23 كنز في قلب الصحراء.. مصر هتبقى من الدول العظمى في انتاج الغاز
في عز أزمة نقص العملة اللى بتمر بيها مصر ربنا كرمنا بمجموعة اكتشافات مهمة لآبار وخحقول غاز لعبت دور مهم جدا فى توفير العملة الصعبة ، والرئيس عبدالفتاح السيسي اتكلم بنفسه عن أهمية اكتشافات حقوق الغاز وقال لولا الاكتشافات دي مصر كانت هتعيش أزمة حادة، وقال نصا:لو مكنش الإنتاج بتاعنا موجود دلوقتي كنا هنعانى من أزمة كبيرة، وبسبب الدور المهم والحيوي اللى لعبته الاكتشافات الجيدة فالرئيس السيسي بيشرف بنفسه على خطة بتنفذها وزارة البترول للتنقيب عن الآبار الجديدة.. وفى الساعات الأخيرة تم الاعلان عن تحرك جديد هيساهم فى حل أزمة نقص العملة وهيوفر لمصر فى المستقبل مليارات الدولارات.. فيا ترى ايه اللى هيحصل ؟ وايه الكنوز الجديدة المتوقع الكشف عنها خلال الأيام الجاية؟
النهاردة وزارة البترول أعلنت طرح مزايدة عالمية جديدة للتنقيب عن الغاز والبترول في 23 منطقة جديدة في عدد من المحافظات متوقع تكون مصدر دخل دولاري مهم فى الفترة الجاية ووفقا لبيان صادر عن الوزارة هتمتد فترة تلقي العروض في المزايدة لغاية 25 فبراير2024.
والطرح هيشمل 10 مناطق في الصحراء الغربية، و2 في الصحراء الشرقية، و 7 مناطق في خليج السويس، و 4 مناطق في البحر الأحمر.
ومصر بالمزايدة العالمية الجديدة دي بتواصل عملها على زيادة إنتاجها من الثروات البترولية وزيادة الاستثمارات المقررة لنشاط الاكتشافات الجديدة فى اطار تعظيم العوائد من صادرات الغاز واستغلال الطلب المتزايد على الغاز فى السوق العالمي، فى اطار خطة قومية بتشرف عليها الحكومة لجعل مصر مركز اقليمي للطاقة
وبتخطط وزارة البترول والثروة المعدنية لحفر 35 بئر جديدة للغاز الطبيعى باستثمارات تزيد على 1.5 مليار دولار خلال العامين الماليين 2023-2024 و 2024-2025 بهدف زيادة معدلات الإنتاج والاحتياطيات.
وحاليا فيه خطة بيتم تنفيذها لحفر 45 بئر للغاز الطبيعي بالبحر المتوسط والدلتا باستثمارات نحو 1.9 مليار دولار بتشمل حفر 10 آبار تم الانتهاء منها خلال العام المالي المنتهي في يونيو اللى فات وأسفرت عن تحقيق عدد من الاكتشافات أهمها كشف نرجس بالبحر المتوسط باحتياطيات حوالي 2.5 تريليون قدم مكعب غاز.
ووزارة البترول بتقيم حاليا نتايج المزايدة العالمية للبحث عن الغاز الطبيعي في 12 منطقة برية وبحرية بالبحر المتوسط والدلتا بعد ما تم اغلاقها فى نهاي السنة المالية اللى فاتت.
وفى آخر 3 سنين تم حفر 298 بئرا نتج عنها 142 كشف بترولي جديد منها نحو 30 ٪ آبار زيت والباقي غاز تتراوح بين 70 أو 65 ٪ آبار اكتشافات جديدة للغاز.
وشهد عام 2023 حفر 112 بئرا وكشف 42 بئر بنجاح أضافت حوالى 70 ألف برميل بترول يوميا في الإنتاج المصري.
وتزايد إنتاج مصر من البترول إلى 500 ألف برميل يوميا ونحو 300 مليون برميل سنويا وخلال 5 سنين هيوصل إلى 1.5 مليار برميل إنتاج من من الصحراء الغربية.
و الاكتشافات الجديدة أضافت إلى الاحتياطي 168 مليون برميل زيت و3 تريليون قدم مكعب من الغاز، فى وقت بتستورد فيه مصر 200 ألف برميل مكافئ حوالى20 ٪ من الاستهلاك الداخل ويبلغ إنتاج مصر 6.5 مليار وحدة غاز يوميا، وعائد الصادرات المصرية من الغاز العام الحالي تبلغ 8 مليارات عائد أو ناتج تصدير الغاز.
