تفاصيل صفقة بيع الفنادق التاريخية.. وانتهاء أزمة القرض
متابعينا الكرام في كل مكان أهلا وسهلا بكم على منصات بانكير وجولة جديدة لأهم الموضوعات الاقتصادية محليا ودوليا وقراءة جديده في أخبار الدولار والذهب والأسواق واللي قدمتها وحدة بانكير للأبحاث والتقارير على مدار اليوم الأربعاء 20 ديسمبر 2023.
وقدمت منصات بانكير النهاردة عدد من التقارير المهمة في الشأن الاقتصادي المصري، كان من بينها ترقب دخول 3 مليار دولار لمصر وإنها بشاير ولاية السيسي الجديدة.
وسلط التقرير الضوء على اللي حصل في الساعات الأخيرة اللي شهدت مفاوضات مكثفة بين الحكومة المصرية وصندوق النقد الدولي وتقدر تقول كده بنسبة ٩٠% مصر حصلت على موافقة الصندوق برفع قيمة البرنامج التمويلي اللى كانت متفقة عليه مع الصندوق من ٣ إلى ٦ مليار دولار .. وده بعد اقتناع مسئولي الصندوق بأهمية ومكانة مصر في الشرق الأوسط ودورها المهم والفاعل في القضية الفلسطينية ورفضها القاطع لسيناريو تهجير الفلسطينين.
كمان دور مصر المهم جدا في إدخال المساعدات الإنسانية لسكان قطاع غزة والتنسيق مع كل دول العالم فى الملف ده.
وده اللى خلا لغة الصندوق مع مصر تتغير ١٨٠ درجة لدرجة ان مديرة صندوق النقد طلعت بنفسها وقالت ان تحرير سعر صرف الجنيه مش أولوية حاليا بالنسبة للصندوق وان الأهم مساعدة مصر على مواجهة التضخم وانقاذ اقتصادها من أى أزمات.
طب الكلام ده معناه ايه؟
الكلام ده معناه ان مصر هتحصل على ٣ مليار دولار دعم إضافي من الصندوق كمان مصر هتقدر تاخد تمويل من جهات تانية بناء على تغير موقف صندوق النقد واللي بيعتبر موافقته بمثابة شهادة ضمان واطمئنان على اقتصاد الدول اللي بيقرضها
منصات بانكير قدمت تقرير بخصوص مفاجأة الموسم وطرح مصر لسندات بالعملات الخليجية لأول مرة..
التفاصيل بتقول إنه في الفترة الأخيرة مصر بتواصل التوسع في أسواق الدين الدولية.. ومن ساعات فجر وزير المالية مفاجأة الموسم باعلانه إن مصر بتدرس حالياً طرح سندات بالعملات الخليجية في وقت يعتبر ارتفاع تكلفة التمويل أحد أبرز التحديات اللي بتواجه الحكومة بعد خفض التصنيف الائتماني للديون السيادية المصرية.
وزير المالية محمد معيط قال في تصريحات صحفية إن فيه دراسات بتتعمل لطرح سندات بالعملات الخليجية خلال الفترة الجاية، وقال ان ده هيحتاج تنسيق مع المستشارين والمحامين لدراسة كل الجوانب قبل الإعلان عن الموضوع بشكل رسمي.
معيط قال على هامش مؤتمر "استثمار الطاقات الكامنة" إن الحصول على تمويلات بتكلفة معقولة ما بقاش امر سهل خالص بسبب التصنيف الائتماني لمصر والسياسة النقدية المتشددة
وفي مطلع الشهر اللي فات أصدرت الحكومة المصرية سندات "ساموراي" مقومة بالين في السوق اليابانية تعادل قيمتها 500 مليون دولار لمدة 5 سنوات وبعائد سنوي 1.5%، وقبلها في أكتوبر سندات "باندا" في السوق الصينية بعملة اليوان بقيمة 500 مليون دولار أيضاً بعائد بلغ 3.5% سنوياً لأجل 3 سنوات
وحدة أبحاث بانكير قدمت النهاردة تقرير مختلف عن عالم الانستاباي.. وقصة أهم اختراع مالي في 2023 وإزاي التعاملات المالية للمصريين هتكون أغلبها الكترونية ومحدش هيشيل فلوس في محفظته تاني.
وقال التقرير إن فكرة تطبيق الانستاباي اللي أطلقه البنك المركزي بتعتمد على إجراء كل المعاملات المالية في البنوك والمحافظ الالكترونية وكروت الدفع والتسوق الإلكتروني وكافة التحويلات عن طريق الموبايل اللي في ايد حضرتك من غير ما تتعب وتروح البنك وتوقف في طوابير أو تغامر وتشيل مبالغ كبيرة .
وأعلن المركزي المصري وبالأرقام نجاح الانستاباي في مصر بطريقة تفوق الوصف خلال الفترة القليلة دي والمصريين استوعبوه بشكل كبير ولدرجة إن المصريين حولوا أو تعاملوا على تطبيق “انستا باي” للمدفوعات اللحظية بقيمة 130 مليار جنيه منذ إطلاقه في مارس 2022 وحتى نهاية مارس 2023.
وزي ما احنا عارفين إن المنظومة الوطنية للمدفوعات اللحظية (IPN) واللي تم إطلاقها في مارس 2022 هي واحدة من أهم مشروعات البنية التحتية لنظم الدفع اللي بيرعاها البنك المركزي واللى تم تصميمها لتكون بديلا للمدفوعات النقدية ولإتاحة كافة خدمات التحويلات للعملاء لحظيا طوال أيام الأسبوع.
وكشف البنك المركزي إن عدد حسابات محافظ الهاتف المحمول وصل إلى 32 مليون حساب بنهاية مارس 2023 ووصل إجمالي عدد العمليات اللى تمت خلال مارس 2023 حوالي 71 مليون عملية بقيمة تقدر بنحو 90 مليار جنيه.
التقرير الأخير معانا النهاردة بخصوص صفقة المليار دولار و300 مليون دولار اللي تمت في مصر النهاردة والخاصة ببيع حصة من الفنادق التاريخية لشركة تابعة لرجل الأعمال هشام طلعت مصطفي أحد أهم رجال الأعمال في مصر وهي شركة "ايكون" .
وعرض تقرير بانكير تفاصيل الصفقة الضخمة بين الحكومة ممثلة في صندوق مصر السيادي وبين مجموعة شركة رجل الأعمال الشهير هشام طلعت مصطفى .
والتفاصيل بتقول إن مجلس الوزراء برئاسة الدكتور مصطفى مدبولي وقع النهاردة الأربعاء عقود صفقة بيع 7 فنادق تاريخية لصالح شركات تابعة لمجموعة طلعت مصطفي «الشركة العربية للاستثمارات الفندقية والسياحية- ICON».
وزي ما احنا عارفين إن من بين أهداف انشاء الصندوق هو تطوير أصول مصر وإعادة تأهيل الثروات المهملة وتنميتها بمعني إن الصندوق بيشوف اي اصل من اصول الدولة بيكون محتاج تطوير زي فندق قديم مثلا بس تاريخي أو مبني وزارة في منطقة مهمة حيوية فبتكون مهمته إنه ياخد الأصل دا أو المبني ويطوره وبعدين يطرحه للبيع في السوق المصري وبكده الدولة تكسب والصندوق يكبر موارده والأصل نفسه أو المبني بترجعله الحياة وبيضاف للثروة العقارية المصرية.
نرجع للصفقة الضخمة واللي بتقول إن «إيكون» قادت تحالف كبير لإتمام صفقة الاستحواذ على حصة إضافية في شركة الفنادق التاريخية المصرية لترفع حصتها في الشركة إلى 51%.
وحسب المعلوما قائمة الفنادق في الصفقة بتتضم، سوفيتيل أولد كتراكت أسوان، منتجع موفينبيك أسوان، سوفيتيل وينتر بالاس الأقصر، فندق شتايجنبرجر التحرير، وشتايجنبرجر سيسيل الإسكندرية، وفندق ماريوت مينا هاوس وفندق ماريوت القاهرة.
وقالت مصادر قريبة من الصفقة إن شركة ايكون سددت قيمة زيادة رأس المالي للفنادق الـ 7 بقيمة 1.3 مليار دولار بعد ما كانت قدمت في وقت سابق بعرض للأستحواذ علي النسبة الأكبر بالشركة الحكومية المالكة.
وتضمنت الصفقات بيع حصة 37% من الشركة القابضة للسياحة والفنادق المالكة للفنادق عن طريق زيادة رأس المال لتحالف يضم شركة تابعة لمجموعة طلعت مصطفى بقيمة 1.3 مليار دولار.
