أغلى قبر في مصر.. سعره مليون ونص وفي كومباوند مليان خدمات
فى الساعات الأخيرة انتشر على منصات التواصل الاجتماعي صور لمقابر جديدة فاخرة طرحتها احدى الشركات العقارية الكبرى وصل سعر القبر فيها الى مليون ونص المليون جنيه قابلة للزيادة.. والمقابر دي هتكون فى كومباوند متكامل الخدمات.. فيا ترى ايه حكاية المقابر دي ؟ وليه أسعارها مرتفعة جدا كده ؟ وأماكنها فين في مصر؟ ومين اللى ممكن يشتريها؟
مجموعة طلعت مصطفى طرحت مؤخرا مقابر "البستان" اللى بتقع على طريق السويس في المنطقة المواجهة لمدخل العاصمة الإدارية الجديدة.. والمقابر هيكون ليها مدخل من الجزء الجنوبي من مدينة مدينتي ومساحة القبر هتوصل الى 40 متر وسعره حوالى مليون ونص قابل للزيادة بأنظمة تقسيط حتى 12 شهر
وبتتمتع المقابر بخدمات خاصة ومتكاملة من مسجد ودار مناسبات وجراج ومنطقة خدمات ومبني إدارة بالإضافة كمان صيانة دائمة وشكل موحد لجميع الوحدات وآيات قرآنية على كافة المقابر
ومساحة "الحوش" هتكون فى حدود 40 متر بإجمالي 10 عيون بنظام اللحود المتعارف عليها وهيتكون من 8 عيون، 4 للنساء و4 للرجال، بالإضافة إلى عضامتين بشرط شراء الحوش كامل ويسلم كامل التشطيب وتشطيب خارجي من الرخام
وهتقدم الشركة أنظمة سداد مختلفة منها نظام الكاش وهيتم عمل خصم على تمن الوحدة لتصل إلى مليون و436 ألف جنيه بدل من مليون ونص أو نظام تقسيط من خلال دفع مقدمة حجز قيمتها 315 ألف جنيه وأقساط شهرية متساوية بقيمة 106 آلاف جنيه على 12 شهر أو كل 3 شهور 318 ألف جنيه أو 4 دفعات على مدار السنة بشرط السداد خلال سنة.
وهيتم تسليم "الأحواش" خلال سنتين من التعاقد مش قبل كده ومتوقع وفقا للشركة ان الأسعار ممكن تزيد 3% خلال الفترةالجاية
ولحد دلوقتي تم طرح 500 "حوش" اتباع منهم حوالي 430 لغاية يوم الخميس اللى فات .. وخلال ايام هيتم طرح مجموعة جديدة من الأحواش لكن بأسعار أعلى من الطرح الأول
الشركة هنطرح كمان مرحلة جديدة بعد انتهاء المرحلتين الأولى والتانية ودي هتكون أقل سعرا وأقل تميزا من الطرحين الأول والتاني وسعرها هيكون مليون و446 ألف جنيه بمقدم 289 ألف جنيه والباقي يقسط على دفعتين على سنتين.
