فك شفرة السوق السوداء للدولار.. المركزي اتحرك خلاص
كشفنا لحضراتكم من فترة بعض الالاعيب اللى بتعملها مافيا العملة لحرمان مصر من أهم مورد للدولار.. وقولنا لحضراتكم ان بقا فيه عصابات منظمة فى الخارج بتسطو على تحويلات المصريين فى الخارج وبتمنع دخول مليارات الدولارات للبلد فى وقت محتاجين فيه كل دولار بسبب ازمة شح العملة اللى مصر بتعاني منها بقالها سنتين تقريبا.. والجديد بقا ان البنك المركزي بدأ يتحرك بقوة فى الملف ده وبدأ يعمل ضربات استباقية ويحاصر العصابات دي وخلال أيام هيكون فيه اخبار حلوة جدا للمصريين فى الخارج.. فيا ترى ايه اللى هيحصل الايام الجاية؟ وازاى البنك المركزي يوقف الاعيب تجار العملة؟
وفقا لاخر بيانات رسمية صادرة عن البنك المركزي تراجعت تحويلات المصريين العاملين في الخارج خلال العام المالي 2022-2023، بنسبة 30.8% على أساس سنوي
أظهرت بيانات البنك المركزي المصري بشأن معاملات الاقتصاد مع العالم الخارجي تراجع تحويلات المصريين العاملين في الخارج خلال العام المالي الماضي، إلى 22.1 مليار دولار، مقابل 31.9 مليار دولار السنة اللى فاتت .. يعنى فى سنة واحدة بس مصر اتحرمت من دخول 10 مليار دولار من تحويلات المصريين فى الخارج
وعشان تعرف ضخامة الرقم اللى استولى عليه تجار الدولار وحرموا منه مصر كفاية تعرف ان مصر بقاله اكتر من سنة فى شد وجذب مع صندوق النقد الدولى على قرض ب 3 مليار ما خدناش منه غير شريحة واحدة بقيمة 350 مليون دولار ولسه الصندوق بيماطل فى موضوع المراجعة الاولى والتانية للقرض وعشان كده مصر ما اتمكنتش من صرف باقي الشرايح لحد دلوقتي
طب ازاى عصابات الدولار بتستولى على تحويلات المصريين فى الخارج؟
العصابات دي بتشتغل على الدولار من المنبع يعنى ليهم ناس بره مصر بيتواصلوا مع المغترب ويشتروا منه الدولار بأعلى حتى من سعره فى السوق السودا وبيشترطوا عليه يسلمهم الدولار بره مصر ويسلموا أسرته هنا السعر بالمصري وده السبب الأساسي فى تراجع تحويلات المصريين فى الخارج بالشكل الكبير اللى حصل فى اخر سنة وخد بالك ان تحويلات العاملين فى الخارج هي أكبر مصدر للدولار بالنسبة للحكومة بعد الصادرات
حد هيسال ويقول والبنك المركزي والحكومة فين من اللي بيحصل؟
خد بالك انت هنا بتحارب عصابات مش سهلة وكمان العصابات دي نقلت معركتها مع الحكومة للخارج يعنى بقت خارج سيطرة الجهات الرقابية وده اللى مصعب المواجهة بس البنك المركزي مش ساكت وبيحاول يشوف حلول ويواجه اللى بيحصل بسياسات نقدية تعيد ثقة المصريين فى الخارج وتخليهم يرجعوا يحولوا فلوسهم من خلال البنوك .. وفى الايام الجاية هتصدر عدد من القرارات المهمة وهتتاخد اجراءات قوية لجذب أموال المصريين فى الخارج وهيكون فيه اوعية ادخارية وشهادات استثمار بعوايد مرتفعة جدا
وحاليا بيتم التنسيق على اعلى مستوى بين البنك المركزي واكتر من وزارة على راسهم وزارة الهجرة لطرح منتجات ادخارية تناسب احتياجات المصريين فى الخارج .. والبنك المركزي بيعمل كمان على سد الفجوة بين السعر الرسمي للدولار فى البنوك وسعره فى السوق الموازية عشان يخلي مفيش فرق كبير يخلى المغترب يروح للسوق السودا.
