فك لغز السوق السوداء للدولار.. تصرف مريب يكشف المستور

  
فيه تصرفات مريبة بتحصل في السوق السودا للدولار في الساعات الأخيرة خلت سعر العملة الأمريكية يسجل مستويات قياسية محصلتش قبل كده.. وفيه اقبال كبير من مافيا منظمة لشراء الدولار بأى سعر وتخزينه تمهيدا لتهريبه خارج مصر في محاولة لضرب استقرار الدولة وحرمانها من العملة الصعب في توقيت حرج.. لكن الحمد لله التحركات دي تم رصدها من الجهات الرقابية والأجهزة الأمنية وبدأت التحركات للقبض على عدد من المتورطين في تجارة العملة خارج القنوات الشرعية.. وخلال ساعات هيتم الإعلان عن مفاجآت مدوية بخصوص كواليس اللى بيحصل في السوق الموازية.. فيا ترى ايه لغز السوق السوداء للعملة ؟ ومين اللى بيتلاعب بأسعار الدولار ؟ وبيشتغل لصالح مين ؟ زفين الدولة أصلا من التحركات المريبة اللى خلت سعر الدولار يقترب من ال 50 جنيه؟ 
 

اوعا تكون فاكر البنك المركزي والأجهزة الرقابية نايمين على ودانهم او مش عارفين وراصدين كويس جدا اللى بيحصل في السوق السودا للدولار واوعا تفتكر ان التصرفات المريبة اللى بتتم مش مرصودة.. بالعكس كل حاجة بتتم في السوق الموازية للصرف في مصر الأجهزة الرقابية بتتابعها كويس جدا وبترصدها بدقة في الأسبوع الأخيرة فيه ناس بتشتري دولارات كتير باسعار خرافيه وبيحاولوا يتحكموا في السوق السوداء زي ما هما عاوزين ويوصلوا الدولار لأرقام خرافية بعيدة تماما عن السعر العادل للعملة الأجنبية .. والناس دي بسبب مكرهم ونيتهم السيئة وقعوا في شر أعمالهم وبسبب تشديد القبضة الأمنية فشل مخططهم في تهريب العملة الصعبة اللى جمعوها بأسعار مبالغ فيها جدا وحاليا مش عارفين يتصرفوا في الفلوس اللى معاهم وقاعدين مرعوبين من الضربات الأمنية اللى بتتم مؤخرا وبتستهدف مافيا السطو على الدولار 
طب مين الناس دول وبيعملوا كده ليه ؟ 
زي ما فيه تجار حرب بيظهروا في المعارك وبيحاولوا يستغلوا أوضاع الشعوب اللى بتحارب فيه تجار أزمات بيظهروا في الظروف الصعبة زي اللى مصر بتمر بيها مؤخرا ودول مجموعات تابعة لدول وجماعات مش عاوزين الخير للبلد وبيستغلوا أزمة نقص العملة الجنبية أسوأ استغلال وكفاية تعرف ان الناس دول استغلوا انشغال الدولة المصرية بكل أجهزتها في دعم اخواتنا في فلسطين ونازلين لعب في السوق السودا وجمعوا كميات كبيرة جدا من الدولار واشتروها بأسعار أكتر من السعر الرسمي بحوالي من 15 الى 17 جنيه في الدولار الواحد .. تخيل الناس دي بتضرب اقتصاد البلد وبتدمر أي اصحات بتتم ازاى .. وهتعرف خطورة اللى بتعملوا مافيا الدولار لما تعرف ان حتى اكتر مؤسسات التمويل ووكالات التصنيف تشاؤما بخصوص مستقبل الجنيه المصري بيتكلموا عن وصول الدولار من 36 الى 38 جنيه في حين ان الناس دي بتشترى الدولار ب47 و48 جنيه وده سعر بعيد تماما عن السعر العادل للعملة الأمريكية. 
حد هيسأل ويقول طب والدولة سايبة الناس دي تعمل كده ليه ؟ 
للأسف الناس دي بتشتغل بطرق غير شرعية وبتستغل التطور التكنولوجى الرهيب للافلات من الملاحقة وكمان ليهم عيون في الأسواق وبيعرفوا يصطادوا الناس اللى عاوزة تبيع دولارات وبيغروهم بأسعار خرافية .. بس الدولة مش ساكتة والأجهزة الرقابية والأمنية نجحت بالفعل في القبض على عدد كبير من تجار العملة في الأيام الأخيرة وتم ضبط كميات كبيرة من العملات الأجنبية ولعى راسها الدولار طبعا

وليه البنوك ما توفرش للناس الكميات اللى محتاجينها من الدولار بدل ا يروحوا شتروا عملات من السوق السودا؟
البنك المركزي بالتعاون مع البنوك العاملة في السوق المصرفي بالفعل بيبذلوا مجهود كبير لتوفير السيولة الدولارية المطلوبة للمستوردين والشركات وفى الشهور الأخيرة الدولة وفرت عشرات المليارات وأفرجت عن بضايع كانت مركونة في الموانيء لفترات طويلة لكن للأسف فيه فجوة تمويلية كبيرة في الموازنة بسبب تداعيات الحرب الروسية الأوكرانية وده اللى خلا الحكومة تلجأ لصندوق النقد عشان تاخد برنامج تمويل وتستغله كشهادة من الصندوق على نجاح برنامجها الاقتصادي عشان تاخد تمويل من جهات دولية تانية لسد الفجوة التمويلية وسداد التزاماتنا الخارجية