ملف الأسعار يطيح بـ 10 وزراء.. كواليس الساعات الأخيرة لحكومة مدبولي
فيه تحركات مكثفة جدا بتحصل فى الايام اللى فاتت لانهاء ملف التشكيل الوزاري الجديد خصوصا مع استمرار معاناة المصريين من ارتفاع اسعار السلع الأساسية وفيه معلومات حصلنا عليها فى بانكير بتقول انه هيتم الاطاحة ب 10 وزراء معظمهم بيتولوا حقائب وزارية خدمية وما قدموش حاجة تشفعلهم فى الاستمرار.. بس يا ترى مين هما ال 10 وزراء دول ؟ وايه اللى مأخرلا الاعلان عن رحيلهم ؟ ومين الناس اللى هتحل محلهم؟
الرئيس السيسي وهو بيستعد لولايته الجديدة فى رئاسة مصر بيفكر فى حياة الناس اللى بقت صعبة والأسعار اللى بتنغص حياة المواطن وعشان كده بدأ من بدري يجهز لاختيار وزراء قادرين على تنفيذ أفكاره وعندهم حلول للأزمات الكتير اللى بتمر بيها مصر
وزي ما قولنا لحضراتكم قبل كده صحيح الدستور ما ألزمش الرئيس بحاجة فيما يتعلق بتشكيل الحكومة بعد إعادة انتخابه لكن جرى العرف ان مع اى ولاية جديدة الرئيس بيختار حكومة جديدة أو على الأقل يعمل تغييرات وزارية لضخ دماء جديدة واقالة الوزراء اللى فشلوا في تحقيق المهام المكلفين بيها
ووفقا لمعلومات بانكير الجهات الرقابية بالتعاون مع الأجهزة المعنية شغالين على ملف التشكيل الوزراي الجديد بتكليف من رئيس الجمهورية وحاليا بيتم فحص السماء المرشحة لتكليفها بالحقائب الوزارية وتم الاستقرار على بعض الأسماء بالفعل وتم ارسالها الى مكتب رئيس الجمهورية انتظارا لاستكمال باقي الأسماء
والتغيير المرة دي هيطول كل الوزراء اللي ما نجحوش في تحقيق المهام اللى كلفهم بيها الرئيس وكمان الوزراء اللى فيه غضب شعبي من أدائهم ومش هيتم الابقاء غير على الوزير اللى حقق نجاحاته فى وزارته وعمل طفرة ودول الحقيقة عددهم مش كبير
طب مين الوزراء اللى هيمشوا ؟
بنسبة كبيرة تم الاستقرار على رحيل وزير التموين على مصيلحي اللى وزارته فشلت فى كل الملفات اللى ليها علاقة باسعار السلع الأساسية زي السكر والرز والزيت وغيرهم من السلع اللى بيعتمد عليها المصريين فى حياتهم اليومية.
كمان من الوزراء اللى هيرحلوا وزير التربية والتعليم اللى ما قدمش اى اضافة فى ملف تطوير التعليم بالاضافة الى استمرار المشاكل المتعلقة بالمدرسين والمباني التعليمية والمناهج وبعبع الثانوية العامة
وفى قايمة الوزراء الراحلين اسم وزير الزراعة اللى ما قدمش أى حاجة خصوصا فى ملف المحاصيل الاستراتيجية زي القمح والقصب والدرة بالعكس الفلاحين بيشتكوا مر الشكوى من سياسات الوزارة
ومن اهم الوزراء اللى هيغادروا الحكومة وزيرقطاع الاعمال العام ووزير التجارة والصناعة ووزيرة الثقافة ووزيرة التضامن الاجتماعي ووزير العمل وفيه كلام كمان عن الاطاحة بوزير المالية
طب ايه موقف الدكتور مصطفى مدبولى رئيس الحكومة هل مكمل ولا هيمشي؟
لحد اللحظة اللى بنكلم حضراتكم فيه فرص بقاء مدبولى متساوية مع رحيله يعنى ممكن يمشي وممكن هو اللى يشكل الحكومة الجديدة لكن لو قعد معظم الوزراء اللى شغالين معاه هيمشوا
وامتى هيتم الاعن التشكيل الوزاري الجديد ؟
خلاص حاليا بيتم وضع الرتوش النهائية على التشكيل الجديد للحكومة وخلال أيام قليلة هيتم الإعلان عن أسماء الوزراء الجدد في كافة الحقائب الوزارية
