هو فين بريكس اللي قالوا هيقلب الموازين؟.. الأسعار ولعت أكتر من الأول
يا ترى فين فوايد بريكس اللى قالوا انها هتقلب الموازين؟ وليه مصر لحد دلوقتى ما حققتش اى استفادة من الانضمام للتحالف لحد دلوقتي؟ وفين العملة الموحدة اللى قالوا هتقضي على الدولار وهتخلى الأمريكان يفقدوا هيمنتهم ونفوذهم على حركة التجارة وعلى حجم الاحتياطي النقدي من العملات الأجنبية في البنوك المركزية؟ وهل مشروع تبادل العملات كده انتهى خلاص ومفيش تعاون هيحصل بين مصر وبين دول التحالف؟ والمهم ايه علاقة كل ده بارتفاع الأسعار أكتر من الأول؟
فات لحد دلوقتى حوالى شهر على اعلان انضمام مصر لتجمع بريكس بعد الاجتماع المهم اللى عمله التجمع في جنوب افريقيا وقرر خلاله قبول انضمام 6 دول جديدة للتحالف هي مصر والسعودية والامارات والأرجنتين وايران واثيوبيا في خطوة اعتبرها كتير من المحللين ضربة مهمة ونقطة تحول لعلاقة مصر بمؤسسات التمويل الدولية وهتحرر مصر من التبعية للدولار الأمريكي.. ولأن لحد دلوقتى مفيش حاجة حصلت ولا اتفاقيات وقعتها مصر مع دول بريكس.. ناس كتير بدأت تتريق وتقلل من الانضمام لبريكس وانها مش مفيدة لمصر ولا ليها اى تأثير على حركة الاستثمار والاقتصاد والمعاملات التجارية.. فيا ترى الكلام ده حقيقي فعلا؟ وليه اتأخرت الاستفادة من بريكس؟.. وعشان نفهم اللى بيحصل لازم نرد على كل الأسئلة اللى اتطرحت في الاتجاه ده؟
وأول سؤال هي فين فوايد بريكس؟
اللي بيسأل السؤال ده أكيد ما ركزش خالص في القرار اللى طلعوا اجتماع جنوب افريقيا بخصوص مصر واللى أكد ان تم دعوة مصر للانضمام الى بريكس ولكن بداية من 1 يناير 2024 يعنى حضرتك لحد دلوقتي مصر أصلا ما انضمتش رسميا لبريكس فازاى هتستفيد وهى لسه ما بقت عضوة
يعنى لو انضمت الأحوال هتتغير؟
مفيش شك ان انضمام مصر لبريكس مهم جدا وهيلعب دور كبير في تخفيف الضغط على الدولار والاحتياطي النقدي.. لكن طبعا ده مش هيحصل بين يوم وليلة يعنى مش زرار هندوس عليه فكل مشاكلنا هتتحل الموضوع هياخد وقت واتفاقيات وبروتوكلات تعاون على ما نبدأ نجني ثمارها
طيب يا سيدي فين بقا العملة الموحدة اللى قالوا هتقضى على الدولار؟
دول بريكس لسه في طور دراسة الموضوع من كل جوانبه لأن اصدار عملة عالمية جديدة مش حاجة سهلة ومحتاجة تنسيق على أعلى مستوى مع كل البنوك المركزية في العالم عشان يتم الاعتراف بيها واعتمادها كعلمة احتياط مع سلة تانية كبيرة من العملات وحاليا روسيا والصين ومعاهم باقي دول بريكس بيحطوا الصيغة النهائية لمشروع العملة الموحدة الجديدة
طب ومشروع تبادل العملات ؟
مشروع تبادل العملات ده مشروع مهم جدا ودخل حيز التنفيز بالفعل بين اكتر من دولة وقريب جدا مصر هتوقع اتفاقيات لمبادلة العملات المحلية مع دول كبيرة ومهمة زي الهند وروسيا والصين وغيرهم كتير بس فيه خطوة مصر شغالة عليها ومدياها الأولوية وهي عمل مؤشر الجنيه وده مؤشر هيربط الجنيه المصري بسلة من العملات الأجنبية بالإضافة الى بعض المعادن النفيسة زي الدهب والفضة وغيرهم من المعادن النفيسة والمؤشر ده حرفيا هيحرر الجنيه المصري من هيمنة ونفوذ الدولار وسعر العملات الجنبية قدام الجنيه مش هيكون مربوط بالعملة الأمريكية بس.
طب ليه الأسعار بتزيد كل يوم رغم انضمامنا لبريكس ؟
مفيش علاقة بين بريكس واللى بيحصل في أسعار السلع في الأسواق المصرية لأن السلع جاليا بتزيد بسبب اللى بيحصل في السوق السودا للدولار وده عشان مصر بتعتمد في اغلب احتياجاتها على الاستيراد من الخارج وبالتالي اى زيادة في سعر العملة الأمريكية بيسمع في الأسعار في السوق.
