خللي بالك قبل تشتري.. إيه الفرق بين الدهب المصري والسعودي ومين شلة المنتفعين

 

مش كل اللي بيلمع يكون دهب أصيل ومش كل الدهب واحد، وقبل ما تشتري لازم تعرف إنت بتشتري ايه من الصاغة وهل فيه فرق بين الدهب المصري وغيره وليه لازم نعرف الفرق وايه هي شلة المنتفعين اللي دمرت سوق الدهب المصري 
 

 
شفنا اللي حصل في الدهب اليومين اللي فاتوا وازاي حاله انقلب بين ساعة والتانية ووصلت الزيادات في يوم واحد 700 جنيه وحصل زي زلزال في الصاغة ولسه الأسواق مش مستقرة وشكلها هتقعد وقت كبير على الحال دا بسبب تقلبات اسعار الدهب عالميا وأسعار الدولار والمعاملات المشبوهة .. وخلينا نوقف شوية عند كلمة المعاملات المشبوهة في سوق الصاغة المصري واللي كشف جزء منها رئيس منصة اي صاغة لتسعير الدهب والمجوهرات امبارح وقال إن اللي بيحصل في السوق دا مش طبيعي ومهما كانت اسعار الدولار وأسواق الدهب عالميا لكن الأسعار زادت بشكل كبير جدا بسبب ممارسات التلاعب في الصاغة وشلة المنتفعين زي ما وصفها اللي طبعا بتستغل فترة ارتفاع الأسعار وبتقلل المعروض من الدهب عشان السعر يزيد اكتر وفي نفس الوقت تسرب الإشاعات على أسعار الدهب بأرقام كبيرة على عكس الأسعار الحقيقة والنتيجة خلق اسعار وهمية وعشان كده منصات تسعير الدهب خدت قرارات بوقف إعلان التسعير بسبب اللي بيحصل.

السؤال المهم هنا مين شلة المنتفعين وليه الحكومة سيباهم لغاية دلوقتي وليه بقى في كل سوق شلة منتفعين وشفنا هم في سوق السكر والبصل وقبلهم في السجاير والزيت.. لكن خلينا نقول لحضراتكم الاجهزه الرقابية شغالة كويس جدا بس ما ينفعش تقبض على اي حد من غير أدلة كافية وشفنا ازاي عصابات السكر وقعت وفيها مسؤولين كبار ومهمين يعني مفيش حد فوق القانون وكله هيتحاسب .

ونرجع لسؤالنا في أول التقرير عن الفرق  بين الدهب المصري والسعودي، .. عامة مفيش فرق كبير اووي ومثلا هتلاقي إن الاتنين  بنفس الأعيرة: لأن صناعة العيار حاجة ثابتة دوليًا، فيه 18، و21، و14، و24، ومصر زي السعودية. لكن بيكون فيه فرق في  التشكيل والمصنعية والدهب المصري معروف بالجودة العالية عن باقي أنواع الدهب في المنطقة  وقال  نادي نجيب، سكرتير شعبة الدهب بغرفة القاهرة التجارية، إنّ الدهب المصري  من أفضل أنواع المعدن الأصفر في تصنيعه، خاصة في مدى اندماجه مع العناصر التانية المضافة له، كما أنه واحدًا من الأنواع المشهورة بكفاءتها وجودتها، وقال إن المواد اللي  بتضاف للذهب هي التي تتحكم في السعر. 

وبحصوص اللمعان فالدهب السعودي بيلمع  أكبر ودا بيرجع إلى إنّ لونه مائل للاصفرار الصريح، السبب هو الصناعة والتلميع فقط. .. ومعروف ان الحكومة سبق واعلنت إعفاء واردات الدهب مع القادمين من الخارج من الجمارك والرسوم فيما عدا ضريبة القيمة المضافة، وهو ما دفع العديد من السيدات، للسؤال حول أفضل نوع ذهب، وأسعاره، والفرق بينه والذهب المصري، خاصة بعدما تراجعت أسعار جرام الذهب في السعودية ليباع عيار 24 قيراطًا بسعر 242.47 ريال سعودي، ما يعادل 64.67 دولار أمريكي والعيار 21 بحوالي 214 ريال يعني بحوالي1900جنيه مصري يعني اقل من سعر الجرام في باكتر من1200 جنيه لأن سعر الجرام في مصر النهارده 3225 جنيه .