ضربة جديدة لصناعة الحديد.. مصر تخفض إمدادات الغاز للمصانع 30%

ضربة جديدة لصناعة الحديد في مصر.. الحكومة بتخفض إمدادات الغاز الطبيعي للمصانع بنسبة 30%، وعلى رأسها مصانع حديد عز.

القرار بدأ تطبيقه من 8 نوفمبر، وبيمثل خفض حوالي 30 مليون قدم مكعب من الغاز يوميًا لشركة حديد عز، في ظل أزمة بتواجهها مصر بسبب تراجع الإنتاج المحلي من الغاز وارتفاع تكلفة الاستيراد من الخارج.

لمشاهدة الفيديو من هنا 

والأزمة مش واقفة عند الحديد.. مصانع الأسمدة والميثانول دخلت هي كمان ضمن خطة ترشيد الغاز، ووصلت نسبة الخفض لبعض مصانع الأسمدة إلى 33% بدل 20% في بداية نوفمبر.

والسبب الرئيسي هو ارتفاع أسعار الغاز المسال عالميًا، لدرجة إن تكلفة شحنة الغاز الواحدة قربت من 120 مليون دولار، وده دفع الحكومة لإعادة ترتيب أولويات توزيع الغاز بين الكهرباء والصناعة.

لكن التأثير على مصانع الحديد مش بالضرورة يكون بنفس نسبة خفض الغاز؛ لأن بعض المصانع تقدر تلجأ لاستخدام الخردة والحديد المختزل المستورد لتعويض جزء من النقص، لكن ده معناه تكاليف إضافية واحتياجات أكبر للدولار.

والتحدي الحقيقي دلوقتي هو الحفاظ على معدلات الإنتاج وتلبية احتياجات السوق المحلية والتصدير، من غير ما تتحول أزمة إمدادات الطاقة لضغط جديد على صناعة الحديد وتكلفة مواد البناء في مصر.