدة بفايدة 35% وفي دراسة اتعلمت داخل البنوك بتقول أن أنسب فايدة على الشهادة الجديدة مينفعش تكون اقل من كده .. ودة عشان إعادة الثقة في الاستثمار في الجنيه والسيطرة والتحكم فى السيولة الموجودة فى السوق من خلال جمعها واستثمارها فى البنوك لتخفيف الطلب على شراء السلع واللى بدوره هيؤدي الى انخفاض فى معدلات التضخم لأن اى حد معاه فلوس هيحطها فى الشهادة الجديدة وياخد عائد 35% يعنى لو معاك مليون جنيه وحطتهم فى البنك هتاخد عليهم فى السنة ارباح حوالى 350 الف جنيه وده رقم ضخم جدا صعب اى استثمار تانى يحققه
هل هتكون شهادة ال 35 % هي الشهادة الوحيدة اللى هيتم طرحها ؟
لا فيه كمان كلام وتفكير فى طرح شهادة بالدولار بعائد هيتراوح بين 11 و12 % والشهادة دي المستهدف منها المصريين فى الخارج وجذب تحويلات المغتربين للاستثمار فى أوعية ادخارية داخل البنوك بدل من دخول تحويلاتهم الى السوق السودا
وفيه كمان تفكير فى رفع الفوايد على حسابات التوفير وفيه بنوك هتطرح حسابات جارية بفوايد كبيرة
يعنى من الاخر هنشوف خلال الايام القليلة القادمة قرارات قوية لضبط الفوضى اللى بتحصل فى سوق الصرف واللى ليها انعكاسات على كل قطاعات الحياة فى مصر.
