فضيحة الدهب.. السبايك نحاس ومضروبة وغسل أموال

 
 
ايه حكايه أكبر عملية نصب في الصاغة بتحصل دلوقتي وايه حكاية سبايك الدهب المضروبة في الأسواق وازاي تجار دهب حققوا ثروة من بيع النحاس على إنه دهب.. كل ده وغيره هتلاقوه عندنا.
 

 
أكيد كلنا شفنا اللي بيحصل في سوق الدهب واللي وصلت لارقام قياسية وقربت على 4 آلاف جنيه لعيار 21 وشفنا ازاي السعر بيقفز في كل ساعة وطالما دا بيحصل يبقي فيه حاجة مش طبيعية والحكاية فيها إن وألف إن كمان ولدرجة محدش بقي فاهم حاجة لأن الأسعار بتزيد وفي نفس الوقت الناس بتشتري..
من حقك تشتري دهب بالغالي حتى لو كانت الأسعار مش مبررة ومحدش يقدر يقولك حاجة لكن الكارثة بقي هو صحيح أنت اشتريت دهب حر ولا باعولك الوهم والسبايك اللي في ايدك نحاس مش دهب أصلي.. الحكاية إن فيه تجار من العيار التقيل وكمان صاغة بير سلم استغلوا الأزمة وجنون الناس على شراء السبائك وقرررا يغشوها ومحدش هياخد باله في الزحمة دي .

وحسب المعلومات تجار كبار  في سوق الدهب تلاعبو في السبايك وإن معظم السبايك مطلية بالنحاس وبكده اللي أشتري دهب سواء بالسعر الغالي الدهب الأصلي أو المغشوشة خسر فلوسه و في شكاوي كتير في الموضوع ده  بعد ما اكتشفوا تعرضهم للنصب ومحدش قدر يعملهم حاجة، وكل اللي اشترى دهب في الفترة الأخيرة خاصة السبايك يرجع يفحصها عن حد أمين بسرعة ويكون خبير دهب لأن السبايك المضروبة مغشوشة بعناية كويسة جدا واي حد ممكن يتغش فيها.

سبايك الدهب المضروبة بتاخدنا على طول للدولار المضروب بردوا لأن الحاجتين ليهم علاقة ببعض والعملات المزيفة مع الدهب المضروب وجهين لعملة واحدة لأن الدولار المزيف  أو المجمد اللي ممنوع التعامل عليه بيدخل سوق الدهب في السر وتجار بيشتروا بيه والنتيجة ناس بتحقق ثروات بالملايين كل صبح وناس بيتنصب عليها عشان صدقت إن البلد بتوقع والاقتصاد بينهار والحقيقة اللي بيحصل في السوق دا غير منطقي ومحدش عارف يفسره .. لكن الحقيقة إن سوق الدهب بقي سوق مفتوح على البحري لجرائم غسل الأموال والنصب بشكل كبير.