مصر تظهررسميا في البريكس.. شوف رد فعل الروس
في عالم المصالح وعلاقات الدول كل دولة بتشوف مصلحتها فين وبتسعى تحققها بصرف النظر عن علاقات الماضي ومصر دولة دايما بتمشي ورا مصالح شعبها ومصلحة البلد خاصة في مجال التجارة والمعاملات الاقتصادية وكلنا شفنا موقف الحكومة المصرية من صندوق النقد الدولي لما الشروط جت على مصلحة المواطن والبلد والحكومة قالت ستوب ونلازم وقفة.. ايه اللي حصل تاني.. تعالو نشوف
النهاردة كان أول ظهور رسمي لمصر في اجتماعات دول البريكس وكلنا عارفين إنها مجموعة اقتصادية جديدة في العالم بتضم دول عظمي وكبيرة عالميا زي الصين ورسيا والهند وجنوب أفريقيا.. ومصر ظهرت رسميا في اجتماعات بنك التنمية الجديد التابع للمجموعة واللي مصر حصلت على العضوية الرسمية فيه.
الدكتورة رانيا المشاط، وزيرة التعاون الدولي، كانت ممثل مصر الرسمي في اجتماعات البنك وقابلت شخصيات رفيعة المستوى زي أنطون سيلوانوف، وزير المالية الروسي ومحافظ روسيا لدى بنك التنمية الجديد، واللي أكدوا على تقديرهم لانضمام مصر للبنك، وقابلت كمان تاتيانا روسيتو، مسئولة الشئون الدولية في وزارة المالية البرازيلية، والدكتور ديفيد ماسوندو، وزير المالية ومحافظ جنوب أفريقيا لدى بنك التنمية الجديد، وكلها اتركزت على جهود تعزيز تبادل الخبرات بين الدول الأعضاء، والأهداف الاستراتيجية لبنك التنمية الجديد ودوره في دعم الدول النامية والاقتصاديات الناشئة.
عضوية مصر في البنك الجديد هتفتح المجال لشراكات جديدة وتعاون مع الدول الأعضاء بالإضافة لبرامج تمويلية بعيدة عن الدولار الأمريكي، وفتح نافذة جديدة للاقتصاد المصري.
